ގާނޫނުއަސާސީގައިވާ ގޮތުން ރައްޔިތުން އިންތިހާބު ނުކުރާ ބަޔަކަށް އިދާރީ ދާއިރާތައް ނުހިންގޭނެ ކަމަށް ސުޕްރީމް ކޯޓުގެ ކުރީގެ ފަނޑިޔާރު އަދި މަޝްހޫރު ގާނޫނީ ވަކީލު ހުސްނުއްސުއޫދު މިއަދު ވިދާޅުވެއްޖެ އެވެ.
ސުއޫދު އެކްސް ގައި ކުރެއްވި ޕޯސްޓެއްގައި ވިދާޅުވީ ރައްޔިތުން އިންތިހާބުކުރާ ކައުންސިލްތަކުން އިދާރީ ދާއިރާތައް ހިންގުމަކީ 2008 ގެ ގަނޫނުއަސާސީ އިން ދައުލަތް ހިންގުމަށް ގެނައި އެންމެ ބޮޑު ބަދަލު ކަމަށެވެ.
ގާނޫނުއަސާސީގައި ކުރިން ބަޔާންކޮށްފައި އޮތް އަތޮޅު ކައުންސިލްތައް އުވާލުމުން ރައްޔިތުން އިންތިހާބު ނުކުރާ ބަޔަކު އިދާރީ ދާއިރާތައް ހިންގަން ގާނޫނުއަސާސީ ހުއްދަ ނުކުރާ ކަމަށެވެ.
"ގާނޫނުއަސާސީގެ 230 އަދި 231 އޮތް ގޮތުން ގާނޫނުއަސާސީގެ ޖަދުަލު 2 ގައިވާ އިދާރީ ދާއިރާއެއް ރައްޔިތުން އިންތިހާބު ނުކުރާ ފަރާތްތަކުން ހިންގުމަށް ގާނޫނުއަސާސީ ހުއްދައެއް ނުދޭ،" އޭނާ ވިދާލުވި އެވެ.
ގާނޫނުއަސާސީ ހުއްދަ ނުކުރާ ކަމެއް މަޖިލީހުން ފާސްކުރާ ގާނޫނަކުން ވެސް ހުއްދަ ނުކުރެވޭނެ ކަމަށް ސުއޫދު ވިދާޅުވި އެވެ.
ސުއޫދު މިހެން ވިދާޅުވީ މިނިސްޓްރީ އޮފް ސިޓީސް ލޯކަލް ގަވަމަންޓް އެންޑް ޕަބްލިކް ވޯކްސް މިނިސްޓްރީ އުވާލުމުން ގާނޫނުއަސާސީގައި އަދި ލާމަރުކަޒީ ގާނޫނުގައި ބަޔާންކޮށްފައިވާ އިދާރީ ދާއިރާތައް ލާމަރުކަޒީ އުސޫލުން ހިންގުމަށް، ގާނޫނީ ހުރަހެއް ނުވަތަ ހުސްކަމެއް އަތުވެދާނެ ކަމަށް ނުދެކޭ ކަމަށް ލޯކަލް ގަވަމަންޓް އޮތޯރިޓީން ބުނުމުންނެވެ.
ލޯކަލް ގަވަމަންޓް އޮތޯރިޓީން ބުނީ އެގޮތަށް ނުދެކެނީ އަތޮޅު ކައުންސިލްތައް އުވާލާ އަތޮޅު ކައުންސިލްތަކުން އަދާކުރަމުންދިޔަ ގާނޫނީ މަސްއޫލިއްޔަތު އެ އޮތޯރިޓީއަށް ބަދަލުވާނެ ކަމަށް ގާނޫނުގައި ބަޔާންކޮށްފައިވުމާއި އަދި އަތޮޅު ކައުންސިލްތަކުގެ ބަދަލުގައި އިދާރީ ދާއިރާތަކުގައި ލޯކަލް ގަވަމަންޓް އޮތޯރިޓީގެ އޮފީސްތަކެއް ގާއިމުކުރުމުގެ އިހްތިޔާރު ލާމަރުކަޒީ ގާނޫނުގައި ބަޔާންކޮށްފައި އޮތުމުން ކަމަށެވެ.
ނަމަވެސް ސުއޫދު އިއްޔެ އެކްސް ގައި ކުރެއްވި ޕޯސްޓެއްގައި ވިދާޅުވީ ގާނޫނުއަސާސީގައިވާ އަތޮޅު ކައުންސިލްތައް އުވާލުމަށްފަހު، އަތޮޅުތައް ހިންގަން ސަރުކާރުން އުފެއްދި މިނިސްޓްރީ އުވާލުމުން، އަތޮޅުތައް އިދާރީ ދާއިރާއެއްގެ ގޮތުގައި ހިންގުމަށް ގާނޫނީ ހުސްކަމެއް އައިސްފައިވާ ކަމަށެވެ.
ރާއްޖޭގެ އަތޮޅުތައް ހިންގުން ގާނޫނީ ހުސްކަމަށް އައުމަކީ ކަންބޮޑުވާ ކަމެއް ކަމަށާއި އެ ހުސްކަން ގާނޫނީ މަގަކުން ހަމަޖައްސަން ޖެހޭ ކަމަށް ވެސް ސުއޫދު ވިދާޅުވި އެވެ.
ކައުންސިލްތަކުގެ ބާރުތައް ހަނިކުރަން އުފެއްދި ސިޓީސް މިނިސްޓްރީ އުވާލީ ނިމިދިޔަ ލޯކަލް ކައުންސިލް އިންތިހާބާއި ފެންނަ ނުފެންނަ ވޯޓުގައި ސަރުކާރު ވީ ބޮޑު ބައްޔަށްފަހު އެވެ.
އެ މިނިސްޓްރީ އުފެއްދީ ލާމަރުކަޒީ އުސޫލުން އިދާރީ ދާއިރާތައް ހިންގުމަށް ކަނޑައަޅާފައިވާ ދުސްތޫރީ މަގްސަދުތަކާއި، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމާބެހޭ ގާނޫނު ބަޔާން ކުރެވިފައިވާ ގާނޫނީ މަގްސަދުތައް ހާސިލު ކުރުމަށްޓަކައި ކަމަށް ބުނެ އެވެ.
ލޯކަލް ކައުންސިލްތަކުގެ ބާރު ހަނިވާ ގޮތަށް މި ސަރުކާރުން ވަނީ ގާނޫނަށް ގިނަ ބަދަލުތަކެއް ގެނެސްފަ އެވެ. އޭގެ ތެރޭގައި ކައުންސިލްތަކުގެ ދަށުގައި ހުންނަ ބައެއް ބިންތައް ސަރުކާރަށް ނެގޭ ގޮތަށް އިސްލާހެއް ވަނީ ފާސްކޮށްފަ އެވެ. އަދި ރަށްރަށުގެ ލޭންޑް ޔޫސް ޕްލޭނަށް ވެސް ސަރުކާރަށް ނުފޫޒު ފޯރުވޭ ގޮތަށް ވަނީ ބަދަލެއް ގެނެސްފަ އެވެ.
