މިޔަންމާގައި ކުރިއަށްދިޔަ އޭއެފްސީ 20 އަހަރުން ދަށުގެ އޭޝިއަން ކަޕް ކޮލިފައިންގެ ޑިވެލޮޕްމަންޓް ފޭސްގައި ރާއްޖެ އަތުން 4-0 އިން ބަލިވި މެޗަށް ފަހު، ރާއްޖެއާ މެދު އިހުތިރާމް ކުޑަކޮށް ބޭއަދަބީ އިބާރާތްތައް ބޭނުންކޮށްގެން ވާހަކަ ދެއްކި ސްރީ ލަންކާ ޓީމުގެ އެސިސްޓަންޓް ކޯޗު، މުހައްމަދު އިމްރާން، 5000 ޑޮލަރުން ޖޫރިމަނާކުރަން އޭއެފްސީން ނިންމައިފި އެވެ.
ކޮލިފައިންގައި އެކަން ހިނގުމާ އެކު، އިމްރާންއާ މެދު ސްރީ ލަންކާ ފުޓްބޯޅަ ފެޑެރޭޝަން (އެފްއެފްއެސްއެލް) އިން ފިޔަވަޅު އެޅި އެވެ. އެއީ، ވަގުތުން ޓީމުން ބޭރުކުރީ އެވެ.
ލަންކާ އަތުން ރާއްޖެ 4-0 އިން މޮޅުވި މެޗަށް ފަހު، އިމްރާން އާއި ރާއްޖޭގެ ކުޅުންތެރިންނާ މެދު ވާހަކަތަކެއް ހިނގައިދިޔަ ފަހުން، އިމްރާން އަޑުގަދަކޮށް، ރާއްޖޭގެ ކުޅުންތެރިންނާއި އޮފިޝަލުންނާ ދިމާލަށް، ރާއްޖެ އަށް ނިސްބަތްކޮށް ބޭއަދަބީ އިބާރާތްތައް ބޭނުކޮށް، އިހުތިރާމް ކުޑަކޮށް ވަނީ ވާހަކަ ދައްކައިފަ އެވެ.
އޭނާ ވާހަކަ ދެއްކިއިރު، އިބާރާތްތައް ބޭނުކޮށްފައި ހުރީ، މިދިޔަ މާޗް މަހު ރާއްޖެ އަތުން މާލޭގައި ކުރިއަށްދިޔަ ސާފް 20 އަހަރުން ދަށުގެ މުބާރާތުގައި ސްރީ ލަންކާ 3-2 އިން މޮޅުވި މެޗަށް އިޝާރާތްކޮށެވެ. އެ މެޗުގައި ރާއްޖެ ދެ ގޯލުގެ ލީޑެއްގައި އޮއްވައި، ސްރީ ލަންކާ މޮޅުވީ ދެ ވަނަ ހާފުގައި ތިން ގޯލު ޖަހައިގެންނެވެ.
ސާފް 20 އަހަރުން ދަށުގެ މުބާރާތުގައި ވެސް އެސިސްޓަންޓް ކޯޗަކަށް މަސައްކަތްކުރި އިމްރާންގެ ފަރާތުން ފެނިގެންދިޔަ އަހުލާގީ ގޮތުން ދަށްފެންވަރުގެ ކަންތައްތަކުގެ ސަބަބުން އެކަމާ މާޔޫސްވާކަން ސޯޝަލް މީޑިއާގައި ސްރީ ލަންކާ ސަޕޯޓަރުންގެ ފަރާތުން ވެސް ފެނިގެންދިޔަ އެވެ.
ސްރީ ލަންކާގެ ފުޓްބޯޅަ ރައީސް ޖަސްވާރު އުމަރު އާއި ލަންކާގެ ފުޓްބޯޅަ ފެޑެރޭޝަންގެ ލީޑަޝިޕުން، 20 އަހަރުން ދަށުގެ ޓީމުގެ އެސިސްޓަންޓް ކޯޗު، އިމްރާން އަށް ފިޔަވަޅު އަޅަން ނިންމީ އަހުލާގީ ގޮތުން އެ ފަދަ ކަމެއް ފެންނަ ކޯޗަކަށް ފުރުސަތެއް ނެތް ކަމަށް ބުނެ އެވެ. އަދި، ހާއްސަކޮށް ޒުވާން އުމުރުގެ ކުޅުންތެރިންނާ ހަވާލުވެ ހުރި ކޯޗެއްގެ ފަރާތުން އެ ފަަދަ ކަމެއް ފެނުން އެއްވެސް ގޮތަކަށް ބަަލައިނުގަނެވޭނެ ކަމަށް ސްރީ ލަންކާ ފުޓްބޯޅަ ފެޑެރޭޝަނުން ވަނީ ބުނެފަ އެވެ.
ލަންކާ ފުޓްބޯޅަ ފެޑެރޭޝަނުން އަންނަނީ ދެ އަހަރަށް އިމްރާން ސަސްޕެންޑްކުރަން ވާހަކަ ދައްކަމުންނެވެ. އަދި، އޭއެފްސީން އިމްރާން އަށް ދީފައިވާ އަދަބާ ގުޅިގެން، އެޕީލްކުރަން ލިބިފައި އޮތް ފުރުސަތު ވެސް ދޫކޮށްލަން ވަނީ ނިންމައިފަ އެވެ.
ރާއްޖެ އާއި ސްރީ ލަންކާ އިން ސާފް 20 އަހަރުން ދަށުގެ މުބާރާތުގައި ކުޅުނު މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި، އިމްރާން ބުނީ، ފުޓްބޯޅައިގައި ރާއްޖެ އާއި ސްރީ ލަންކާގެ ވާދަވެރިކަން ފެންނަނީ ކްރިކެޓްގައި އިންޑިއާ އާއި ޕާކިސްތާން ކަހަލަ ގޮތަކަށް ކަމަށެވެ.
