ތ. ތިމަރަފުށީގައި މިހާރު ކުރިއަށްދާ އޮޑި ސްޓްރީޓް ސޮކާ މުބާރާތުގެ ކުއާޓާ ފައިނަލްގެ ޖާގަތައް ވަނީ ޔަގީންވެއްޖެ އެވެ.
ޖުމްލަ 12 ޓީމާ އެކު ފެށި މި މުބާރާތުގެ ގްރޫޕް ސްޓޭޖުން ކަޓާފައި ވަނީ ހަތަރު ޓީމެކެވެ.
ގްރޫޕް އެއް ވަނަ ޓީމުގެ ގޮތުގައި ކުއާޓާ ފައިނަލަށް ދަތުރުކުރީ، ފަޅުމަސް ސްޕޯޓްސް ކްލަބް، ޓީވައިޕީ އަދި ޓައިމްސް އެވެ.
ގްރޫޕްގެ ދެ ވަަނަ ޓީމުގެ ގޮތުގައި، ކަންމަތި ސްޕޯޓްސް ކްލަބާއި ގަލްފް ސްޕޯޓްސް ކްލަބް އަދި ބާއިންޖީނުން ކުއާޓާގެ ޖާގަ ހޯދިއިރު، އެންމެ ރަނގަޅު ނަތީޖާ ނެރުނު ތިން ވަނަ އަށް ދިޔަ ޓީމުގެ ދެ ޖާގައިގައި، ގަދަ އަށް ޓީމު ތެރޭގައި ހިމެނުނީ، ދެކުނު އެފްސީ އާއި ފަޅުމަސް އެވެ.
ތިމަރަފުށީގައި މީގެ 10 އަހަރު ކުރިން އަޅާފައިވާ މެޓް ދަނޑުގައި ކުރިއަށްދާ މި މުބާރާތުގައި މިރޭ ކުޅޭނީ ކުއާޓާ ފައިނަލް މެޗުތަކެވެ. އެ ގޮތުން ކުއާޓާ ފައިނަލުގައި، ފަޅުމަސް ސްޕޯޓްސް ކްލަބުން ފަޅުމަސްއާ ކުޅޭއިރު، ޓީވައިޕީ ކުޅޭނީ ދެކުނު އެސްސީއާ އެވެ. ޓައިމްސް އާއި ގަލްފް ސްޕޯޓްސް ކްލަބް ކުޅޭއިރު، ކަންމަތިން ނުކުންނާނީ ބާއިންޖީނާ ދެކޮޅަށެވެ.
މުބާރާތުގެ ފައިނަލް މެޗު ކުޅެން ހަމަޖެހިފައިވަނީ މި މަހުގެ 26 ވަނަ ދުވަހު އެވެ. ސެމީ ފައިނަލް މެޗުތައް މާދަމާރޭ ކުޅޭނެ އެވެ.
ތިމަރަފުށި އަކީ ރާއްޖޭގައި ފުޓްސަލްގެ އެންމެ ކާމިޔާބު ރަށެވެ. އެ ރަށުން ވަނީ ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް ތިން ފަހަރު ކާމިޔާބު ކޮށްފަ އެވެ. އެއާއެކު އެ ރަށް ވެގެން ގޮސްފައިވަނީ މި މުބާރާތް އެންމެ ގިނަ ފަހަރު ކާމިޔާބު ކުރުމުގެ ޝަރަފު އޮތް ރަށެވެ.
