ގޫގުލް ޕިކްސެލް ސްމާޓްފޯނުތަކަށް އުރީދޫ މެދުވެރިކޮށް ރާއްޖޭގައި ރަސްމީކޮށް 5ޖީގެ ހިދުމަތް ދޭން ފަށައިފި އެވެ. މިއާއެކު ޕިކްސެލް ބޭނުންކުރާ ފަރާތްތަކަށް އުރީދޫގެ 5ޖީ ނެޓްވޯކް މެދުވެރިކޮށް ހަލުވި އިންޓަނެޓް ސްޕީޑާއެކު އިތުރަށް ފުރިހަމަވެފައިވާ މޮބައިލް ތަޖުރިބާއެއް ލިބިގެންދާނެ އެވެ.
ގޫގުލްގެ ނޮވެމްބަރު މަހުގެ ސޮފްޓްވެއާ އަޕްޑޭޓަށްފަހު، އުރީދޫ ނެޓްވޯކްގައި ޕިކްސެލް ފޯނު ބޭނުންކުރާ ކަސްޓަމަރުންނަށް މިހާރު މި ހިދުމަތް ލިބޭނެ އެވެ. މީގެ އިތުރުން މި އަޕްޑޭޓާއެކު ވޮއިސް އޯވާ އެލްޓީއީ (ވީއޯއެލްޓީއީ) ވެސް ބޭނުންކުރެވޭނެތީ، 4ޖީ ނެޓްވޯކް މެދުވެރިކޮށް ކަސްޓަމަރުންނަށް މާ ސާފުކޮށް ފޯނު ކޯލުތައް ކުރެވޭނެ ކަމަށް އުރީދޫއިން ބުނެ އެވެ.
މި އައު އަޕްޑޭޓާއެކު ގޫގުލް ޕިކްސެލްގެ ގިނަ މޮޑެލްތަކަކަށް މި ހިދުމަތް ސަޕޯޓްކުރެ އެވެ. އޭގެ ތެރޭގައި:
- ޕިކްސެލް 7، ޕިކްސެލް 8، ޕިކްސެލް 9، ޕިކްސެލް 10 އަދި ޕިކްސެލް 11 ސީރީޒް
- ޕިކްސެލް ފޯލްޑް ޑިވައިސްތައް
- މި ޚިދުމަތް ސަޕޯޓްކުރާ އޭ-ސީރީޒް އަދި ޕްރޯ ފޯލްޑް މޮޑެލްތައް
މި ހިދުމަތާ ގުޅޭގޮތުން ވާހަކަ ދައްކަވަމުން އުރީދޫ މޯލްޑިވްސްގެ ޗީފް ކޮމާޝަލް އޮފިސަރު ހުސައިން ނިޔާޒް ވިދާޅުވީ، ގޫގުލް ޕިކްސެލް ޑިވައިސްތަކަށް 5ޖީ ލިބުމަކީ ކަސްޓަމަރުން ވަރަށް ގިނަ ދުވަސްތަކެއް ވަންދެން އެދެމުންދިޔަ ކަމެއް ކަމަށެވެ.
"އެންމެ ފަހުން އެކަން ހަގީގަތަކަށް ހަދައިދެވުނު ކަމީ އަޅުގަނޑުމެންނަށް ލިބޭ ވަރަށް ބޮޑު އުފަލެއް. އުރީދޫއިން އަބަދުވެސް އެންމެ ބޮޑު އިސްކަމެއް ދެނީ ކަސްޓަމަރުންގެ އަޑުއަހައި، ކަސްޓަމަރުންނަށް އެންމެ މުހިންމު ކަންކަން ފަހިކޮށްދިނުން. މި ޚިދުމަތަކީވެސް މިކަމުގެ ވަރަށް ފުރިހަމަ މިސާލެއް،" ނިޔާޒް ވިދާޅުވި އެވެ.
މި ޚިދުމަތް ސަޕޯޓުކުރާ ޕިކްސެލް ފޯނު ގެންގުޅޭ މީހުން، ފޯނުގެ ސޮފްޓްވެއާ އެންމެ ފަހުގެ ވާޝަނަށް އަޕްޑޭޓްކުރުމަށްފަހު މޮބައިލް ނެޓްވޯކް ސެޓިންސްއިން 5ޖީ އެނޭބަލްކޮށްލައިގެން ފަސޭހަކަމާއެކު ބޭނުންކުރަން ފެށޭނެ އެވެ. އުރީދޫގެ 5ޖީ ކަވަރޭޖް ލިބޭ ހުރިހާ ސަރަހައްދަކުންވެސް މި ހިދުމަތް ލިބިގެންދާނެއެވެ.

