ކުށެއްގެ ތުހުމަތުގައި ހައްޔަރު ކޮށްފައި ހުންނަ މީހެއްގެ ބަންދުގެ މުއްދަތު، އެމީހަކަށް ލިބޭ އަދަބުގެ މުއްދަތަށްވުރެ ދިގުވާނެ ކަމަށް ބެލެވޭ ހާލަތުގައި މީގެ ކުރިން ވެސް ބަންދުން ދޫކޮށްލަން ޕްރޮސެކިއުޓާ ޖެނެރަލްގެ އޮފީހުން ލަފާ ދީފައިވާނެ ކަމަށް ޕީޖީ އޮފީހުގެ ތަރުޖަމާނު، އަހުމަދު ޝަފީއު ވިދާޅުވެއްޖެ އެވެ.
ޝަފީއު އެހެން ވިދާޅުވީ މިދިޔަ މަހުގެ 18، ގައި ހ. ފެންޓެނޯއީ ގޭގެ ނުވަވަނަ ފަންގިފިލާއިން ހައްވާ ޔުމްނު ރަޝީދު، 21، ވެއްޓުނު ހާދިސާގެ ތަހުގީގަށް ހައްޔަރުކޮށްފައި ހުރި ރައުދު އަހުމަދު ޒިލާލް، 22، ބަންދުން ދޫކޮށްލި ހަބަރު ރީޕޯސްޓު ކުރައްވައި އެކްސްގައި ކުރެއްވި ޕޯސްޓެއްގަ އެވެ.
"ކުށުގެ ތުހުމަތުގައި ހައްޔަރު ކޮށްފައި ހުންނަ މީހެއްގެ ބަންދުގެ މުއްދަތު، އެމީހެއްގެ މައްޗަށް އައިސްދާނެ އަދަބުގެ މުއްދަތަށްވުރެ ދިގުވާނެ ކަމަށް ބެލެވޭ ހާލަތުގައި ޕީޖީ އޮފީހުން އާންމުކޮށް އަމަލު ކުރާ ގޮތް މިއީ،" ޝަފީއު ވިދާޅުވި އެވެ.
ފުލުހުންގެ ބަންދުން ރައުދު ދެވަނަ ފަހަރަށް ދޫކޮށްލީ ރޭ ދަންވަރު 1:15 ހާއިރު އެވެ. އޭނާ ބަންދުން ދޫކޮށްލީ ޕީޖީ އޮފީހުން އެގޮތަށް އިރުޝާދުދީ ފުލުހުންނަށް ފޮނުވި ސިޓީއަކާ ގުޅިގެންނެވެ. އަދަދު އަށް އެނގިފައިވާ ގޮތުގައި އެ ސިޓީ ޕްރޮސިކިއުޓަ ޖެނެރަލްގެ އޮފީހުން މޯލްޑިވްސް ޕޮލިސް ސާވިސް އަށް ފޮނުވީ އިއްޔެ އެވެ.
ރައުދު ދޫކޮށްލިއިރު، އޭނާގެ މައްޗަށް ދައުވާ ކޮށްދިނުމަށް އެދި ޕްރޮސެކިއުޓާ ޖެނެރަލްގެ އޮފީހަށް އިއްޔެ ވަނީ ފޮނުވައިފަ އެވެ. އެ އޮފީހުން އިއްޔެ ބުނީ ރައުދުއަށް ދައުވާ ކުރުމާމެދު 15 ދުވަހުގެ ތެރޭގައި ގޮތެއް ނިންމާނެ ކަމަށެވެ.
ރައުދުގެ މައްޗަށް ފުލުހުން ކުރަނީ އެހީއަށް ބޭނުންވެފައިވާ މީހަކަށް އެހީތެރިކަން ފޯރުކޮށްދީފައި ނުވުމާއި މަސްތުގެ ހާލުގައި ހުރިކަމުގެ ކުށުގެ ތުހުމަތެވެ.
