ސައިކަލު ވިއްކާ ކަމަށް ބުނެ ގިނަ އަދަދެއްގެ ބައެއްގެ އަތުން ފައިސާ ނަގަމުންދިޔަ ކިންގްސްޓަން މޯލްޑިވްސްގެ ޝޯ ރޫމުގައި ޑިސްޕްލޭ ކުރަން ދިން ސައިކަލުތަކެއް ވިއްކާލުމަށްފަހު ވެރިފަރާތާ ފައިސާ ހަވާލުނުކޮށް އުޅޭ މައްސަލައެއް ފެންމަތިވެއްޖެ އެވެ.
ކިންގްސްޓަންގެ ޝޯ ރޫމުގައި ޑިސްޕްލޭ ކުރަން ސައިކަލުތަކެއް ލޯނަށް ދިނީ ވީ މޮޓާސް ކިޔާ ކުންފުންޏަކުންނެވެ. ހުއްދަނެތި އެ ސައިކަލުތައް ވިއްކުމަށްފަހު ކިންގްސްޓަން އިން 1.2 މިލިއަން ރުފިޔާ ހޯދި އެވެ. އެކަމަކު އެ ފައިސާ ވީ މޮޓާސްއާ ހަވާލެއް ނުކުރެ އެވެ.
އެ މައްސަލައިގައި މިދިޔަ ބުރާސްފަތި ދުވަހު ސިވިލް ކޯޓުން ވަނީ ހުކުމެއްކޮށްފަ އެވެ. ކޯޓުން ހުކުމް ކުރީ އެ ފައިސާ އެއް ފަހަރާ ދައްކައި ހަލާސް ކުރުމަށެވެ. އެކަމަކު، ކިންގްސްޓަން ކުންފުނި އަދި ކުންފުނީގެ ހިއްސާދާރު ދ. ބަނޑިދޫ، ޕޯލާގްރޭސް، އަހުމަދު އާތިފް ހަސަން ކޯޓަށް ހާޒިރުނުވާތީ ހުކުމް ކުރީ ޣައިރު ހާޒިރުގަ އެވެ.
މީގެ ކުރިން، އިސްލާމިކް ބޭންކް މެދުވެރިކޮށް އާންމުންގެ ބަޔަކު ސައިކަލުތަކެއް ނަގަން އެދުމުން ވެސް ކިންގްސްޓަން އިން ވަނީ މަކަރު ހަދައިފަ އެވެ. އެ މައްސަލައިގައި ވެސް ކޯޓުން ވަނީ މިލިއަނަކަށްވުރެ ގިނަ ރުފިޔާ ބޭންކަށް ދައްކަން ކިންގްސްޓަންގެ މައްޗަށް ހުކުމެއްކޮށްފަ އެވެ.
ކިންގްސްޓަން އިން ލަނޑުދިން މީހުންގެ އަދަދު 100 އާ ގާތްކުރާނެ ކަމަށް ބެލެވެ އެވެ. އެ ކުންފުނީގެ ފަރާތުން ލަނޑު ލިބުނު މީހުންގެ މައުލޫމާތު ވެސް މީގެ ކުރިން ފުލުހުން އެއްކުރި އެވެ.
