ގައުމީ ފުޓްސަލް ޓީމާއި 17 އަހަރުން ދަށުގެ ގައުމީ ފުޓްބޯޅަ ޓީމަށް ކޯޗަކު ހޯދުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އިއުލާނުކޮށްފި އެވެ.
އެފްއޭއެމް އިން އިއްޔެ ކޮށްފައިވާ އިއުލާނުގައި، ގައުމީ ފުޓްސަލް ޓީމުގެ ކޯޗުކަމަށް ކުރިމަތިލާން ހުޅުވާލައިފައިވާއިރު، އެ މަގާމަށް އެޕްލިކޭޝަން ހުށަހެޅުމަށް، ޝަރުތުތަކެއް ވެސް ހިމަނައިފަ އެވެ. އެ ގޮތުން، މަދުވެގެން އޭއެފްސީ ފުޓްސަލް ލެވަލް 2 ކޯޗިން ސެޓްފިކެޓެއް ހާސިލްކޮށްފައިވުމާއި ތަޖުރިބާގެ އަލީގައި ރާއްޖޭގެ ކްލަބް ލެވަލާއި ގައުމީ ލެވަލްގައި އެންމެ މަތީ ފަންތީގައި މަސައްކަތް ކުރުން ހިމެނެ އެވެ.
ޝައުގުވެރިވާ ފަރާތްތަކުން، މި މަހު 11 ވަނަ ދުވަހުގެ 14:00 ގެ ކުރިން، އެޕްލިކޭޝަން ހުށަހެޅުމަށް، hr@famaldives.com މެއިލް ކުރަން އެފްއޭއެމް އިން އެެދިފައިވެ އެވެ.
މިދިޔަ އަހަރުތަކުގައި ގައުމީ ފުޓްސަލް ޓީމުން ބައިނަލްއަގުވާމީ މުބާރާތްތަކުގައި ކުޅެފައިވަނީ، ކޯޗު އަބްދުﷲ ނަސީރު (އަބޯ)ގެ އިރުޝާދުގެ ދަށުންނެވެ. އެފްއޭއެމް އިން ފުޓްސަލް ކޯޗަކު ހޯދަން ކުރި އިއުލާނުގައި، ކޯޗަށް ދޭނެ ކޮންޓްރެކްޓްގެ މުއްދަތު ހިމަނައިފައިނުވެ އެވެ.
މި ފަހަރު ގައުމީ ފުޓްސަލް ޓީމު ކޯޗަކު ނެގުމަށް އިއުލާނުކޮށްފައި މި ވަނީ އަންނަ މަހު، އޭއެފްސީ ފުޓްސަލް އޭޝިއަން ކަޕް ކޮލިފައިން އޮތުމުންނެވެ. މިޔަންމާގައި ކުޅޭ ކޮލިފައިންގައި، ރާއްޖެ ހިމެނެނީ، މިޔަންމާ އާއި އަފްގާނިސްތާނާ އެއް ގްރޫޕެއްގަ އެވެ.
ސަތާރަ އަހަރުން ދަށުގެ ގައުމީ ޓީމުގެ ކޯޗަކަށް ކުރިމަތިލުމުގެ ކޮލިފިކޭޝަނުގެ ޝަރުތުތަކަށް ބަލާއިރު، އޭއެފްސީ އޭ ކޯޗިން ސެޓްފިކެޓް ހާސިލްކޮށްފައިވުމާއި، 5-10 އަހަރުގެ ކޯޗިން ތަޖުރިބާ ލިބިފައިވުން ހިމެނެ އެވެ. އަދި، ކޯޗިން ތަޖުރިބާ ތެރޭގައި، ޔޫތު ލެވަލް އާއި ކްލަބް ލެވަލް ކޯޗިން ވެސް ހިމެނޭއިރު، 17 އަހަރުން ދަށުގެ ކުޅުންތެރިންގެ ހުނަރު ދެނެގަތުމަށް، ސްކައުޓިންގެ ކަންކަމަށް އަހުލުވެރި ކޯޗަކަށް ވުން ވެސް ހިމެނެ އެވެ.
ގިނަ ޒިންމާތަކެއް ހިމެނޭ 17 އަހަރުން ދަށުގެ ގައުމީ ޓީމުގެ ކޯޗުކަމަށް، ޝައުގުވެރިވާ ފަރާތްތަކުން، މި މަހު 11 ވަނަ ދުވަހުގެ 14:00 ގެ ކުރިން، އެޕްލިކޭޝަން ހުށަހެޅުމަށް، hr@famaldives.com މެއިލް ކުރަން އެފްއޭއެމް އިން އެެދިފައިވެ އެވެ.
