މާލެ ސިޓީގެ މަގުމަތީގައި ވީއްލިގެން އުޅޭ ބުޅާތައް މަރާކަމުގެ ޝަކުވާ ލިބޭތީ އެކަން އެގޮތަށް ނުކުރަން އެގްރިކަލްޗާ އެންޑް އެނިމަލް ވެލްފެއާ މިނިސްޓްރީން އިލްތިމާސްކޮށްފި އެވެ.
މިނިސްޓްރީން ނެރުނު ސާކިއުލާއެއްގައި ބުނީ ބުޅާތަކަށް ބައެއް މީހުން ގޯނާކޮށް، ހާނިއްކަކުރުމުގެ އިތުރުން އެ ސޮރުމެން މަރާކަމުގެ ޝަކުވާތައް ލިބެމުންދާ ކަމަށެވެ.
"މިހާރަކަށް އައިސް މާލެ ސިޓީގެ މަގުމަތީގައި ވީއްލިގެން އުޅޭ ބުޅާތަކަށް ބައެއް ފަރާތްތަކުން ގޯނާކޮށް، ހާނިއްކަކުރުމުގެ އިތުރު އެސޮރުމެން މަރާކަމުގެ ޝަކުވާތައް މި މިނިސްޓްރީއަށް ލިބެމުންދޭ. މިއީ ޖަނަވާރުގެ ދުޅަހެޔޮކަމުގެ މިންގަނޑުތަކާ ހިލާފު އަމަލުތަކަށްވާތީ، މިކަން ނުކުރުމަށް މި މިނިސްޓްރީން އިލްތިމާސްކުރަން،" މިނިސްޓްރީން ނެރުނު ސާކިއުލާގައި ބުންޏެވެ.
މިނިސްޓްރީން ބުނީ ޖަނަވާރުންނަށް ލިބިގެންވާ މިނިވަންކަމުގެ ތެރޭގައި ހައިހޫނުކަމާއި، ކަރުހިއްކުމާއި، ކާޑުބަލިން މިންޖުވުމުގެ މިނިވަންކަމާއި ބިރުގަތުމާއި ހާސްވުމާއި ކަންބޮޑުވުމުން މިންޖުވުމުގެ މިނިވަންކަމާއި ޖިސްމާނީ ގޮތުން އަރާމުނުލިބުމުން މިންޖުވުމުގެ މިނިވަންކަމާއި ވޭނާއި ހާނިއްކައާއި ބަލިން މިންޖުވުމުގެ މިނިވަންކަމުގެ އިތުރުން އާވެގެން ޖަނަވާރު އުޅޭ އުޅުމަށް އެޅޭ ހުރަސްތަކުން މިންޖުވުމުގެ މިނިވަންކަން ލިބޭ ކަމަށެވެ.
ރާއްޖެއިން ބައިވެރިވެފައިވާ ދުނިޔޭގެ ޖަނަވާރުގެ ސިއްހަތާބެހޭ ޖަމިއްޔާގެ އެނިމަލް ހެލްތު ކޯޑުގައި ޖަނަވާރުގެ ދުޅަހެޔޮކަމަށް ހާއްސަ އަހައްމިއްޔަތުކަމެއް ދީފައިވާކަން ފާހަގަކޮށް މިނިސްޓްރީން ބުނީ ދަނޑުވެރިކަމަށާއި މުނިފޫހިފިލުވުމަށާއި އެ ނޫން ވެސް ބޭނުންތަކަށް ޖަނަވާރު ގެންގުޅުމުގައި ދުޅަހެޔޮކަން ކަށަވަރުކުރަން ޖެހޭ ކަމަށެވެ.
މީގެއިތުރުން އޮޅުކޮށް އެކުގައި ގެންގުޅޭ ޖަނަވާރަކީ ވަކި ބާވަތެއްގެ ކާނާދީގެން އާދަވެގެން ޖަނަވާރު އޫލުމުގެ ސުލޫކު ވަކި ގޮތަކަށް ބައްޓަން ކޮށްގެން އަޅައިލުމާއި ލޯބި ދީގެން ހޭހަންކޮށްގެން ގެންގުޅޭ އެއްޗަކަށްވާތީ މަގުމައްޗަށް ދޫކޮށްލުމުން އެ ސޮރުމެންނަށް ލިބެމުންދިޔަ އަޅައިލުމާއި ލޯބިން މަހުރޫމްވާ ކަމަށް މިނިސްޓްރީން ބުންޏެވެ.
