އިންޑިއާގެ އަސްކަރީ އުޅަނދުތައް އޮޕަރޭޓު ކުރާ އެ ގައުމުގެ ސިފައިން އަނބުރާ ފޮނުވާލުމަށް ފަހު މި ވެރިކަމުގައި ގެނައި "މަދަނީ" މީހުންގެ ހުރިހާ ތަފުސީލެއް ހާމަކުރަން އިންފޮމޭޝަން ކޮމިޝަނަރުގެ އޮފީސް (އައިކޮމް) އިން ޑިފެންސް މިނިސްޓްރީއަށް އެންގުމުން ވެސް އެ މައުލޫމާތު ދޭން ދެކޮޅު ހަދައިފި އެވެ.
އިންޑިއާއިން ފޮނުވީ މަދަނީންކަން ކަށަވަރު ކުރި ގޮތާއި، އެ މީހުންގެ ތަފުސީލުތަކާއި އުޅަނދުތައް އޮޕަރޭޓުކުރުމުގައި އަމަލުކުރާ ގޮތްތައް ހޯދަން، މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން "އަދަދު" އިން އެދުނީ މެއި 12، ގަ އެވެ.
ނަމަވެސް އެ މީހުންގެ ވަނަވަރާއި އެވްރެޖް އުމުރާއި އޭގެ ތެރޭގައި ހިމެނޭ އަންހެނުންނާއި ފިރިހެނުންގެ އަދަދާއި އެއިން އެއްވެސް މީހަކު މީގެ ކުރިން އިންޑިއާގެ އަސްކަރިއްޔާގައި މަސައްކަތް ކުރިކަން ސާފުކޮށްދޭން އެދުނު ނުކުތާތަކުގެ ޖަވާބު ސިއްރުކުރަން ޑިފެންސް މިނިސްޓްރީން މީގެ ކުރިން ވަނީ ނިންމާފަ އެވެ.
ނޮވެމްބަރު 17، 2023 އިން ފެށިގެން ހަމަ އެ އުޅަނދުތަކުން ކުރި ދަތުރުތަކުގެ އަދަދު ވެސް ޑިފެންސުން ވަނީ ސިއްރުކޮށްފަ އެވެ.
މައުލޫމާތު ސިއްރުކުރުމުން ހުށަހެޅި މައްސަލަ އެތައް މަސްދުވަހަށް ދިގުދެމިގެންދިޔުމަށްފަހު، އެ މައްސަލަ ނިންމައި، މަދަނީންނާ ގުޅޭ ތަފުސީލުތައް ހާމަކުރަން އައިކޮމް އިން ޑިފެންސަށް އެންގީ ނޮވެމްބަރު 14، ގަ އެވެ. މި ނޫހާ އެ މައުލޫމާތު ހިއްސާކުރަން ޑިފެންސަށް ދިން ފަސް ދުވަހުގެ މުއްދަތު ހަމަވެފައިވާއިރު ޑިފެންސުން މިހާތަނަށް އެއްވެސް ޖަވާބެއް ދީފައެއް ނުވެ އެވެ.
މީގެ އިތުރުން، މަދަނީން ގެނައުމަށް ދިވެހި ސަރުކާރުން ވަކި އެއްބަސްވުމެއް ހަދާފައިވާނަމަ އެ އެއްބަސްވުން އޮތީ ފޮރިން މިނިސްޓްރީގައި ކަމަށް ޑިފެންސުން މި މައްސަލައިގެ އަޑުއެހުންތަކުގައި ބުނެފައިވާތީ އާރުޓީއައިގެ އެ ނުކުތާ ފޮރިންއަށް ބަދަލުކުރުމަށް ވެސް އައިކޮމް އިން ވަނީ އަންގައިފަ އެވެ. ނަމަވެސް އެ ނިންމުމާ އެއްގޮތަށް ވެސް ޑިފެންސުން އަމަލުކޮށްފައެއް ނުވެ އެވެ.
މިކަމާ ގުޅޭ ގޮތުން ޑިފެންސުގެ އިންފޮމޭޝަން އޮފިސަރާ ވާހަކަ ދެެއްކުމުން، އޭނާ ވިދާޅުވީ މި މައްސަލައިގައި އަދި ޑިފެންސުގެ "އިސް ވެރިން" ގޮތެއް ނުނިންމަވާ ކަމަށެވެ. އައިކޮމްގެ ނިންމުން ހައި ކޯޓުގައި އިސްތިއުނާފުކުރުމުގެ ހައްގު ޑިފެންސަށް ލިބެ އެވެ. ނަމަވެސް އެކަމާމެދު ވެސް އަދި ގޮތެއް ނުނިންމަ އެވެ.
ރައީސް ޑރ. މުހައްމަދު މުއިއްޒުގެ ރިޔާސީ ވައުދުގެ ދަށުން ތިން ބެޗަކަށް ބަހާލައިގެން އިންޑިއާގެ 76 ސިފައިން އަނބުރާ ގެންގޮސް ނިމުނު ކަމަށް ސަރުކާރުން ބުނީ މެއި 10، ގަ އެވެ.
ބަދަލުގައި ގެނައީ އިންޑިއާގެ ސަރުކާރުން ހިންގާ ޑިފެންސް ކުންފުންޏެއްގެ މަދަނީން ކަމަށް ވެސް ސަރުކާރުން ބުނެފައިވެ އެވެ. މަދަނީން އައި ފަހުން ވެސް އިންޑިއާގެ އުޅަނދުތައް އެކި ދަތުރުތައް ކޮށްފައިވާ ކަމަށް މި ނޫހަށް ވަނީ މައުލޫމާތު ލިބިފަ އެވެ.
