ލޯކަލް ކައުންސިލް އިންތިހާބާއި ރެފަރެންޑަމް ވޯޓަށް ކުޑަ ތަން ވެފައި އޮއްވާ ޕަބްލިކް ސާވިސް މީޑިއާ (ޕީއެސްއެމް) ގައި މަސައްކަތް ކުރާ އިސް މުވައްޒަފުންތަކަކަށް ކުއްލިއަކަށް ޕްރޮމޯޝަންތަކެއް ދީފި އެވެ.
ސިއްރު މަސްދަރަކުން އަދަދު ނޫހާ ހިއްސާކޮށްފައިވާ މައުލޫމާތުން އެނގޭ ގޮތުގައި، މިހާރު ވެސް ބޮޑު ގެއްލުމެއްގައި ހިންގާ، ޕީއެސްއެމްއިން ޕްރޮމޯޝަންތައް ދިނީ ޑިރެކްޓަރުންނާއި މެނޭޖީރިއަލް ލެވަލްގައި މަސައްކަތް ކުރާ މުވައްޒަފުންނަށެވެ.
އެ ގޮތުން މިދިޔަ ބުރާސްފަތި ދުވަހު، ދެ މީހަކު ވަނީ އެގްޒެކެޓިވް ޑިރެކްޓަރު ކަމަށް ޕްރޮމޯޓުކޮށްފަ އެވެ. އެހެން ތިން މީހަކު ވަނީ ޑެޕިއުޓީ ޑިރެކްޓަރު ކަމަށް ޕްރޮމޯޓުކޮށްފަ އެވެ. އަދި ކުރިން އެސިސްޓަންޓް މެނޭޖަރު މަގާމުގައި ހުރި މީހަކު ވަނީ ޓީވީ ޕްރޮޑަކްޝަން ޑިޕާޓުމަންޓުގެ ލީޑަކަށް ޕްރޮމޯޓުކޮށްފަ އެވެ.
ހިންގުމުގެ ހަރަދުތައް ވެސް ހަމަނުޖެހިގެން އުޅޭ ޕީއެސްއެމްގެ މުސާރަތަކާއި އެލަވަންސްތައް ދިނުމުގެ ހަރަދުތައް އިތުރަށް ބޮޑުވާ ގޮތަށް އިސް މަގާމުތަކަށް ބަދަލު ގެނައީ ހަމަ އެ ދުވަހުގެ ހެނދުނު ބޭއްވި ބޯޑު ބައްދަލުވުމެއްގައި ކުންފުނީގެ އޮނިގަނޑު ބަދަލުކުރަން ފާސްކޮށްގެންނެވެ. މިކަމުގައި އިސްކޮށް އުޅުއްވީ، ކުންފުނީގެ މެނޭޖިން ޑިރެކްޓަރު އަހުމަދު ޝަކީބާއި ޑެޕިއުޓީ މެނޭޖިން ޑިރެކްޓަރު އަބްދުﷲ ޔާމީނެވެ.
އަދަދު އަށް އެނގިފައިވާ ގޮތުގައި، ކުންފުނިން އެ ދުވަހު ދިން އެހެން ޕްރޮމޯޝަންތައް ދިނުމުގައި އުޅުނީ، ހެނދުނު ބޭއްވި ބޯޑު ބައްދަލުވުމުގައި ހިއުމަން ކެޕިޓަލް މެނޭޖުމަންޓު ޑިވިޝަން ހިންގަން ހަވާލުކުރި އެގްޒެކެޓިވް ޑިރެކްޓަރެވެ.
ނަން ނުޖަހާ ގޮތަށް މި ނޫހަށް މައުލޫމާތު ދިން ޕީއެސްއެމްގެ މުވައްޒަފުން ވަނީ ގިނަ ދުވަސްތަކެއް ވަންދެން ޕްރޮމޯޝަނެއް ނުލިބިފައި ތިބި އާދައިގެ މުވައްޒަފުންނަށް ޕްރޮމޯޝަން ނުދީ، އިސްކޮށް އުޅޭ މުވައްޒަފުންނަށް ޕްރޮމޯޝަން ދިން މައްސަލައިގައި ނުރުހުން ފާޅުކޮށްފަ އެވެ.
