ސާފް ފުޓްސަލް ޗެމްޕިއަންޝިޕްގެ ފިރިހެން ޑިވިޝަނުގައި، ރާއްޖޭން ކުޅުނު ފުރަތަމަ މެޗުގައި ޕާކިސްތާން އަތުން ތަފާތު ބޮޑުކޮށް 7-1 އިން މޮޅުވެ، ވަރުގަދަކޮށް މުބާރާތް ފަށައިފި އެވެ.
ސާފްގެ ހަތް ގައުުމުން ވާދަކުރާ، މި ސަރަހައްދުގެ ފުރަތަމަ ފުޓްސަލް މުބާރާތުގައި ރާއްޖޭން ކުޅުނީ މިއަދުގެ ތިން ވަނަ މެޗުގަ އެވެ. ފުރަތަމަ މެޗުގައި ބޫޓާން އާއި ސްރީ ލަންކާ 3-3 އިން އެއްވަރުވިއިރު، ދެ ވަނަ މެޗުގައި، ބަންގްލަދޭޝް އާއި އިންޑިއާ ވަނީ 4-4 އިން އެއްވަރުވެފަ އެވެ.
ތައިލެންޑުގެ ނޮންތަބުރީ ސްޓޭޑިއަމްގައި ކުޅުނު މެޗު ފަށައިގެން ރާއްޖޭން ފުރަތަމަ ހަމަލާއެއް ފޮނުވާލީ އިޝާން އިބްރާހިމް (ސައްޓު) އެވެ. އޭނާ ފޮނުވާލި ބޯޅަ އަމާޒުވީ ގޯލުގެ ދަނޑިއަށެވެ. އޭގެ ފަހުން، އޭރިއާތެރެެއިން ލިބުނު ފުރުސަތަކުން ރަނގަޅު ތަނަށް އަރައި ހުރެ، އަހުމަދު ހަމީދު (އައްމަޑޭ) ވަނީ ރާއްޖެ އަށް ލީޑުނަގައިދީފަ އެވެ.
ކުރިއަށްޖެހިގެން ކުޅެ، އެޓޭކުގައި ގިނަ ވަގުތު ހޭދަކުރި ރާއްޖޭން ފުރަތަމަ ހާފުގައި އިތުރު ހަތަރު ގޯލު ޖެހި އެވެ. ލީޑުފުޅާކުރި ގޯލު އޭރިއާތެރެއިން ޕާކިސްތާން ކީޕަރު، މުހައްމަދު ތާހިރު އަތުން ދޫވި ބޯޅައެއް އަލީ ޝިޔާހު (ޝިޔަޅޭ) ވަނީ ގޯލަށް ވައްދާލައިފަ އެވެ. އެޓޭކުގައި ރަނގަޅު ކުޅުމެއް ދައްކައި، ރާއްޖޭގެ ތިން ވަނަ ލަނޑު ޖެހީ ޓީމުގެ ކެޕްޓަން، މުހައްމަދު އިމްރާން (އިންމި) އެވެ. އިންމި، ވަނީ ލިބުނު ފުރުސަތުގައި ގޯލުގެ ތިރީ ކަނަށް ބޯޅަ ފޮނުވާލައިފަ އެވެ.
ރާއްޖޭގެ ގޯލްކީޕަރު، ޒައިދާން އަހުމަދު (އަސޫ) ވަނީ ޕާކިސްތާންގެ ރަނގަޅު އެޓޭކެއް ހުއްޓުވައި، އެ ޓީމުން ޕަވަޕްލޭގައި ކުރިއަށް ޖެހިގެން ތިބި ވަގުތު ގޯލަށް ބޯޅަ ފޮނުވާލައި، ރާއްޖޭގެ ހަތަރު ވަނަ ލަނޑު ޖަހައިފަ އެެވެ. އަދި، ފުރަތަމަ ހާފުގެ ފަހު ވަގުތު ޕާކިސްތާންގެ ހަ ވަނަ ފައުލާ އެކު ލިބުނު ދުރު ޕެނަލްޓީއެއް ކާމިޔާބުކޮށް، އަލީ ޝަމާލް އަބްދުﷲ (ޝަންމު) ވަނީ ރާއްޖޭގެ ފަސް ވަނަ ލަނޑު ޖަހައިފަ އެވެ.
ދެ ވަނަ ހާފުގައި ކުޅުން ފަށައިގެން ވެސް ޕާކިސްތާނުން ގޯލެއް ޖަހަން، ޕަވަޕްލޭގައި ގިނަ ކުޅުންތެރިންތަކެއް ކުރިއަށް ފޮނުވައިގެން ކުޅެނިކޮށް، ލިބުނު ފުރުސަތެއްގައި، އިންމި ވަނީ އަމިއްލަ ހާފު ތެރޭގައި ހުރެ ގޯލަށް ބޯޅަ ފޮނުވާލައިގެން ރާއްޖޭގެ ހަ ވަނަ ގޯލު ޖަހައިފަ އެވެ.
ރާއްޖޭން ހަ ވަނަ ގޯލު ޖެހި ފަހުން، ޕާކިސްތާނުން ކޯނަރެއްގައި ތަނަވަސްވި ފުރުސަތެއްގައި، ނިސާރު ހުސެއިން، އޭރިއާބޭރުން ތިރިތިރިން ގޯލަށް ބޯޅަ ވައްދާލި އެވެ.
މި ހާފުގެ 13 ވަަނަ މިނިޓްގައި، ރާއްޖޭގެ ހަތް ވަނަ ލަނޑު ޖެހީ އަބްދުﷲ ޝާފިއު (ޝައްޕެ) އެވެ. ލިބުނު ފުރުސަތުގައި ޝާއްޕެ ވަނީ ހަަމަޖެހިލައިފައި ގޯލުގެ ތެރެއަށް ބޯޅަ ފޮނުވާލައިފަ އެވެ.
ސާފް ފުޓްސަލް ޗެމްޕިއަންޝިޕްގައި ރާއްޖޭގެ ގައުމީ ފިިރިހެން ފުޓްސަލް ޓީމުގެ، ދެ ވަަަނަ މެޗުގައި މި މަހު 16 ވަނަ ދުވަހު ބަންގްލަދޭޝާ ކުޅުމަށް ފަހު، ތިން ވަނަ މެޗުގައި މި މަހު 20 ވަނަ ދުވަހު، އިންޑިއާއާ ކުޅޭނެ އެވެ. އަދި، ހަތަރު ވަނަ މެޗުގައި މި މަހު 22 ވަނަ ދުވަހު ނޭޕާލާ ކުޅުމަށް ފަހު، ފަސް ވަނަ މެޗުގައި މި މަހު 24 ވަނަ ދުވަހު، ބޫޓާނާ ކުޅުމަށް ފަހު، މުބާރާތުގައި ރާއްޖޭން ފަހު މެޗުގައި، މި މަހު 26 ވަަނަ ދުވަހު ބައްދަލުކުރާނީ، ސްރީ ލަންކާއާ އެވެ.
