ބަނގުރަލުގެ ވިޔަފާރި ކުރާ ކަމަށް ފުލުހުންގެ ކައުންޓާ ނާކޮޓިކްސް އިންޓެލިޖެންސަށް ލިބުނު މައުލޫމާތަކާ ގުޅިގެން މާލޭގައި ހިންގި އޮޕަރޭޝަނެއްގައި ތިން މީހަކު ހައްޔަރުކޮށްފި އެވެ.
މި މައްސަލައިގައި ހައްޔަރުކުރީ އިންޑިއާ ތިން މީހުންނެވެ. އެ ތިން މީހުންނަކީ ސަހަޔާ އަޖިން ފްރެންޗިސް، 27، އާއި ކަރުއްޕިއަހް ސުއްބައިއާ، 52، އާއި ސައުތަރާ ރަޖަން އަނަންޗާ ޕެރުމަލް، 49، އެވެ.
ފުލުހުން ބުނީ މި އޮޕަރޭޝަން ހިންގީ ހޯމަ ދުވަހު ކަމަށެވެ. އެ އޮޕަރޭޝަނުގެ ތެރެއިން، މަގުމަތިން މި ތިން މީހުން ހުއްޓުވައި، ބަލައި ފާސްކުރިއިރު ތިން ފުޅި ބަނގުރަލާއި ބަންގުރާ ކަމަށް ޝައްކުކުރެވޭ އެއްޗެއް ހުރި 500 އެމްއެލްގެ 30 ފުޅި އާއި ބަނގުރާކަމަށް ޝައްކުކުރެވޭ އެއްޗެއް ހުރި ފަސް ލީޓަރުގެ ތިން ފުޅި ފެނުނެވެ.
ފުލުހުން ވަނީ މި މައްސަލައިގައި ހައްޔަރުކުރި ތިން މީހުން ޑީޕޯޓުކުރަން އިމިގްރޭޝަނާ ހަވާލުކޮށްފަ އެވެ. ނަމަވެސް އެ މައްސަލަ ތަހުގީގުކުރަމުން އަންނަ ކަމަށް ފުލުހުން ބުންޏެވެ.