ހީތެރިކަން ބޭނުންވެފައިވާ މީހަކަށް އެހީތެރިވެނުދިނުމުގެ ކުށާއި އޭގެ އަދަބު ބަޔާން ކޮށްފައި އޮންނަނީ ގާނޫނުލްއުގޫބާތުގެ 618 ވަނަ މާއްދާގަ އެވެ. އެ މާއްދާގެ ހ. ގައި ބަޔާން ކޮށްފައި އޮންނަނީ އަންނަނިވި ހާލަތްތަކުގައި އެކަން ކުރާ މީހާ އެ ކުރަނީ ކުށެއް ކަމަށެވެ. އެއީ:
- ކުރިމަތިވެދާނެކަން އެނގޭ ނުރައްކަލެއްގެ އިންޒާރު އެކަށީގެންވާ ސަބަބެއް ނެތި ނުރައްކަލެއްގައިވާ މީހާއަށް ނުދިނުން، ނުވަތަ
- އެހީއަށް ބޭނުންވެފައިވާ މީހާއަށް، އެކަށީގެންވާ ސަބަބެއް ނެތި، އެހީތެރިކަން ފޯރުކޮށްނުދިނުން، ނުވަތަ
- އޭނާއަށް އެހީތެރިކަން ފޯރުކޮށްދެވިދާނެ ހާލަތެއްގައި ހުރުމާއި އަދި އިންޒާރު ދެވިދާނެ ހާލަތެއްގައި ހުރުން، އަދި
- އޭނާއަށް ނުވަތަ އެހެން މީހަކަށްވިޔަސް އެއްވެސް ބާވަތެއްގެ މާއްދީ ނުވާނެފަދައަކުން އެހީތެރިކަން ފޯރުވައިދެވިދާނެ ނުވަތަ އިންޒާރު ދެވިދާނެ ފަދަ ހާލަތެއްގައި ހުރުން، އަދި
- ގާނޫނުން ނުވަތަ އެއްބަސްވުމެއްގެ ދަށުން އޭނާގެ މައްޗަށް ލާޒިމުކޮށްފައިވާ އެއަށްވުރެ މަތީ ވާޖިބެއް ދޫކޮށްލަން ނުޖެހި އިންޒާރު ދެވެން އޮތުން ނުވަތަ އެހީތެރިވެދެވެން އޮތުން
އެ މާއްދާގެ ބ. ގައި އެހީތެރިވެނުދިނުމުގެ ނުދިނުމުގެ ކުށް ދަރަޖަ ކޮށްފައި ވަނީ ޖުނަހުގެ ތިންވަނަ ދަރަޖައިގެ ކުށެއްގެ ގޮތުގަ އެވެ. ޖަނުހުގެ ތިންވަނަ ދަރަޖައިގެ ކުށަކަށް ދެވޭ އަސާސީ އަދަބަކީ އެއް މަހާއި ހަ ދުވަހުގެ މުއްދަތަކަށް ޖަލަށްލުމެވެ. އެ ކުށަށް ދެވޭނެ އެންމެ ބޮޑު އަދަބަކީ ތިން މަސްދުވަހަށް ޖަލަށް ލުމެވެ.
މިދިޔަ މަހުގެ 24، ގައި ހައްޔަރުކުރި ރައުދު ފުލުހުންގެ ބަންދުގައި ހުންނަތާ އިއްޔެއަށް ވަނީ 32 ދުވަސްވެފަ އެވެ. އެހެންކަމުން މީހަކަށް އެހީތެރިވެ ނުދިނުމުގެ ކުށް ރައުދުގެ މައްޗަށް ސާބިތުވި ނަމަވެސް އޭނާ ބަންދުގައި މާގިނަ ދުވަސް ހޭދަ ކުރަންޖެހޭނެ ކަމަކަށް ނުބެލެވެ އެވެ.
ރައުދުގެ މައްޗަށް ހެކީގެ ގޮތުގައި ފުލުހުން ހުށަހަޅާފައި ވަނީ ފުލުހުންނާއި ހެކިންގެ ބަޔާނުގެ އިތުރުން ފޮޓޯ ރިޕޯޓާއި ސީން އޮފް ކްރައިމްސް އޮފިސާސް ރިޕޯޓު އަދި އިތުރު ބައެއް ހެކި ގަރީނާ އެވެ.
ރައުދު އަހުމަދު ޒިލާލް، 22، އަކީ އޭޕްރިލް 18 ވަނަ ދުވަހުގެރޭ ހ. ފެންޓެނޯއީ ގޭގެ ނުވަ ވަނަ ފަންގިފިލާއިން ހައްވާ ޔުމްނު ރަޝީދު، 21، ވެއްޓުމުގެ ކުރިން އެނާއާއެކު އެ ގޭގައި ހަރަކާތްތެރިވި މީހާ އެވެ.
