ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީ) އާ ހަވާލުކޮށްގެން ހިއްކި ބިންތަކުގެ ބަދަލުގައި ދީފައި އޮތް 89.6 ހެކްޓަރުގެ ބިން ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ) އިން އަތުލައިފި އެވެ.
"އަދަދު" ނޫހުން މާޗު 2024، ގައި ހުށަހެޅި އާރުޓީއައިއަކަށް އެޗްޑީސީން ދިން ޖަވާބުން އެނގޭ ގޮތުގައި ހަތަރު ސަރަހައްދަކުން ބިން ހިއްކުމުގެ މަސައްކަތް ސީއެމްސީއާ އޮތީ ހަވާލުކޮށްފަ އެވެ. އެއީ ތިލަފުއްޓާއި ދިޔަނެރު ފަޅާއި ހުޅުމާލޭ ތިންވަނަ ފިޔަވަހި އަދި ފުށިދިއްގަރު ފަޅެވެ. އެ ތަންތަނުން ހިއްކަން ހަވާލުކޮށްފައިވާ ބިމުގެ ބޮޑުމިނަކީ 1249.8 ހެކްޓަރެވެ.
އިތުބާރު ހުރި މަސްދަރުތަކުން މި ނޫހަށް ކަށަވަރުކޮށްދޭ ގޮތުގައި މި ބިންތައް ހިއްކުމުގެ ބަދަލުގައި ދޭން ނިންމި 89.6 ހެކްޓަރުގެ ބިން ސީއެމްސީގެ އަތުން ވަނީ އަތުލައިފަ އެވެ.
ބިން ހިއްކުމުގެ މަސައްކަތްތަކުގެ ތެރެއިން ތިލަފުއްޓާއި ދިޔަނެރު ފަޅާއި ހުޅުމާލެ ތިންވަނަ ފިޔަވަހި ހިއްކުމުގެ މަޝްރޫއުގައި އެޗްޑީސީ (އޭރުގެ އާބަންކޯ) އިން ސޮއިކުރީ އޮގަސްޓު 2023، ގެ ތެރޭގަ އެވެ. ފުށިދިއްގަރު ފަޅު މަޝްރޫއުގައި ސޮއިކުރީ ޑިސެމްބަރު 2023، ގަ އެވެ.
ދިޔަނެރު ފަޅާއި ތިލަފުއްޓާއި ހުޅުމާލެ ތިންވަނަ ފިޔަވަހީގެ ބިން ހިއްކުމުގެ މަޝްރޫއު ސީއެމްސީއާ ހަވާލުކުރީ ހުޅުމާލެއިން 10 ހެކްޓަރުގެ ބިމާއި ތިލަފުށިން 9.6 ހެކްޓަރުގެ ބިން ހިއްކައިގެން އެ ބިންތަކުގެ ޑިވެލޮޕްމަންޓު ރައިޓްސް 99 އަހަރަށް އެ ކުންފުންޏަށް ދީގެންނެވެ. ފުށިދިއްގަރު ފަޅު ހިއްކުމުގެ މަޝްރޫއު ސީއެމްސީއާ ހަވާލުކޮށްފައިވަނީ ފުށިދިއްގަރު ފަޅުން 60 ހެކްޓަރު އަދި ހުޅުމާލެއިން 10 ހެކްޓަރުގެ ޑިވެލޮޕްމަންޓް ރައިޓްސް ދީގެންނެވެ.
ތިލަފުއްޓާއި ހުޅުމާލެ ތިންވަނަ ފިޔަވަހި ހިއްކުމުގެ މަސައްކަތް ކޮންމެވެސް ވަރަކަށް ކުރިއަށްގެންދިޔަ ނަމަވެސް ފިޔަނެރު ފަޅުގައި މާ ގިނަ މަސައްކަތްތަކެއް ކުރިއަށް ނުދެ އެވެ. ފުށިދިއްގަރު ފަޅުން 1،153 ހެކްޓަރު ހިއްކަން ހަވާލުކުރި ނަމަވެސް އެ މަޝްރޫއުގެ ދެ ޕަސެންޓު ވެސް ހިއްކާ ނުނިމުމުން ސީއެމްސީގެ ކޮންޓްރެކްޓު ބާތިލުކޮށް އެހެން ކުންފުނިތަކަކާ އެ މަސައްކަތް ވަނީ ހަވާލުކޮށްފަ އެވެ.
