ފޭދޫ ފިނޮޅު ކައިރިން ދެ ލޯންޗު ޖެހި އޭޕްރިލް 29، 2023 ގައި މީހަކު މަރުވި ހާދިސާގައި ހިމެނޭ ދެ ކައްޕިންނަށް ދައުވާކޮށްދިނުމަށް އެދި ޕްރޮސެކިއުޓާ ޖެނެރަލްގެ އޮފީހަށް ފުލުހުން މައްސަލަ ފޮނުވައިފި އެވެ.
އެ މައްސަލައިގައި ދައުވާ ކޮށްދިނުމަށް އެދި ފުލުހުން ޕީޖީއަށް ފޮނުވާފައި ވަނީ "ސަސް އީ ސްޕީޑް" އާއި އެމްޑަބްލިއުއެސްސީ މެރިން 2" ދުއްވަން ތިބި ޔާނިސް ހަމީދު 35، ހީނާވިލާ، ކ. ކާށިދޫ އާއި މުހައްމަދު ޖަމީލް 43، ގްރީންހައުސް، ހދ. ނޮޅިވަރަން އަށެވެ.
ފުލުހުން ބުނީ އެ ދެ މީހުންގެ މައްޗަށް ދައުވާ ކޮށްދިނުމަށް އެދި ޕީޖީ އޮފީހަށް ފުރަތަމަ މައްސަލަ ފޮނުވީ ޖޫން 4، 2023 ގައި ކަމަށެވެ. ނަމަވެސް އިސްލާހު ކުރަންޖެހޭ ކަންތައްތަކެއް ހުރިކަމަށް ބުނެ ޕީޖީ އޮފީހުން މައްސަލަ އަނބުރާ ފޮނުވައިލުމުން، އިސްލާހުތަކާއެކު ޕީޖީ އޮފީހަށް މައްސަލަ އަލުން ފޮނުވީ މިމަހު 15، ގައި ކަމަށެވެ.
ފޭދޫ ފިނޮޅު ކައިރިން ދެ ލޯންޗު ޖެހި އެކްސިޑެންޓުވީ، ގުޅިފަޅުން ހުޅުމާލެއަށް ދަތުރުކުރި ސަސް އީ ސްޕީޑް ލޯންޗަށް ބާރު ސްޕީޑުގައި ދުއްވާފައި އައި އެމްޑަބްލިއުއެސްސީގެ ލޯންޗު އުރިގެންނެވެ. އެ ވަގުތު ސަސް އީ ސްޕީޑުގައި ތިބީ ތިން މީހުންނެވެ.
އެ ހާދިސާގައި މަރުވީ ސާސޭ ކޮންސްޓްރަކްޝަންގެ ވެރިޔާ ސައުދުﷲ އަހުމަދު (ސައުދު) އެވެ. އޭނާ އިނީ ލޯންޗުގެ ފަހަތު ސީޓުގަ އެވެ. އެމްޑަބްލިއުއެސްސީގެ ލޯންޗު އުރުނީ ވެސް ސަސް އީ ސްޕީޑުގެ ފަހަތުކޮޅަށެވެ. ހާދިސާ ހިނގި ވަގުތު އެ ލޯންޗުގައި ދެން ތިބީ ދެ ފަޅުވެރިންނެވެ.
