ބްރުސެލްސް، ބެލްޖިއަމް (އޮގަސްޓް 10) - ފުޓްބޯޅަ ކެރިއަރުގެ އެކި ހިސާބުތަކުގައި އަބަދުވެސް ޕީއެސްޖީގެ އޮފާތައް ލިބުނު ކަމަށް ބެލްޖިއަމްގެ ލެޖެންޑަރީ ކުޅުންތެރިޔާ، އެޑެން ހަޒާޑް ބުނެފި އެވެ.
ތަކުރާރުކޮށް ކުރިމަތިވަމުން އައި އަނިޔާގެ މައްސަލަތަކާ ހެދި، ހަޒާޑް، 34 ވަނީ 2023 ވަނަ އަހަރުގެ އޮކްޓޫބަރު މަހު، ފުޓްބޯޅަ ކުޅުން ހުއްޓާލައިފަ އެވެ.
ސައުދީ އަރަބިއްޔާ އާއި އެމެެރިކާ އަދި އިނގިރޭސި ޕްރިމިއާ ލީގުގެ ކްލަބްތަކުން ވެސް ހަޒާޑަށް ހުށަހެޅުންތައް ލިބިފައި ހުއްޓައި ކުޅުމުން ރިޓަޔާކުރަން ހަޒާޑް ނިންމީ، ހަމައެކަނި ފައިސާ އަށް ކުޅުމުގެ ބަދަލުގައި، ހަށިގަނޑަށް ވެސް ވިސްނައިގެން އުމުރުގައި ކުރިއަށް ދިއުމަށް ކަމަށް ބުނެފައިވެ އެވެ.
ޗެލްސީ އާއި ރެއާލް މެޑްރިޑަށް ކުޅުނު ހަޒާޑް އަންނަނީ ޔޫތު ޓީމުތަކުގައި ކޯޗިންގެ މަސައްކަތްތަކެއް ކުރަމުންނެވެ.
ޓްވިޗްގެ ޝޯއެއްގައި ވާހަކަ ދައްކަމުން ހަޒާޑް ބުނީ، ޕީއެސްޖީގެ ރައީސް ނާސިރު އަލް ހަލީފާއާ އެކު އަބަދުވެސް ވަރަށް ގާތް ގުޅުމެއް އޮންނަ ކަމަށެވެ.
"އަހަރެން ލިލް އަށް ކުޅުނު ފަހު އަހަރުގައި، ޕީއެސްޖީއާ އެކު މެޗެއް ކުޅެން ޕެރިހަށް ދިޔައިން. ވަރަށް ގަޔާވެސް ވޭ ޕެރިސް އަށް. އެކަމަކު، އަހަރެން އެއްވެސް އިރެއްގައި އެނބުރި ފްރެންޗް ލީގަށް ދިއުމަށް ނުވިސްނަން. ލިލްއާ ދެކޮޅަށް އަހަރެން ކުޅެން ބޭނުމެއް ނުވީ،" 2007 އިން 2012 އަށް ޔޫތު ކެރިއަރުން ފެށިގެން ސީނިއާ ފުޓްބޯޅައިގެ ފުރަތަމަ އަަހަރުތައް ލިލްގައި ހޭދަކުރި އިރާ ބެހޭގޮތުން ހަޒާޑް ބުންޏެވެ.
އޭނާ ބުނީ، ކެރިއަރުގެ އެކި ހިސާބުތަކުގައި ވެސް ޕީއެސްޖީގެ އޮފާތައް ލިބުނު ނަމަވެސް، ލިލް އަށް އޮތް އިހުތިރާމެއްގެ ސަބަބުން އެ ޓްރާންސްފާ ކުރިއަށްނުދިޔައީ ކަމަށެވެ.
ލިލް އިން ވަނީ މީގެ އެއް އަހަރު ކުރިން، އެ ކްލަބްގެ އާ ޓްރެއިނިން ސެންޓަރު ހުޅުވިއިރު، ހަޒާޑްގެ ނަމުން ނަން ދީފަ އެވެ.
