ރިއޯ ޑި ޖަނެއިރޯ، ބްރެޒިލް (މާޗް 7) - ދެކުނު ކޮރެއާގެ ސޯލް އެފްސީ އަށް ކުޅުމަށް ފަހު، އިނގިރޭސި ފޯވާޑް، ޖެސީ ލިންގާޑް، ބްރެޒިލްގެ ކޮރިންތިއަންސް އަށް ސޮއިކޮށްފި އެވެ.
މެންޗެސްޓާ ޔުނައިޓެޑްގެ ކުރީގެ ފޯވާޑް، ލިންގާޑް، 33، ވަނީ 2024-2025 ގައި ސޯލް އެފްސީ އަށް ކުޅެފަ އެވެ. މި އަހަރުގެ ޑިސެމްބަރު މަހާ ހަމައަށް ސޯލް އެފްސީން ފެނިގެންދިޔަ ލިންގާޑް ވަނީ އެ ޓީމަށް ކުޅެދިން 67 މެޗުން 19 ލަނޑު ޖަހައި، 10 ލަނޑު ޖަހަން ފުރުސަތު ތަނަވަސްކޮށްދީފަ އެވެ.
އިނގިރޭސި ޕްރިމިއާ ލީގުގައި ވެސްޓް ހޭމް ޔުނައިޓެޑާއި ނޮޓިންހަމް ފޮރެސްޓަށް ވެސް ކުޅުނު ލިންގާޑް، މިދިޔަ ޑިސެމްބަރު މަހު ސޯލް އެފްސީން ވަކިވެ، އެނބުރި ޕްރިމިއާ ލީގުގެ ޓީމަކާ ގުޅޭނެ ކަމުގެ ވާހަކަ ދެކެވުނެވެ. އެކަމަކު، ލިިންގާޑް ނިންމީ އާ ތަޖުރިބާއެއް ކުރުމަށްޓަކައި، ބްރެޒިލް ލީގުގެ ގަދަބާރެއް ކަމަށްވާ ކޮރިންތިއަންސް އިން ލިބިފައިވާ އޮފާ ގަބޫލުކުރުމަށެވެ.
އެ ގޮތުން، ކޮރިންތިއަންސް އިން ލިންގާޑަށް 77 ނަމްބަރު ޖޯޒީއާ އެކު ދީފައިވަނީ، މި އަހަރުގެ ނިޔަލަށް އޮތް ކޮންޓްރެކްޓެކެވެ.
ލިންގާޑު، ކޮރިންތިއަންސް އަށް ކުޅެން ނިންމިއިރު، އޭނާއާ އެކު، މެންޗެސްޓާ ޔުނައިޓެޑަށް ކުޅުނު ނެދަލެންޑްސްގެ ފޯވާޑް، މެމްފިސް ޑިޕާއި ވެސް ކުޅެމުން އަންނަނީ ކޮރިންތިއަންސް އަށެވެ.
