ގަވާއިދާ ހިލާދަށް ރޮށި ފިހެ އޭގެ ވިޔަފާރި ކުރަމުންދިޔަ ބިދޭސީންތަކެއް ފުލުހުން އަތުލައިގެންފި އެވެ.
ސޯޝަލްމީޑިއާގައި ފުލުހުން ކުރި ޕޯސްޓެއްގައި ބުނީ އިމިގްރޭޝަނާ ގުޅިގެން އެ މުއައްސަސާއިން ކުރިއަށް ގެންދިޔަ އޮޕަރޭޝަނެއްގައި މާލޭގެ ދެ ތަނެއް ބަލައި ފާސްކޮށް 15 މީހަކު އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށެވެ.
އޭގެތެރެއިން އެއް ތަނަކީ އެއްވެސް ވިޔަފާރި ހުއްދައެއް ނެތި ރޮށި ފިހެ އޭގެ ވިޔަފާރި ކުރަމުންދިޔަ ތަނެއް ކަމަށް ފުލުހުން ބުންޏެވެ. އެ ތަނުގައި ގަވާއިދާ ހިލާފަށް ކުރަމުންދިޔަ އެ ވިޔަފާރި މިހާރު ހުއްޓުވާފައިވާ ކަމަށް ފުލުހުން ބުންޏެވެ.
އެ އޮޕަރޭޝަނުގައި ބަލައި ފާސްކުރި ދެވަނަ ތަނަކީ ގަވާއިދާ ހިލާފަށް ފިހާރައެއް ހިންގަމުންދިޔަ ތަނެއް ކަމަށް ފުލުހުން ބުންޏެވެ.
ގަވާއިދާ ހިލާފަށް ބިދޭސީން ވިޔަފާރިކުރާ ތަންތަން ބަލައި ފާސްކޮށް މިދިޔަ އަހަރު ވެސް ގިނަ އަދަދެއްގެ ތަންތަން ފުލުހުންނާއި އިމިގްރޭޝަނުން ވަނީ ބަންދުކޮށްފަ އެވެ. އަދި، އެ ތަންތަނުގައި މަސައްކަތް ކުރަމުންދިޔަ ބިދޭސީން އަތުލައިގަނެ އޭގެތެރެއިން ބަޔަކު ޑީޕޯޓު ވެސް ކުރި އެވެ.
