އަންނަ އެޕްރީލް 4، ގައި ރިޔާސީ އިންތިހާބާއި މަޖިލިސް އިންތިހާބު އެއްކޮށްލުމާ ގުޅޭގޮތުން ރައްޔިތުންގެ މެދުގައި ނަގާ ފެންނަ ނުފެންނަ ވޯޓު (ރެފެރެންޑަމް) އާ ގުޅިގެން މައުލޫމާތު ދިނުމަށް ޕަބްލިކް ސާވިސް މީޑިއާ (ޕީއެސްއެމް) އިން އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އަށް ފުރުސަތު ނުދޭތީ އެ ކުންފުނީގެ އެމްޑީ އަހްމަދު ޝަކީބުގެ އިސްތިއުފާއަށް ގޮވައިފި އެވެ.
އެމްޑީޕީގެ ހުރި ކަންބޮޑުވުންތައް ހިއްސާކުރަމަށް މިއަދު ޕީއެސްއެމްއަށް ދިޔުމުން ޝަކީބުއާ ބައްދަލުވާގޮތް ވަނީ ނުވެފަ އެވެ. އެއާއެކު ޕީއެސްއެމްގެ އިސްވެރިޔަކާ ބައްދަލުކުރުމަށް އެމްޑީޕީން މަސައްކަތް ކުރުމުން އެކަން ވެސް ކާމިޔާބުވާ ގޮތް ނުވުމުން ޝަކީބުގެ އިސްތިއުފާއަށް ގޮވީ އެވެ.
ޕީއެސްއެމްއަށް އެމްޑީޕީގެ ފަރާތުން ޕާޓީގެ ވަގުތީ ޗެއާޕާސަން އަބްދުލްޣަފޫރު މޫސާ އާއި ކައުންސިލް އިންތިހާބަށް އެ ޕާޓީން ކަނޑައަޅާފައިވާ ޑެޕިއުޓީ ކެމްޕެއިން މެނޭޖަރު އަލީ ނިޔާޒްގެ އިތުރުން ތަރުޖަމާން އަބްދުﷲ ވަހީދު އަދި ޕާޓީގެ ގައުމީ މަޖިލީހުގެ މެންބަރުން ބައިވެރިވި އެވެ.
ޣަފޫރު ވިދާޅުވީ މި ސަރުކާރު އައި ފަހުން ޕީއެސްއެމް ހިންގަމުންދަނީ ގާނޫނާ ހިލާފަށް ކަމަށާއި އެ ޓީވީ ހިންގަމުންދަނީ ޕީއެންސީގެ ކެމްޕެއިން ޖަގަހައެއް ގޮތުގައި ކަމަށެވެ.
"ޕީއެސްއެމްއަކީ ގާނޫނީ ގޮތުން ހަމަހަމަ ފުރުސަތުތައް އެންމެންނަށް، ހުރިހާ ޕާޓީތަކަށް ދީގެން އެކަން ކުރެވޭނެ ބައެއް. އެކަމަކު އޭގެ ބަދަލުގައި މިއަދު ޕީއެސްއެމްއިން ކުރާ ކަމަކީ ސަރުކާރަށް ކެމްޕެއިންކުރުން. އެކަމެއް ނުކުރެވޭނެ އެގޮތަކަށް،" ޣަފޫރު ވިދާޅުވި އެވެ.
އަލީ ނިޔާޒް ވިދާޅުވީ އެންމެ ފަހުން އިލެކްޝަންސްއާއެކު އެމްޑީޕީން ބޭއްވި ބައްދަލުވުމުގައި އެ ޕާޓީއަށް ޕީއެސްއެމްއިން ފުރުސަތު ނުދޭ މައްސަލަ ޖެއްސުމުން އެކަން ބަލާނެ ކަމަށް އިލެކްޝަނުން ބުނި ނަމަވެސް، އެކަމާ ގުޅިގެން ކުރިއެރުމެއް ނުލިބޭ ކަމަށެވެ.
titledesc
އެއްވެސް ފަރާތެއްގެ ނުފޫޒެއް ނެތް، އެޑިޓޯރިއަލް މިނިވަންކަން އޮންނަ ތަނަކަށް ޕީއެސްއެމް ވާންޖެހޭނެ ކަމަށް ގާނޫނުގެ އެތަކެއް މާއްދާއެއްގައި ބަޔާންކޮށްފައިވީ ނަމަވެސް ހަމައެކަނި ސަރުކާރުން ބޭނުންވާ ގޮތަށް ރެފެރެންޑަމް ވޯޓުގައި އަމަލުކުރަމުން އަންނާތީ ދައުލަތުގެ މީޑިއާއާ މެދު މީހުން އަންނަނީ ސޯޝަލް މީޑިއާގައި ނުރުހުން ފާޅުކުރަމުންނެވެ.
މި ސަރުކާރުގައި އެންމެ ފުރަތަމަ ޕީއެސްއެމްއަށް އައްޔަން ކުރެއްވީ، ޒީނާ ޒާހިރު އެވެ. އެއަށް ފަހު މުހައްމަދު ސައީދު އެވެ. އެންމެ ފަހުން ޕީއެސްއެމްގެ އެމްޑީއަކަށް ހުންނެވީ އެ ކުންފުނީގެ މާކެޓިންގެ އިސްވެރިޔަކަށް ގިނަ އަހަރުތަކެއް ހޭދަކުރެއްވި އިބްރާހިމް ނަސްރީން އެވެ.
ރެފެރެންޑަމްއާ ގުޅިގެން އިލެކްޝަންސް އިން ވެސް ރައްޔިތުން ހޭލުންތެރިކުރުމަށް މާ ބޮޑު މަސައްކަތެއް ނުކުރާ ކަމަށް ބުނެ އިދިކޮޅުން ވަނީ ކަންބޮޑުވުން ފާޅުކޮށްފަ އެވެ.