"މީގެ ނަތީޖާއަކަށްވަނީ ކަންބޮޑުވުމާއި ހިތްދަތިކަން އިހުސާސްކުރަން ޖެހުމުގެ އިތުރުން އާދަވެގެން ކަމުންދިޔަ ކާނާ ނުލިބުމާއި އުޅެމުންދިޔަ އަމާން އަރާމު ވެށި ގެއްލުމުގެ ސަބަބުން އިންސާނުންނާ ދޯޅުވެ، ގާތުގައި އުޅުން،" މިނިސްޓްރީން ބުންޏެވެ.
"މިފަދަ ޖަނަވާރަކީ އިންސާނުންނާއެކު އެމީހުންގެ ވެށީގައި ދިރިއުޅޭ، ބުއްދިއެއްނުވާ އެއްޗަކަށްވާތީ ވަރަށް ގިނަ ފަހަރު އެސޮރުމެންގެ ކިބައިން އިންސާނުންނަށް އުނދަގޫތައް ކުރިމަތިވުމަކީ އެކަށީގެންވާ ކަމެއް. މިފަދަ ހާލަތްތަކުގައި އެސޮރުމެންނަށް ހާނިއްކަކުރުމަކީ އިންސާނިއްޔަތުކަމުގެ ގޮތުން ބަލާއިރު ކޮށްގެން ވާނެ ކަމެއް ނޫން."
މިނިސްޓްރީން ބުނީ ދުނިޔެއަކީ އިންސާނުންނާއި ޖަނަވާރުންނަށް ވެސް އުޅެން އޮތް ތަނަކަށްވާއިރު ހުރިހާ ޖަނަވާރަކަށް ވެސް ރައްކާތެރި، ރަނގަޅު ތަނަކަށް ހެދުމަށް ބައިނަލްއަގުވާމީ ފެންވަރުގައި ބާރު އަޅާ ކަމަށެވެ.
މިގޮތުން މާލެ ސިޓީގެ މަގުމަތީގައި ވީއްލިގެން އުޅޭ ބުޅާތަކަށް ރައްކާތެރި މާހައުލެއް ހޯދައިދޭން ހުޅުމާލެ ފޭސް 2 ގައި ގާއިމުކޮށްފައިވާ އޮޅުހިޔާއަށް އިތުރަށް ބުޅާ ވެއްދުމަށް މަސައްކަތް ކުރަމުންދާ ކަމަށް މިނިސްޓްރީން ބުންޏެވެ.
މާލެއިން ބުޅާ ގެއްލޭކަން ފާހަގަވީ މިދިޔަ މެއި މަހުގެ ތެރޭގައި ކަމަށް، މާލޭގައި ދިރިއުޅޭ ބުޅާތަކުގެ ހާލު ބަލާ ޖަމިއްޔާއެއް ކަމަށްވާ ފީލައިން ވެލްފެއާ އޮގަނައިޒޭޝަންގެ ރައީސް އަހުމަދު ވިޝަން އަދަދު އާ ވާހަކަ ދައްކަވަމުން މިދިޔަ މަހު ވިދާޅުވި އެވެ.
މާލޭގެ މަގުތަކުގައި 1500 އަށް ވުރެ ގިނަ ބުޅާ ދިރިއުޅޭ ކަމަށް ވިޝަން ލަފާ ކުރައްވަ އެވެ. އޭގެ ތެރެއިން 300 އެއްހާ ބުޅާ ފާއިތުވި ދެ މަހެއްހާ ދުވަހުގެ ތެރޭގައި ގެއްލިފައިވާ ކަމަށް އޭނާ މިދިޔަ މަހު ލަފާ ކުރެއްވި އެވެ.
މާލޭގައި އުޅެމުން ދިޔަ ބުޅާތަކުގެ ތެރެއިން އެތައް ސަތޭކަ ބުޅަލެއް ވީނުވީއެއް ނޭނގި މަދުވެފައިވާ މައްސަލައާ ގުޅިގެން މޭޔަރު އާޒިމް އެކްސްގައި ކުރެއްވި ޕޯސްޓެއްގައި ވިދާޅުވީ ހުޅުމާލޭގައި އެޅި ބުޅާ ފެސިލިޓީ މި ސަރުކާރުން ގަދަކަމުން އަތުލުމަށްފަހު އެތަނަށް ގެންގޮސްގެން ބަލަހައްޓަމުން ގެންދަނީ ގޭގޭގައި ގެންގުޅޭ އޮޅު ބުޅާތައް ކަމަށް މައުލޫމާތު ލިބިފައިވާ ކަމަށެވެ.
