ރާއްޖެއިން ޝީޝާ މަނާކޮށް، ހަކުރުން ސަބްސިޑީ ކަނޑާލުމާ ގުޅޭ މަޝްވަރާތައް ވަރަށް ބޮޑަށް ކުރެވެމުންދާ ކަމަށް ހެލްތު މިނިސްޓަރު އަބްދުﷲ ނާޒިމް މިއަދު ވިދާޅުވެއްޖެ އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ނާޒިމް ވިދާޅުވީ ޝީޝާ މަނާކޮށް ހަކުރުން ސަބްސިޑީ ކަނޑާލުމަށްފަހު ޓެކްސް ނެގުމާ ގުޅޭގޮތުން ރައްޔިތުން ހޭލުންތެރިކޮށް ހަރުފަތަކަށްފަހު ހަރުފަތެއް އެކަމާ ގުޅިގެން އަޅަންޖެހޭ ފިޔަވަޅުތައް އަޅާނެ ކަމަށެވެ.
"މިހާރު އަޅުގަނޑުމެން ވަރަށް ބޮޑަށް މަޝްވަރާ ކުރަމުންދާ ކަތައްތަކުގެ ވާހަކަ ތި ވިދާޅުވީ. ޝީޝާ އާއި ހަކުރާއި އެނގޭތޯ. ދެން މިކަމުގައި އެންމެ މުހިންމު ކަމަކީ ޕަބްލިކް ހެލްތު ޕާސްޕެކްޓިވްއަކުން ދެން އާސިމާ ފާހަގަކުރެއްވި ފަދައިން ރައްޔިތުންގެ އެވެއާނަސް އިތުރުކޮށް، ހަރުފަތަކަށްފަހު ހަރުފަތެއް އެއަށް އަޅަންޖެހޭ ފިޔަވަޅުތައް އަޅަމުން ގެންދިޔުން،" ނޫސްވެރިޔަކު ކުރެއްވި ސުވާލަކާ ގުޅިގެން ނާޒިމް ވިދާޅުވި އެވެ.
ނާޒިމް ވިދާޅުވީ ކުރިއަށް އޮތް މުސްތަގުބަލުގައި ޝީޝާ މަނާކޮށް ހަކުރަށް ދޭ ސަބްސިޑީ ކަނޑާލައި، ހަކުރުން ޓެކްސް ނެގުމަކީ ކުރެވޭނެ ކަމެއް ކަމަށެވެ. އެގޮތުން އެންމެ މުހިންމު ދަނޑިވަޅުގައި އެކަން ކުރުން ވަރަށް މުހިންމު ކަމަށް މިނިސްޓަރު ވިދާޅުވި އެވެ.
"އެ މަޝްވަރާތައް ހަމަ އަޅުގަނޑުމެން އެކި ލެވެލްގައި ކުރެވޭ އެނގޭތޯ. ކިހާ ހިސާބެއްގައިތޯ މުޅިން ތަންފީޒުވެގެންދާނީ އެއީ ކަންނޭނގޭ އުފެދޭނެ ސުވާލަކީ. އެންމެ މުހިންމު ދަނޑިވަޅުގައި، އެންމެ މުހިންމު ހާލަތުގައި، މުހިންމު ވަގުތުގައި އެކަން ކުރުން ވަރަށް މުހިންމު،" ނާޒިމް ވިދާޅުވި އެވެ.
މިފަދަ ކަންކަމަކީ ރައްޔިތުންގެ ދިރިއުޅުމުގެ ވައްޓަފާޅިއާ ވަރަށް ބޮޑަށް ގުޅި އޭގެ ތެރޭގައި ވަރަށް ބޮޑަށް ލާމެހިގެން އެއާއެކު އުޅެވިފައި ހުރި ކަމަކަށްވާތީ، ވަކި އުސޫލެއްގެ ތެރެއިން ކަންކަން ކުރިއަށް ގެންދިޔުމަކީ މުހިންމު ކަމެއް ކަމަށް ވެސް ނާޒިމް ވިދާޅުވި އެވެ.
މިދިޔަ އަހަރު ސަރުކާރުން ކުރި އެންމެ މުހިންމު އެއް މަސައްކަތަކީ ދުންފަތުގެ މައްސަލައިގައި އަޅުއްވަންޖެހޭ މުހިންމު ފިޔަވަޅުތައް އަޅުއްވައި އެ ގާނޫނު ތަންފީޒު ކުރެއްވިކަން ނާޒިމް ފާހަގަކުރެއްވި އެވެ.
ސަރުކާރުން މިދިޔަ އަހަރު ރާއްޖެއިން ވޭޕް މަނާކޮށް، ދުންފަތުން ޓެކްސް ބޮޑުކުރުމުގެ އިތުރުން ދުންފަތަށް ޖެނެރޭޝަނަލް ބޭންއެއް ވެސް ގެނެސްފައިވެ އެވެ.
