ރާއްޖޭގައި ފުޓްސަލް ރަނގަޅަށް ޑިވެލޮޕްކުރުމަށްޓަކައި، ގިނަ ޒުވާން ކުޅުންތެރިންތަކެއްގެ ހުނަރު ދައްކާލެވޭ ގޮތަށް އޮތް ގޯލްޑަން ފުޓްސަލް ޗެލެންޖް ފަދަ މުބާރާތްތައް މުހިންމު ކަމަށް ގައުމީ ފުޓްސަލް ޓީމުގެ ކޯޗު، އުޒްބެކިސްތާންގެ ފާރޫކް ޒަކީރޯވް ބުނެފި އެވެ.
އުޒްބެކިސްތާންގެ ގައުމީ ފުޓްސަލް ޓީމަށް ކުޅެ، ކޯޗިންގައި ވެސް ގިނަ މަސައްކަތްތަކެއް ކޮށްފައިވާ ކޯޗު، ފާރޫކް މިދިޔަ ޑިސެމްބަރު މަހު ފުރަތަމަ ހަފްތާ އިން ފެށިގެން ގައުމީ ޓީމުގެ ޕްރެކްޓިސްތައް ފެށީ ރެހެންދި ފުޓްސަލް ދަނޑުތަކުގަ އެވެ. އަދި، މި މަހު ކުރީކޮޅުގައި، ޗައިނާގައި ޓްރެެއިނިން ކޭމްޕެއް އިންޑޯގައި ކުރިއަށްގެންދިޔައިރު، ޗައިނާ ގައުމީ ޓީމާ ތިން މެޗެއް ކުޅުނެވެ. އަދި، ތައިލެންޑަށް ގޮސް، ސާފް ފުޓްސަލް ޗެމްޕިއަންޝިޕްގައި ކުޅުނު ހަ މެޗުން ވެސް މޮޅުވެ، ސައްތަ އިން ސައްތަ ރެކޯޑަކާ އެކު، ފުރަތަމަ ފަހަރަށް ބޭއްވި ސާފްގެ ފުޓްސަލް މުބާރާތް ކާމިޔާބުކުރި އެވެ.
ސާފް ފުޓްސަލް މުބާރާތުގެ ކާމިޔާބީ އަށް ފަހު، ގައުމީ ޓީމުގައި ހިމެނުނު ކުޅުންތެރިން ރޭ ވަނީ އެ ކުޅުންތެރިން ނިސްބަތްވާ ރަށު ޓީމުތަކަށް ކުޅެން ފަށައިފަ އެވެ. ގޯލްޑަން ފުޓްސަލް އެސޯސިއޭޝަނުން ކޮންމެ ކުޅުންތެރިއަކަށް ހަނދާނީ ފިލައެއް ދޭއިރު، ޓީމުގެ ކޯޗިން ސްޓާފުންނަށް ވެސް، ކާމިޔާބީގެ އަގުވަޒަންކުރުމުގެ ފިލައެއް އެރުވި އެވެ.
ގައުމީ ފުޓްސަލް ކޯޗު، ފާރޫކް ވެސް ވަނީ ރޭގެ މެޗުތަކަށް އައިސް މެޗުތައް ބަަލައިފަ އެވެ.
ގައުމީ ކޯޗު ފާރޫކް (މ) އާއި ގޯލްޑަން ފުޓްސަލް އެސޯސިއޭޝަންގެ ރައީސް ރިލްވާން (ކ) އަދި ޖެނެރަލް ސެކްރެޓަރީ ޝަހީމް---- ފޮޓޯ: އަދަދު ސްޕޯޓްސް / އިމޭޖަސް.އެމްވީ
"އަހަރެން ފުރަތަމަ ފަހަރަށް މި މުބާރާތް މި ބަލާލީ، ގޯލްޑަން ފުޓްސަލް ޗެލެންޖް. އަހަންނަށް ފެންނަ ގޮތުގައި، މިއީ ވަރަށް މުހިންމު މުބާރާތެއް ގޮތަށް ފެންނަނީ. ގިނަ ޓީމުތަކެއް އެބަކުޅޭ، މިއީ ވަރަށް ބޮޑު ފުރުސަތެއް އަހަންނަށް އިވިފައި އޮތްގޮތުގައި، ޒުވާން ކުޅުންތެރިންނަށް އޮފީސްތަކުން ވަޒީފާ ހޯދަން ވެސް. އަހަންނަށް ފެންނަ ގޮތުގައި ރާއްޖޭގެ ފުޓްސަލް ޑިވެލޮޕްކުރަން މި މުބާރާތް މުހިންމު،" ގޯލްޑަން ފުޓްސަލް އެސޯސިއޭޝަނަށް ދިން އިންޓަވިއުއެއްގައި ޒަކީރޯވް ބުންޏެވެ.
"އަހަންނަށް ފެންނަ ގޮތުގައި، މި މުބާރާތުން ވެސް ފުޓްސަލް ޑިވެލޮޕްކުރެވޭނެ. އެއީ، ހުރިހާ ކުޅުންތެރިންގެ ފުޓްސަލްގެ ވިސްނުން ރަނގަޅުކުރެވޭނެ މި މުބާރާތުގެ ތެރެއިން ކުރިއަށްދާން. ރަނގަޅު ފެސިލިޓީސް (އިންޑޯ ޕިޗެއް) އޮވެއްޖެނަމަ މި ކަހަލަ މުބާރާތްތަކުން ވަރަށް ޑިވެލޮޕްކުރެވޭނެ ފުޓްސަލް،"
ރާއްޖޭގެ ފުޓްސަލްގެ ކުރިމަގަށް ޓަކައި، 2015 ވަނަ އަހަރު ގޯލްޑަން ފުޓްސަލް އެސޯސިއޭޝަނުން ފެށި، ގޯލްޑަން ފުޓްސަލް ޗެލެންޖު ބާއްވާ މިއީ 10 ވަނަ ފަަހަރެވެ. މި ފަހަރު ސާފް ފުޓްސަލް ޗެލެންޖު ކާމިޔާބުކުރި ގައުމީ ފުޓްސަލް ޓީމުގައި ހިމެނުނު ކޮންމެ ކުޅުންތެރިއަކީ ވެސް ގޯލްޑަން ފުޓްސަލް ޗެލެންޖުގެ ގިނަ މުބާރާތްތަކެއް ކުޅެފައިވާ ކުޅުންތެރިންނެވެ.
