ހަނގުރާމަވެރި ޖަމާއަތްތަކުން ސީރިޔާގެ ވެރިރަށް ދިމިޝްކު ހިފައި، އެ ގައުމުގެ ދުވަސްވީ ހުދުމުހުތާރު ވެރިކަން ނިމުމަކަށް ގެނައުމާއެކު އެކަމަށް ތާއީދުކޮށް ކޮންސްޓްރަކްޝަން އެންޑް އިންފްރާސްޓަކްޗާ މިނިސްޓަރު އަބްދުﷲ މުއްތަލިބު މިއަދު ކުރެއްވި ޕޯސްޓު ޑިލީޓު ކުރައްވައިފި އެވެ.
ސޯޝަލް މީޑިއާ ޕްލެޓްފޯމް އެކްސްގައި ކުރެއްވި ޕޯސްޓެއްގައި ލިޔުއްވާފައިވަނީ ސީރިޔާގެ އަހުންނާއި އުހުތުން އެތައް ޒަމާނެއް ވަންދެން އަނިޔާވެރިކަން ތަހައްމަލުކޮށްފައިވާ ކަމަށެވެ. އަދި މިއީ އެ ގައުމުގައި އަމާންކަމާއި ކުރިއެރުމުގެ ޒަމާނެއް ފެށުން ކަމުގައި ލެއްވުމަށް ވެސް މިނިސްޓަރުގެ ޕޯސްޓުގައި ދުއާ ކުރެއްވި އެވެ.
މިއަދު ހެދުނު 10:12 ގައި މިނިސްޓަރު ކުރެެއްވި ޕޯސްޓު މިހާރު ވަނީ ޑިލީޓުކުރައްވައިފަ އެވެ. ޕޯސްޓު ޑިލީޓުކުރެއްވި ސަބަބު ހޯދުމަށް "އަދަދު" ނޫހުން ގުޅުމުން މިނިސްޓަރު ފޯނަށް ޖަވާބުދެއްވާފައެއް ނުވެ އެވެ.
ސީރިޔާގެ ސަރުކާރާ ދެކޮޅު ހަނގުރާމަވެރި ޖަމާއަތްތަކުން ދިމިޝްކު ހިފުމާއެކު ވޭތުވެދިޔަ 24 އަހަރު އެ ގައުމުގެ ވެރިކަމުގައި ހުންނެވި ރައީސް ބައްޝާރުލް އަސަދު ވަނީ ގައުމު ދޫކޮށް ފިލައިފަ އެވެ. އޭނާ މިހާރު ހުރި ގައުމެއް ސާފެއް ނޫނެވެ.
ދިމިޝްކުގައި ތިބި ސީރިއާގެ އެތައް ހާސް ސިފައިން ވެސް ވަނީ ފިލައިގެން އެހެން ތަންތަނަށް ހިޖުރަ ކޮށްފައި ކަމަށް ރިޕޯޓުތައް ބުނެ އެވެ. ހަނގުރާމަވެރިން މިހާރު ވަނީ އަސަދުގެ ގަނޑުވަރަށް ވެސް ވަދެފަ އެވެ.
އަސަދުގެ ވެރިކަމާ ދެކޮޅަށް ހަނގުރާމަކުރަމުންދާ ޖަމާއަތްތަކުގައި ދިވެހިން ވެސް ހަރަކާތްތެރިވެ އެވެ. އެގޮތުން މިދިޔަ ހަފުތާ ސީރިއާގެ ހަލަބު ސިޓީ ހިފުމުގައި އެ ގައުމުގައި ހަރަކާތްތެރިވާ ދިވެހީން ބައިވެރިވެފައިވާކަން މި ނޫހުގެ ޓީމުން ވަނީ ކަށަވަރުކޮށްފަ އެވެ.
ދިމިޝްގުގެ މަގުތައް މަތީގައި އެތައް ހާސް މީހުން ނުކުމެ އުފާ ފާޅު ކުރަމުންދާ ކަމަށް ރޮއިޓާސްއިން ރިޕޯޓު ކުރެ އެވެ. އޭގެ އިތުރުން މީސްމީޑިއާގައި އަލްޖަޒީރާގެ ނޫސްވެރިން ޕޯސްޓުކޮށްފައިވާ ބައެއް ވީޑިއޯތަކުން ވެސް ސީރިއާއަށް މިނިވަންކަން ލިބިއްޖެ ކަމަށް ބުނެ ގިނަ އަދަދެއްގެ މީހުން އުފާ ފާޅު ކުރާ މަންޒަރު ފެނެ އެވެ.
ސީރިއާގެ ދާހީލީ ހަނގުރާމަ ފެށުނީ މާޗު 2011 ގަ އެވެ. އެ ހަނގުރާމައިގެ ފެށުމަކީ މެދުއިރުމަތީގައި އުފެދުނު މިނިވަން ފިކުރު، "އަރަބި ސްޕްރިންގް" އާއެކު ސީރިއާގައި ވެސް ފެށި މުޒާހަރާތަކެވެ.
