ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީ (ޑަބްލިއުޑީސީ) އިންތިހާބު އަދި ރިޔާސީ އިންތިހާބާއި މަޖިލިސް އިންތިހާބު އެއްކޮށްލަން ފެނޭތޯ ބަލަން ނަގާ ފެންނަ ނުފެންނަ ވޯޓު (ރެފެރެންޑަމް) ގައި ވޯޓުލާ މަރުކަޒަށް ގޮސް ވޯޓުލުމުގެ ފުރުސަތު ލިބޭނީ އެއްފަހަރު ކަމަށް އިލެކްޝަންސް ކޮމިޝަނުން ބުނެފި އެވެ.
އިލެކްޝަންސްގެ ނައިބުރައީސް އަދި ތަރުޖަމާނު އަބްދުއްރަހްމާން ސޮލާހު ރަޝީދު ވިދާޅުވީ ވޯޓުލާ މަރުކަޒަށް ގޮސް އެއް އިންތިހާބަށް ވޯޓުލާފައި، ވޯޓުނުލާ އިންތިހާބަށް ފަހުން ވޯޓުލާން ފުރުސަތު ނުލިބޭނެ ކަމަށެވެ.
"ނުލިބޭނެ. އެ ފުރުސަތެއް ނުލިބޭނެ. އޭރަށް އޮންނާނީ ހަމަ އިނގިލީގެ ފާހަނގަ ޖަހައި ސިސްޓަމްގައި ހުރިހާ އެއްޗެެއް ކައުންޓުކޮށް ނިމިފައި. ވޯޓުލާ މަރުކަޒުން ނުކުމެފައި ދެވަނަ ފަހަރަކަށް ގޮސްފައި ވޯޓުލާކަށް ނުލިބޭނެ،" ސޮލާހު ވިދާޅުވި އެވެ.
މިގޮތުން އިންތިހާބުގައި އެއް އިންތިހާބެއްގައި ވޯޓުލުމަށްފަހު މަރުކަޒުން ނުކުތުމުމަށްފަހު، ފަހުން ހިޔާލު ބަދަލުވެގެން ހުރިހާ އިންތިހާބެއްގައި ވޯޓުލާން ބޭނުންވިޔަސް އެ ފުރުސަތު ނުލިބޭނެ ކަމަށް ސޮލާހު ވިދާޅުވި އެވެ.
އިންތިހާބުގައި ވޯޓުލާން ޖުމްލަ ތިން ކަރުދާސްކޮޅެއް ދޭނެ އެވެ. އެއީ ލޯކަލް ކައުންސިލް އިންތިހާބުގެ ކަރުދާސްކޮޅާއި ޑަބްލިއުޑީސީ އިންތިހާބުގެ ކަރުދާސްކޮޅުގެ އިތުރުން ފެންނަ ނުފެންނަ ވޯޓުގެ ކަރުދާސްކޮޅެވެ.
ވޯޓުލާން ދާ މީހަކަށް އެ މީހަކު ބޭނުންވާ އިންތިހާބަކަށް އެކަނި ވޯޓުލުމުގެ އިހުތިޔާރު ލިބިގެންވެ އެވެ. މިގޮތުން އެމީހަކު ވޯޓުނުލާ އިންތިހާބެއް މަރުކަޒުގައި އިއުލާންކުރާނެ އެވެ.
މިއަދު ވޯޓުލުން ކުރިއަށް ގެންދިޔުމަށް ހަމަޖެހިފައިވަނީ ހެނދުނު 08:00 އިން ފެށިގެން ހަވީރު 16:00 ޖަހާއިރަށެވެ.
ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުގައި ޖުމްލަ 1592 ކެންޑިޑޭޓުން ވާދަ ކުރެ އެވެ. އޭގެ ތެރެއިން އެންމެ ގިނައީ ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ކެންޑިޑޭޓުންނެވެ.
މިއަދު ކުރިއަށްދާ ދެ އިންތިހާބާއި ފެންނަ ނުފެންނަ ވޯޓުގައި ވޯޓުލުމުގެ ހައްގު 294،937 މީހުންނަށް ލިބިފައިވެ އެވެ. އޭގެތެރެއިން 150،410 މީހުންނަކީ ފިރިހެނުން ކަމަށްވާއިރު، 144،527 މީހުންނަކީ އަންހެނުންނެވެ.
