މޯލްޑިވްސް އިންޓަނޭޝަނަލް މާސްޓާސް ޓޭބަލް ޓެނިސް (ޓީޓީ) މުބާރާތް އަންނަ އަހަރު ވ. ކެޔޮދޫގައި ބާއްވަން ނިންމައި، މުބާރާތް ލޯންޗްކޮށްފި އެވެ.'
އެ ގޮތުން، މާސްޓާސް ކެޓަގަރީ އަށް އަމާޒުކޮށްގެން ބާއްވާ، " މޯލްޑިވްސް އިންޓަނޭޝަނަލް މާސްޓާސް ޓޭބަލް ޓެނިސް މުބާރާތް 2027" އަންނަ އަހަރު ކެޔޮދޫގައި ކުރިއަށްދާނީ އަންނަ އަހަރުގެ ސެޕްޓެމްބަރު، 1-5 އަށެވެ.
މާސްޓާސް ކެޓަގަރީ އަށް އަމާޒުކޮށް ރާއްޖޭގައި އެންމެ ފުރަތަމަ ބޭއްވި ޓޭބަލް ޓެނިސް މުބާރާތް މިދިޔަ އަހަރު ކުރިއަށްގެންދިޔައީ، އއ. ތޮއްޑޫގަ އެވެ. ފުރަތަމަ މުބާރާތުގެ ކާމިޔާބީއާ އެކު، ދެ ވަަނަ މުބާރާތް ކުރިއަށްގެންދަން ނިންމައި، ކެޔޮދޫގައި މުބާރާތް ހޯސްޓް ކުރަން ނިންމީ އެވެ.
މޯލްޑިވްސް އިންޓަރނޭޝަނަލް މާސްޓާރސް ޓޭބަލް ޓެނިސް މުބާރާތް އަންނަ އަހަރު ކެޔޮދޫގައި ކުރިއަށްގެންދާނެކަން އިއުލާންކުރެއްވީ އެ ކަމަށް ބޭއްވި ހާއްސަ ރަސްމިއްޔާތެއްގައި ވ. ކެޔޮދޫ ކައުންސިލްގެ ރައީސް، އަހްމަދު ޔޫސުފް އެވެ.
މި މުބާރާތަކީ އިހާ ޓޭބަލް ޓެނިސް އެކަޑަމީ އާއި ވ. ކެޔޮދޫ ކައުންސިލްއާ ގުޅިގެން ބާއްވާ މުބާރާތެކެވެ. މި މުބާރާތާ ބެހޭ މައުލޫމާތު ހިއްސާކުރަމުން، އިހާ ޓޭބަލް ޓެނިސް އެކަޑަމީ އިން ބުނެފައިވަނީ، މި މުބާރާތުގެ ސަބަބުން، ރާއްޖޭއަށް ޓޭބަލް ޓެނިސްގެ ރޮނގުން ލިބޭނެ ކުރިއެރުމާއި ވ. ކެޔޮދޫ އަށް ލިބޭނެ ފައިދާތަައް ބޮޑު ކަމަށެވެ.
އަންނަ އަހަރު ކެޔޮދޫގައި މުބާރާތް ކުރިއަށްގެންދާނެކަން އިއުލާނުކުރުމަށް ފަހު، މުބާރާތް. ލޯންޗުކޮށްދެއްވީ ރައްޔިތުންގެ މަޖިލީހުގެ ކެޔޮދޫ ދާއިރާގެ މެމްބަރު ނިއުޝާދު މުޙައްމަދު އެވެ.
މި މުބާރާތަކީ 40 އަހަރުން މަތީގެ އުމުރުފުރާތަކަށް ޚާއްސަކޮށްފައިވާ މުބާރާތެކެވެ. މި މުބާރާތުގެ ތޮއްޑޫގައި ބޭއްވި ފުރަތަމަ އެޑިޝަންގައި 10 ގައުމަކުން 85 މާސްޓާސް ކުޅުންތެރިން ބައިވެރިވެފައިވާއިރު، 2027ގައި ބާއްވާ މުބާރާތުގެ އާމާޒަކަށް ކަނޑައަޅާފައިވަނީ، 120 ކުޅުންތެރިންނަށެވެ.
ކެޔޮދޫގައި މާސްޓާސް ޓޭބަލް ޓެނިހުގެ އިންޓަނޭޝަނަލް މުބާރާތެއް ބޭއްވިގެންދިއުމަކީ، ރާއްޖެ އަށް ސްޕޯޓްސް ޓޫރިޒަމްގެ ތެރެއިން އިތުރު ފުރުސަތުތައް ފަހިވުމުގެ އިތުރުން، ކެޔޮދޫގެ ގެސްޓްހައުސްތަކަށް އޭގެ ސަބަބުން ގިނަ ގިނަ ފައިދާތަކެއް ކުރާނެ ކަމެއްގެ ގޮތުގައި، އެ ރަށު ގެސްޓްހައުސް ހިންގާ ފަރާތްތަކުން ފާހަގަކުރެ އެވެ.
