ޕެރިސް (އޮކްޓޫބަރު 13) - އެމެރިކާ އަކީ ފުޓްބޯޅައިގެ މާ ބޮޑު ތަފާތެއް އޮތް ގައުމެއް ނޫން ކަމަށް ފްރާންސްގެ ތަޖުރިބާކާރު ފޯވާޑް، އޮލިވިއޭ ޖިރޫ ބުނެފި އެވެ.
ފްރާންސްގެ ލިލް އަށް މިހާރު ކުޅެމުން އަންނަ 40 އަހަރުގެ ފޯވާޑް، ޖިރޫ ވަނީ، އެއް ސީޒަނުގައި އެމެރިކާ ފުޓްބޯޅަ ލީގު، މޭޖަ ލީގު ސޮކާ (އެމްއެލްއެސް)ގައި ލޮސް އެންޖެލްސް އެފްސީ (އެލްއޭ އެފްސީ) އަށް ކުޅެފަ އެވެ. އެ ކްލަބްގައި ދިގު މުއްދަތަކަށް މަޑުނުކުރި ސަބަބު ޖިރޫ ވަނީ ދާދި ފަހުން ދިން އިންޓަވިއުއެއްގައި ހިއްސާކޮށްފަ އެވެ.
"އަހަރެންގެ ތަޖުރިބާގައި ބުނާނީ އެމެރިކާ އަކީ ފުޓްބޯޅައިގެ ތަނެއް ނޫނޭ. ޔޫރަޕްގައި މި ހުންނަ ޖޯޝާއި ފޯރި ނޫނީ މެޗަށްޓަކައި އެ ހުންނަ ހާއްސަކަން އަހަންނަށް އެމެރިކާ އިން ނުފެނުނު. އެހެންވެ، މި ބުނަނީ އަަަހަންނަށް ފުޓްބޯޅައިގެ ވިސްނުމުގައި އެމެރިކާއާ މެދު ދެއްކޭނެ މާ ބައިވަރު ވާހަކައެއް ނެތް،" ޖިރޫ ބުންޏެވެ.
"ހަގީގަތަކީ އެމެރިކާގައި ފުޓްބޯޅަ އަށް ދޭ ސަމާލުކަން ކުޑަވުމުން، އޭގެ އޮންނަނީ ފައިސާގެ ވިސްނުން، ޕެޝަން އެއް ނެތް،"
ޖިރޫ ބުނީ، މިއީ އޭނާގެ ފުޓްބޯޅަ ކެރިއަރުގައި ފަހު ސީޒަން ކަމަށެެވެ.
ޖިރޫ ވިދާލީ، ފްރާންސްގެ މޮންޕެލިއޭގައި ހުއްޓައި، 2012 ވަނަ އަހަރު އާސެނަލަށް ގެންދިޔަ ހިސާބުންނެވެ. އޭގެ ފަހުން، 2018 އަހަރާ ހަަމައަށް އާސެނަލަށް ކުޅުމަށް ފަހު، ދެން ބަދަލުވީ ޗެލްސީ އަށެވެ. ޗެލްސީގައި ތިން އަހަރު ކުޅުނެވެ. ދެން، ބަދަލުވީ، 2021 ވަނަ އަހަރު އޭސީ މިލާނަށެވެ.
މިލާން ދޫކޮށް، އެލްއޭ އެފްސީއާ ގުޅުނު ޖިރޫ އެއް ސީޒަނުގައި އެ ޓީމަށް ކުޅެ، ލިލް އަށް ބަދަލުވި އެވެ.
ފްރާންސް ގައުމީ ޓީމުން ދެ އަހަރު ކުރިން ރިޓަޔާކުރި ޖިރޫ އަކީ އެ ޓީމަށް އެންމެ ގިނަ ގޯލު ޖަހައިދިނުމުގެ ރެކޯޑް އޮތް ކުޅުންތެރިޔާ އެވެ. ޖިރޫ، އެންމެ ފުރަތަމަ ފްރާންސަށް މެޗެއް ކުޅުނީ 2011 ވަނަ އަހަރު އެވެ. ފްރާންސަށް ކުޅެދިން 131 މެޗުން އޭނާ ވަނީ 57 ލަނޑު ޖަހައިފަ އެވެ. ޖިރޫގެ ލަނޑު ޖެހުމުގެ ރެކޯޑް މިހާރު އޮތީ ކީލިއަން އެމްބާޕޭ އަތުގަ އެވެ.
