މާލޭ ދަތުރުވެރިންގެ މާރުކޭޓުގައި ކޮޕީފަތް އަދި ލެޓިއުސް ވަރަށް ބޮޑަށް ތިޔާގިވެ އަގު ވެއްޓިއްޖެ އެވެ.
މާރުކޭޓުގެ ކޮންމެ ގޮޅިއެއްގައިހެން މިއަދު ކޮޕީފަތް ލިބެން ހުރިއިރު ހަތަރު ފަތުގެ ކޮޕީ ފަތް ބޮނޑިއެއް ލިބެން ހުރީ 15ރ. އަށެވެ. ނަމަވެސް އިއްޔެ ތިން ފަތުގެ ކޮޕީ ފަތް ބޮނޑިއެއްގެ އަގު ހުރީ 20ރ. އަށެވެ.
ބާޒާރުގައި ލެޓިއުސް ލިބެން ހުރީ އެކި އަގަށްކަން ފާހަގަކުރެވެ އެވެ. ގިނަ ގޮޅިތަކުގައި ލެޓިއުސް ކިލޯއެއް ވިއްކަމުން ދިޔައީ 50ރ. އާއި 80ރ. އަށެވެ. އެކަމަކު ލެޓިއުސް ކިލޯއެއް 100ރ. އަށް ވުރެ މަތިން ދެ ގޮޅިއަކުން ވިއްކަމުންދިޔަކަން ފާހަގަކުރެވެ އެވެ.
ބާޒާރުގައި އެންމެ ތަދު އެއްޗެހީގެ ތެރޭގައި ކާށި ފާހަގަކޮށްލެވެ އެވެ. އެގޮތުން ބައެއް ގޮޅިތަކުގައި ކާށި ލިބެން ހުރީ ކާއްޓެއް 35ރ. އާއި 40ރ. އާ ދެމެދު އެވެ.
މޭވާގެ ބާވަތްތަކަށް ބަލާއިރު ޖުމްހޫރީ މޭވާ (ޕެޝަން ފުރުޓު) ކިލޯއެއް ބާޒާރުގައި ހުރީ 120ރ. ގައި ހިފެހެއްޓިފަ އެވެ. އަދި ރޯ ކަދުރު ކިލޯއެއްގެ އަގު ވެސް ހުރީ 300ރ. ގައި ހިފެހެއްޓިފަ އެވެ.
ބާޒާރުގައި ގޮޅިއެއް ހިންގާ މީހަކު ކޮޕީފަތް ބޮނޑި ހަދަނީ: ބާޒާރުގައި ކޮޕީފަތް ވަނީ ވަރަށް ބޮޑަށް ތިޔާގިވެފައި -- ފޮޓޯ: މިރާޝް ނާޝިމް / އަދަދު
ކަރާ ކިލޯއެއްގެ އަގު އިއްޔެ 20ރ. އާއި 25ރ. އަށް ހުރި ނަމަވެސް މިއަދު ބާޒާރުގައި ކަރާ ކިލޯއެއް ލިބެން ހުރީ 25ރ. އާއި 30ރ. އާ ދެމެދު އެވެ.
އެކަމަކު އާފަލުގެ އަގު 5ރ. އިން 6ރ. އަށް މިއަދު ހުރީ އުފުލިފަ އެވެ. އޮރެންޖު ލިބެން ހުރީ 5ރ. އަށެވެ. މިދިޔަ ރޯދަ މަހު އާފަލާއި އޮރެންޖުގެ އަގު އުފުލެމުން ގޮސް 12ރ. އަށް ވެސް އެރި އެވެ.
ބާޒާރުގައި ކެރެޓް ކިލޯއެއްގެ އަގު 45ރ. އާއި 50ރ. އާ ދެމެދުގެ އަގެއްގައި ލިބެން ހުރިއިރު ކެބެޖް ކިލޯއެއްގެ އަގު ހުރީ 30ރ. އަށެވެ. ކެޕްސިކަމް ކިލޯއެއްގެ އަގު 80ރ. އަށް ހުރިއިރު ބީންސް ކިލޯއެއްގެ އަގު ހުރީ 90ރ. އަށެވެ. އަދި ލީކްސް ކިލޯއެއްގެ އަގު ހުރީ 85ރ. އަށެވެ.
މަހުގެ އަގުތަކަށް ބަލާއިރު ކަނޑު މަހާއި ކަންނެލީގެ އަގު ހުރީ މިއަދު ވެސް 30ރ. އާއި 35ރ. އާ ދެމެދު އެވެ. ނަމަވެސް މުށި މަހުގެ އަގު އުފުލި މިއަދު އެންމެ މަހެއް ވެސް ލިބެން ހުރީ 10ރ. އަށެވެ. އިއްޔެ ބާޒާރުގައި ތިން މުށިމަސް 15ރ. އަށްް ލިބުނެވެ.
ބާޒާރުގައި ހުރި ވަޅޯމަހުގެ އަގުތަކަށް ބަލާއިރު މިއަދު ވެސް ކިލޯއެއް ލިބެން ހުރީ 80ރ. އަށްވުރެ މަތިންނެވެ.
