ހދ. ހިރިމަރަދޫ ރައްޔިތުން އެ އަތޮޅު ހަނިމާދުއަށް ބަދަލުކުރުމުގެ މަޝްރޫއު ލަސްވެއްޖެ އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އަދަދު ނޫން ހުށަހެޅި ސުވާލުތަކަށް އިންފްރާސްޓަރަކްޗާ މިނިސްޓްރީން ދިން ޖަވާބުގައި ބުނެފައި ވަނީ މި މަސައްކަތް ލަސްވާން މެދުވެރިވި އެންމެ ބޮޑު ސަބަބަކީ، ހަނިމާދޫއަށް ބަދަލުކުރާ އާއިލާތަކަށް ގެދޮރު ބިނާކުރުމަށް ބޭނުންވާ ބިން ހަމަޖެއްސުމުގައި އެރަށު ކައުންސިލުން ލަސްތަކެއް ކުރިމަތިކުރުވުމެވެ.
"ރަސްމީކޮށް މިނިސްޓްރީއާ ބިން ހަވާލުކޮށްފައިވަނީ ބިން ހަމަޖައްސައިދިނުމަށް އެދުނުތާ ގިނަ ދުވަސްތަކެއް ފަހުން،" ނިމިގެން ދިޔަ ފެބްރުއަރީ 12 މިނިސްޓްރީން ދިން ޖަވާބުގައިވެ އެވެ.
މިނިސްޓްރީގެ ޖަވާބު
ބިން ހަވާލުކުރުމުގެ މަރުހަލާއަށްފަހު ވެސް، އެ ބިންތަކުގައި ހުރި ރުއްގަސްތަކާމެދު އަމަލުކުރާނެ ގޮތެއް ކަނޑައެޅުމުގައި އިދާރީ އެކި ހުރަސްތައް ކުރިމަތިވަމުންދާމަށް މިނިސްޓްރީން ބުންޏެވެ.
ހިރިމަރަދޫ ރައްޔިތުން ހަނިމާދޫ އަށް ބަދަލުކުރަން ނިންމިކަން ސަރުކާރުން އިއުލާނުކުރީ މިދިޔަ އަހަރުގެ ފެބްރުއަރީ 1 ގަ އެވެ. އެކަން އެގޮތަށް ނިންމީ، ހިރިމަރަދޫ ރައްޔިތުންގެ އެދުމުގެ މަތިން ކަމަށް ސަރުކާރުން ބުނެފައިވެ އެވެ.
ހިރިމަރަދޫ މީހުން ހަނިމާދޫ އަށް ބަދަލުކުރުމަށްޓަކައި ގެތައް އެޅުމުގެ މަޝްރޫއު ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާ ހަވާލުކުރީ މިދިޔަ އަހަރުގެ އޮގަސްޓް މަހު 24 ގައި މުއިއްޒު އެރަށަށް ކުރެއްވި ދަތުރުގަ އެވެ.
އެ މަޝްރޫއުގެ މަސައްކަތް ނިންމައި ގެތައް 18 މަސް ދުވަހުގެ ތެރޭގައި ރައްޔިތުންނާ ހަވާލުކުރާނެ ކަމަށް ސަރުކާރުން ވަނީ ބުނެފަ އެވެ.
ނަމަވެސް މަޝްރޫއުގެ އަމަލީ މަސައްކަތެއް ފެށޭނެ އަދި މީހުން ބަދަލު ކުރެވޭނެ ތާރީހެއް ވެސް ނޭނގި، އޭޕްރީލް މަހު ބާއްވާ ބައި އިލެކްޝަންގައި ހިރިމަރަދޫގައި ކައުންސިލެއް ނުހޮވައި، އެ ރަށުގެ ރައްޔިތުން ވޯޓުލާން ޖެހޭނީ ހަނިމާދޫ ކައުންސިލް ހޮވަންކަމަށް ސަރުކާރުން ނިންމި އެވެ.
ރައީސުލްޖުމްހޫރިއްޔާ ނެރުއްވި ގަރާރަކުން ހިރިމަރަދޫ ކައުންސިލް އުވާލީ ކުރިއަށް އޮތް ލޯކަލް ކައުންސިލް އިންތިހާބަށް ނުފޫޒު ފޯރުވުމުގެ ގޮތުން ކަމަށް އެމްޑީޕީގެ ވަގުތީ ޗެއާޕާސަން އަދި ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވިދާޅުވެފައިވެ އެވެ.
ޣަފޫރު ވިދާޅުވީ ހިރިމަރަދޫ ކައުންސިލް އުވާލަން ސަރުކާރުން ނިންމީ އަންނަ އޭޕްރިލް މަހު ބާއްވާ ކައުންސިލް އިންތިހާބުގައި ހދ. ހަނިމާދޫއިން ސަރުކާރު ހިންގާ ޕީއެންސީއަށް މެޖޯރިޓީ ނުލިބޭނެތީ ކަމަށެވެ.
ބަޔަކު ރަށެއްގައި ދިރިއުޅެމުން ދަނިކޮށް އެ ރައްޔިތުން ދިރިއުޅޭނެ ތަނެއް ނާޅައި އެ ރައްޔިތުން ރަށަކަށް ބަދަލުކުރުމަކީ އެއްވެސް ގާނޫނަކުން ރައީސުލްޖުމްހޫރިއްޔާއަށް ލިބިދޭ ބާރެއް ނޫން ކަމަށް އޭނާ ވިދާޅުވި އެވެ.
ހިރިމަރަދޫ ރައްޔިތުންނާއެކު ބޭއްވި ބައްދަލުވުމުގައި މުއިއްޒު ވިދާޅުވީ ހިރިމަރަދޫގައި މިހާރު އޮތް ކޮންމެ ގެވަޅަކަށް ހަނިމާދޫގައި ގެއެއް އަޅައިދޭނެ ކަމަށާއި ފައިސާގެ އެހީއެއްވެސް ދެއްވާނެ ކަމަށެވެ. ހިރިމަރަދޫގައި 150 އަށް ވުރެ ގިނަ ގޯތި ދޫކޮށްފައިވެ އެވެ.
---
