ލޯކަލް ގަވަމަންޓު އޮތޯރިޓީ (އެލްޖީއޭ) އިން ބޭއްވި ފޯރަމެއްގައި، ރައީސް ޑރ. މުހައްމަދު މުއިއްޒުއަށް ދެވަނަ ދައުރެއް ދޭން ލޯކަލް ގަވަމަންޓު މިނިސްޓަރު އާދަމް ޝަރީފް އުމަރު އިއްޔެ ގޮވާލައްވައިފި އެވެ.
އެލްޖީއޭއިން އއ. އުކުޅަހުގައި ބޭއްވި "ރަށްވެހީންގެ ސައްލާ" ފޯރަމްގައި ރައީސްއަށް ދެވަނަ ދައުރެއް ދިނުމަކީ ކޮންމެހެން ކުރަން ޖެހޭ ކަމެއް ކަމަށް އާދަމް ޝަރީފް ވިދާޅުވީ ލާމަރުކަޒީ ނިޒާމު ހަރަދަނާ ކުރުމާ ގުޅުވަ އެވެ.
"ދިވެހިރާއްޖޭގެ ލާމަރުކަޒީ ނިޒާމު ހަރުދަނާކުރަން ބޭނުންވާ ކަމަށްވާ ނަމަ، މި ސަގާފަތް ދެމެހެއްޓުމަށް ޓަކައި އަޅުގަނޑު ދަންނަވާނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެވަނަ ދައުރަކަށް ހޮވުމަކީ އަޅުގަނޑުމެން ހަމަ ކޮންމެހެން ކުރަން ޖެހޭ ކަމެއް،" އޭނާ ވިދާޅުވި އެވެ.
ރަށްރަށުގެ ކައުންސިލުތައް ތަމްސީލުކުރާ 55 ބައިވެރިންގެ ކުރިމަތީގައި އާދަމް ޝަރީފް މިހެން ވިދާޅުވީ، "ޕަބްލިކް އެންގޭޖުމަންޓު އިން ލޯކަލް ގަވަނަންސް" ނޫނީ ރައްޔިތުންގެ ބައިވެރިވުމާއެކީ ކައުންސިލުތަކުގެ މަސައްކަތް ބައްޓަން ކުރުމާ ގުޅިގެން މައުލޫމާތު ދޭން ބޭއްވި ފޯރަމެއްގަ އެވެ.
މި ފޯރަމްގައި އިނގިރޭސި ހައިކޮމިޝަނަރު ޑޭވިޑް ލޯ އާއި އިނގިރޭސި ސަރުކާރުގެ ދެކެނު އޭޝިއާ ސަރަހައްދުގެ ރީޖަނަލް ޑިޕާޓުމަންޓުގެ ޑެޕިއުޓީ ހެޑު، ކަމިލާ ސުގްޑެން އަދި ޔޫއެންޑީޕީގެ ޑެޕިއުޓީ ރެޒިޑެންޓް ރެޕްރެޒެންޓޭޓިވް، ޕެކް ޗުއާން ގާން ވެސް ބައިވެރިވެވަޑައިގެންނެވި އެވެ.
އާދަމް ޝަރީފް ވިދާޅުވީ ރައީސް މުއިއްޒަށް ދެވަނަ ދައުރެއް ދިނުމުގެ ވާހަކަ ކައުންސިލަރުން ބައިވެރިވި ބައްދަލުވުމެއްގައި ފާހަގަކުރީ، ރައްޔިތުންނާ އެންމެ ގާތުން މަސައްކަތް ކުރަނީ ކައުންސިލުތަކުން ވާތީ ކަމަށެވެ.
އޭގެ އިތުރުން މިކަމުގައި ކައުންސިލުތަކުން އެއްބާރުލުން ލިބިއްޖެ ނަމަ ގައުމަށް ގެންނަން ޖެހޭ ބަދަލުތަކާއި ލާމަރުކަޒީ ނިޒާމަށް ގެންނަން ޖެހޭ ބަދަލުތައް ގެންނަން ވަރަށް ބޮޑެތި ކުރިއެރުންތަކެއް ލިބިގެން ދާނެ ކަމަށް އޭނާ ވިދާޅުވި އެވެ.
ކައުންސިލުތަކާ އެކީ ބޭއްވި ފޯރަމެއްގައި އާދަމް ޝަރީފް ރައީސްއަށް ކެމްޕެއިންކޮށްދެއްވިއިރު، އާންމުކޮށް މިފަދަ ފޯރަމްތަކުގައި ސިޔާސީ ވާހަކަތައް ދައްކާ، ކެމްޕެއިންކޮށް ނުހަދަ އެވެ.
ލާމަރުކަޒީ ނިޒާމު ހަރުދަނާކުރަން ބޭނުންވާ ކަމަށްވާ ނަމަ ރައީސް މުއިއްޒުއަށް ދެވަނަ ދައުރެއް ދޭންޖެހޭ ކަމަށް އާދަމް ޝަރީފު ވިދާޅުވިއިރު، ކައުންސިލްތަކުގެ ބާރުތައް ސަރުކާރަށް ނަގާތީވެ ފާޑުކިޔުން ވެސް އަމާޒުވެފައިވެ އެވެ.
