ލޮސް އެންޖެލްސް، ޔުނައިޓެޑް ސްޓޭޓްސް (ފެބްރުއަރީ 11) - މި ހަފްތާގައި ފަށާ ޖެނެސިސް އިންވިޓޭޝަނަލް ގޯލްފް މުބާރާތުގައި ވާދަކުރަން ކުރި ނިންމި ނަމަވެސް، މީގެ ހަފްތާއެއްހާ ދުވަސް ކުރިން މަންމަ މަރުވުމާ ގުޅިގެން، އާއިލާ އަށް ވަގުތު ދޭން ނިންމައި، ޓައިގާ ވުޑްސް ޖެނެސިސް މުބާރާތުން ވަކިވެއްޖެ އެވެ.
ވުޑްސް، 49، ގެ މަންމަ ކުލްޓިޑާ މަރުވީ، މި މަހުގެ ހަތަރު ވަނަ ދުވަހު އެވެ. ވުޑްސްގެ ބައްޕަ މަރުވީ، 2006 ވަނަ އަހަރު އެވެ. އޭގެ ފަހުން، ވުޑްސްގެ ކެރިއަރުގެ އެންމެ ބޮޑު އެހީތެރިއަކީ، ތައިލެންޑަށް އުފަން އޭނާގެ މަންމަ، ކުލްޓިޑާ އެވެ.
ގޯލްފްގެ މޭޖާ ޗެމްޕިއަންކަން، 15 ފަހަރު ހޯދި ވުޑްސް އެންމެ ފަހުން އެ މުބާރާތް ކާމިޔާބުކުރީ، 2019 ވަނަ އަހަރު އެވެ. އެ ފަހަރު އެ މުބާރާތް ކާމިޔާބުކުރުމަށް ފަހު، ވުޑްސް ބުނެފައިވަނީ، އެކަން ހާސިލްކުރެވުނީ އޭނާގެ އެންމެ ބޮޑު ސަޕޯޓަރު، މަންމަ، ކުލްޓިޑާގެ އެހީއާ އެކު ކަމަށެވެ.
"އަހަރެން ކުރިން ވިސްނީ މި ހަފްތާގައި އެނބުރި އާދެވޭ ވަރަށް ހާލަތު ބަދަލުވާނެ ކަމަށް، އެކަމަކު، އަދި މުބާރާތެއް ކުޅޭކަށް އަހަރެން ތައްޔާރެއް ނޫން، އަހަރެން ބޭނުންވި މި މުބާރާތުގައި ކުޅެން، ޔަގީން އެ ގޮތަށް ކަން އަހަރެންގެ މަންމަ ވެސް އެދޭނީ، އެކަމަކު، އަހަންނަށް އަދިވެސް މި އުޅެނީ، މަންމަގެ މި ވަކިވުމުން އަރައިނުގަނެވިގެން،" ވުޑްސް ބުންޏެވެ.
ޕްރޮފެޝަނަލް ގޯލްފް އެސޯސިއޭޝަން (ޕީޖީއޭ) ޓުއާގެ މުބާރާތެއްގައި އެންމެ ފަހުން ވުޑްސް ކުޅެފައިވަނީ، މިދިޔަ އަހަރުގެ ޖުލައި މަހުގަ އެވެ. މީގެ ހަތަރު އަހަރު ކުރިން، 2021 ވަނަ އަހަރު ކާރު އެކްސިޑެންޓެއްގައި، ލިބުނު އަނިޔާތަކުގެ ސަަބަބުން، ވުޑްސް ގަވާއިދުން މުބާރާތްތަކުގައި ނުކުޅެ އެވެ.