ޔުމްނު ވެއްޓިފައި އޮއްވައި ފެނުނު މައްސަލައިގައި ފުލުހުން ފުރަތަމަ ބުނީ، ޔުމްނު ވެއްޓުމުގައި އެހެން އެއްވެސް މީހެއްގެ ބައިވެރިވުމެއް އޮތް ކަމަށް ނުބެލެވޭ ކަމަށެވެ.
ޔުމްނު ވެއްޓުނު ހާދިސާ އާ ގުޅިގެން ފުރަތަމަ ރައުދު ހައްޔަރު ނުކުރި ނަމަވެސް ޕޮލިސް ސްޓޭޝަނަށް ގެންގޮސް އޭނާއާ ވަނީ ސުވާލުކޮށްފަ އެވެ. އޭނާގެ ކުޑަކަމުދާތަކެތި ޓެސްޓު ކުރުމުން މަސްތުވާތަކެއްޗަށް އެއިރު ޕޮޒިޓިވް ވެފައިވެ އެވެ. އެކަމަކު، އެވަރުން ވެސް ފުލުހުން އޭނާ ހައްޔަރެއް ނުކުރި އެވެ.
އެކަމަކު ފުލުހުން އަމަލު ކުރަމުންދިޔަ ގޮތަށް ފާޑުކިޔުން އަމާޒުވާން ފެށުމުން އޭޕްރިލް 24، ގައި ރައުދު ހައްޔަރު ކުރުމަށްފަހު ފުލުހުން ބުނީ ޔުމްނު ވައްޓާލުމުގައި ރައުދުގެ ބައިވެރިވުމެއް އޮތް ކަމަށް ތުހުމަތު ކުރެވޭ ކަމަށެވެ. އަދި ޔުމްނު ވެއްޓުނުކަން ރައުދަށް އެނގޭ ކަމަށް ވެސް ފުލުހުން ތުހުމަތު ކުރި އެވެ.
އެ މައްސަލައިގައި ފުލުހުން ހަދާފައި ހުރި ވަރަށް ބޮޑެތި ގޯސްތަކެއް ވެސް ފެންމަތިވި އެވެ.
ފުލުހުން ހެދި ގޯސްތަކުގެ ތެރޭގައި، ޔުމްނު ވެއްޓުނު ހ. ފެންޓެނޯއީ ގޭގެ ބައެއް ފަންގިފިލާތަކުގައި ކެމެރާ ހުރި އިރު ވެސް ކެމެރާ ނެތް ކަމަށް ބުނެ ދޮގު ހެދުން ހިމެނެ އެވެ. އަދި ޔުމްނު ވެއްޓުނު ހާދިސާއާ ގުޅޭ ތަންތަން ބަލައި ފާސް ކުރަން ފުލުހުން ވަނީ ފަސްޖެހިފަ އެވެ. އޭގެ ތެރޭގައި ޔުމްނު އާއި އޭނާއާއެކު އުޅުނު ބަޔަކު ދިޔަ މިނިސްޓަރު މުހައްމަދު އަމީން ދިރިއުޅޭ ގެ އާއި އެ މައްސަލައިގައި ހިމެނޭ އިތުރު މީހެއްގެ ގެ ހިމެނެ އެވެ.
އެތަންތަން ބަލައި ފާސް ކުރުމަށް ފުލުހުން ދިޔައީ ހަ ދުވަސް ފަހުންނެވެ. ބަލައި ފާސް ކުރުމަށްފަހު ފުލުހުން ބުނީ މައްސަލައާ ގުޅޭ އެއްވެސް އެއްޗެއް އެ ދެ ގެއިން ފެނިފައިނުވާ ކަމަށެވެ. އަދި މިނިސްޓަރު އަމީން ދިރިއުޅޭ ގޭގެ ވީޑިއޯ ފުޓޭޖް ހަލާކުވެފައިވާތީ، ލިބިފައިނުވާ ކަމަށް ފުލުހުން ވަނީ ބުނެފަ އެވެ.
ޔުމްނު ވެއްޓުނު ހާދިސާ ތަހުގީގު ކުރުމަށް ރައީސް މުހައްމަދު މުއިއްޒު ވަނީ ރިޔާސީ ކޮމިޝަނެއް އުފައްދައިފަ އެވެ. އެ ކޮމިޝަނުގެ މައިގަނޑު ބޭނުމަކީ ޔުމްނު ވެއްޓުނު ހާދިސާގެ ހަގީގަތް ހޯދުމެވެ. އެ ކޮމިޝަން އުފެއްދީ އޭޕްރީލް 26، ގަ އެވެ.
