އަވައްޓެރި އިންޑިއާއަށް ދަތުރުކުރާ އެންމެން އެ ގައުމަށް ދަތުރުކުރުމުގެ ކުރިން ސެލްފް ޑެކްލެރޭޝަން ފޯމް ފުރިހަމަކުރަން ޖެހޭ ގޮތަށް ހެދުމާ ގުޅިގެން، އެ ނިންމުމާ އެއްގޮތަށް ދިވެހިން ވެސް އަމަލުކުރުމަށް ގައުމީ އެއާލައިން، މޯލްޑިވިއަން އިން އިލްތިމާސްކޮށްފި އެވެ.
މޯލްޑިވިއަން އިން ބުނީ އިންޑިއާއަށް ދަތުރުކުރާ އެންމެން ސެލްފް ޑިކްލެރޭޝަން ފޯމް ފުރުމަށް އެ ގައުމުގެ ޑައިރެކްޓޮރޭޓް ޖެނެރަލް އޮފް ސިވިލް އޭވިއޭޝަން އިން އެންގީ ޑަބްލިއުއެޗްއޯއިން އެބޯލާ ވައިރަސް ބައިނަލްއަގުވާމީ ފެންވަރެއްގައި އާންމު ސިއްހަތަށް އޮތް ނުރައްކަލެއް ގޮތުގައި ކަނޑައެޅުމާ ގުޅިގެން، ރައްކާތެރިކަމުގެ ފިޔަވަޅެއް ގޮތަށެވެ.
ސެލްފް ޑެކްލެރޭޝަން ފޯމް ހުށަހަޅަންޖެހެނީ އިންޑިއާއަށް ދަތުރުކުރުމަށްފަހު އެ ގައުމުގެ ހެލްތު އެންޑް އިމިގްރޭޝަން ކައުންޓަރަށެވެ.
ގިނަ އަދަދެއްގެ ދިވެހިން ދަތުރުކުރާ އިންޑިއާއަށް ދާ ދިވެހިން މީގެ ކުރިން ސެލްފް ޑެކްލެރޭޝަން ފޯމެއް ފުރަން ނުޖެހޭއިރު، ދިވެހިންނަށް ވިސާއާ ނުލައި އިންޑިއާގައި 90 ދުވަސް ހޭދަކުރެވެ އެވެ.
ބެންގަލޫރުގައި އެބޯލާ ވައިރަހަށް ޝައްކު ކުރެވިގެން ކަރަންޓީނު ކުރި ޔޫގެންޑާ މީހަކު ކަރަންޓީނު ކުރި އެވެ. ނަމަވެސް އެ ބައްޔަށް އޭނާ ވަނީ ނެގެޓިވްވެފައިކަން އިންޑިއާގެ ހެލްތު މިނިސްޓްރީން ބުންޏެވެ.
އެބޯލާ ފެތުރުން ހުއްޓުވުމަށްޓަކައި އިންޑިއާގެ އެއާޕޯޓުތަކާއި އެހެނިހެން ބޯޑަރުތަކުގައި މިހާރު ވަނީ ސްކްރީން ކުރުމާއި މޮނިޓާ ކުރުމުގެ ވަރުގަދަ ފިޔަވަޅުތަކެއް އަޅާފަ އެވެ. މީގެ އިތުރުން، ސަރުކާރުން ވަނީ ރައްކާތެރިކަމުގެ އިރުޝާދުތައް ނެރެ، ކޮންގޯ، ޔުގެންޑާ އަދި ދެކުނު ސޫދާނަށް ކޮންމެހެން ކުރަންޖެހޭ ދަތުރުތައް ފިޔަވައި އެހެން ދަތުރުތައް ނުކުރުމަށް ރައްޔިތުންނަށް އިލްތިމާސްކޮށްފަ އެވެ.
ދުނިޔޭގެ ސިއްހަތު ޖަމިއްޔާއިން ހާމަކޮށްފައިވާ ގޮތުގައި، މިހާތަނަށް ދުނިޔޭގެ އެކި ކަންކޮޅުތަކުން ޝައްކު ކުރެވޭ 900 އަށް ވުރެ ގިނަ ކޭސް ފެނިފައިވާއިރު، އޭގެ ތެރެއިން 101 ކޭސްއަކީ ބަންޑިބުގްޔޯ ސްޓްރެއިންގެ އެބޯލާ ކަމަށް ވަނީ ކަށަވަރު ކުރެވިފަ އެވެ. މި ވައިރަހަށް އަދި މިހާތަނަށް އެއްވެސް ވެކްސިނެއް ނުވަތަ ފަރުވާއެއް ހޯދިފައެއް ނުވެ އެވެ.
