ރޯދަ މަހުގެ ދިވެހިންގެ ތެރޭގައި އެންމެ ބޮޑަށް ޑިމާންޑު އުފުލޭ މޭވާގެ ބާވަތްތަކުގެ ތެރޭގައި ހިމެނޭ ކަރާ ލޯކަލް މާރުކޭޓުން މަދުވެ، ކިލޯއެއްގެ އަގު 35ރ. އަށް މިއަދު އުފުލިއްޖެ އެވެ.
ބާޒާރުގައި ކަރާ ކިލޯއެއް މިއަދު ލިބެންހުރީ 30ރ. އާއި 35ރ. އާ ދެމެދުގެ އަގެއްގަ އެވެ. ބާޒާރުގައި މިވަގުތު ހުރީ ކުޑަ ކަރާކަން ފާހަގަކުރެވެ އެވެ.
މާރުކޭޓުގައި ގޮޅިއެއް ހިންގާ ވިޔަފާރިވެރިޔަކު އަދަދު އަށް ބުނީ ކަރާގެ އަގު ބޮޑުވެގެން އުޅެނީ ކަރާ ލިބުމުގައި ދަތިތަކެއް ދިމާވެގެން އުޅޭތީ ކަމަށެވެ.
ކުރިއަށް އޮތް ދުވަސްތަކުގައި ކަރާ ތިޔާގިވެެއްޖެނަމަ އަދި ލިބޭ އަގު ހެޔޮވެއްޖެނަމަ ކަރާގެ އަގު ވެއްޓޭނެ ކަމަށް ވެސް އޭނާ ބުންޏެވެ.
ރޯދަ މަސް ފެށުނުއިރު ކަރާ ކިލޯއެއްގެ އަގު ހުރީ 20ރ. އަށެވެ. ނަމަވެސް ފަހުން ކިލޯއެއްގެ އަގު 25ރ. އަށް އުފުލުނުއިރު، މިއީ މި ރޯދަ މަހު ކަރާގެ އަގު 35ރ. އަށް އެރި ފުރަތަމަ ފަހަރެވެ.
ބާޒާރުގައި އާންމު ގޮތެއްގައި ގަންނަ ތަކެތީގެ އަގު ހުރީ އެއްވަރެއްގައި ހިފެހެއްޓިފަ އެވެ. ނަމަވެސް ކަނޑޫދޫ މިރުހުގެ އަގު ވަނީ 100 ގްރާމް 30ރ. އަށް ވެއްޓިފަ އެވެ. ކަނޑޫދޫ މިރުހުގެ 100 ގްރާމުގެ އަގު މި ރޯދަ މަހު 60ރ. އަށް ވެސް އަރައިގެންދިޔަ އެވެ.
މީގެއިތުރުން ބާޒާރުގައި ކުރުނބާގެ އަގު 40ރ. އާއި 50ރ. އާ ދެމެދު ހުރިއިރު، ކުރުނބާ ފުޅިއެއް ލިބެން ހުރީ 150ރ. އަށެވެ. ކޮޕީފަތް ބޮނޑިއެއް 10ރ. އަށް ހުރިއިރު، ލެޓިއުސް ކިލޯއެއް 60ރ. އަށް ލިބެ އެވެ.