ވޯޓު ނަގަން އޮތް ހަފުތާ ބަންދަށް ސަރުކާރު ބަންދުވުމުގެ ކުރިން ޕީއެސްއެމްއިން މި ބަދަލުތައް ގެނައިއިރު، މިއީ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ހުއްދަ ހޯދައިގެން ގެނައި ބަދަލުތަކެއް ކަމެއް ނޭނގެ އެވެ.
ޕީސީބީން ނެރެފައިވާ ސާކިއުލާތަކުން ވަނީ މުވައްޒަފުންގެ ހަރަދުތައް ކޮންޓްރޯލް ކުރުމުގެ ގޮތުން ބައެއް މަގާމުތަކަށް މީހުން ނެގުމުގެ ކުރިން ފިނޭންސާއި އެ ބޯޑުގެ ހުއްދަ ހޯދަން ސަރުކާރު ހިއްސާވާ ކުންފުނިތަކަށް އަންގާފަ އެވެ.
ދައުލަތުގެ ބަޖެޓުން ހަރަދުކުރާ ގޮތަށް ހާއްސަ ގާނޫނެއްގެ ދަށުން އުފައްދާފައިވާ ޕީއެސްއެމްއަކީ ނުފޫޒުން އެއްކިބާވެފައިވާ، އަދި އެޑިޓޯރިއަލް މިނިވަންކަން ލިބިފައިވާ، ގައުމީ މީޑިއާއެއްގެ ގޮތުގައި ތަސައްވުރުކޮށްފައިވާ ތަނެކެވެ. މިހެން ނަމަވެސް، އެއްވެސް ސަރުކާރެއްގައި އެ ގާނޫނުގައި ތަސައްވުރުކުރާ ގޮތުގެ މަތިން ޕީއެސްއެމް ނުހިންގަ އެވެ.
ގާނޫނުގައި ބުނާ ގޮތަށް ޕީއެސްއެމް ނުހިންގޭ ތަނުގައި، އެ ކުންފުންޏަކީ ދައުލަތުގެ މާލިއްޔަތަށް ވެސް ބޮޑު ބުރައަކަށް ވެފައިވާ ކުންފުންޏެވެ.
އެ ގޮތުން މިދިޔަ އަހަރު އޮޑިޓާ ޖެނެރަލް އޮފީހުން ޝާއިއުކޮށްފައިވާ އެ ކުންފުނީގެ 2021 ވަނަ އަހަރުގެ އޮޑިޓުގައިވާ ގޮތުގައި، ޕީއެސްއެމްއަށް އެ އަހަރު 18 މިލިއަން ރުފިޔާ އާމްދަނީގެ ގޮތުގައި ލިބުނުއިރު، ހަރަދުތައް 127 މިލިއަން ރުފިޔާއަށް އަރަ އެވެ.
މި ހަރަދުތަކުގެ ތެރެއިން 100 މިލިއަން ރުފިޔާ ހަމަޖެއްސީ ސީދާ ދައުލަތުގެ ބަޖެޓުންނެވެ. އެއީ އެ އަހަރަށް ފާސްކުރި ބަޖެޓުން ދިން 97 މިލިއަން ރުފިޔާއިން ނުވެގެން އިތުރު އެހީގެ ގޮތުގައި ސަރުކާރުން އެ ކުންފުންޏަށް ދިން ތިން މިލިއަން ރުފިޔާ ވެސް ހިމަނައިގެންނެވެ. މި ހުރިހާ ފައިސާއެއް ދީގެން ވެސް އެ ކުންފުންޏަށް އެ އަހަރު އަށް މިލިއަން ރުފިޔާގެ ގެއްލުން ލިބުނެވެ.
މި އޮޑިޓު ރިޕޯޓުގެ ފަހުން، ފަސް އަހަރު ވޭތުވެފައިވާއިރު، މި މުއްދަތުގެ ތެރޭގައި ވެސް އެ ކުންފުނީގެ ހިންގުން ހަރުދަނާ ކުރާކަށް ކުރި މަސައްކަތެއް ފެންނާކަށް ނެތެވެ. ނަމަވެސް ސަރުކާރުގެ ގިނަ ކުންފުނިތަކެކޭ އެއް ފަދައިން ޕީއެސްއެމް ވެސް ގަވާއިދުން އޮޑިޓު ނުކުރާތީ މިހާރުގެ މާލީ ހާލަތު އެނގޭނެ ގޮތެއް ނެތެވެ.
