މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ހުށަހަޅާ އާރުޓީއައިތަކަށް ޖަވާބު ދިނުމުގައި ސަރުކާރުން ބަލާ މިންގަނޑުތައް މިއަދު ސަރުކާރުގެ އިސް ތަރުޖަމާނު މުހައްމަދު ހުސައިން ޝަރީފް (މުންދު) ހާމަކުރައްވައިފި އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ބޭނުން ނަހަމަ ގޮތުގައި ހިފަމުންދާ ކަމަށް ވިދާޅުވެ ބަންޑާރަނައިބު، އަހުމަދު އުޝާމް ދެއްކެވި ވާހަކަފުޅުތަކަށް އިންފޮމޭޝަން ކޮމިޝަނަރު، އާހިދު ރަޝީދު ރޭގެ ވަގުުތެއްގައި ރައްދު ދެއްވި އެވެ.
އެ ވާހަކަތަކާ ގުޅިގެން މިހާރު ހިނގަމުންދާ ނޫސްވެރިންގެ ބައްދަލުވުމެއްގައި އަމާޒުވި ސުވާލަކަށް ޖަވާބު ދެއްވަމުން މުންދު ވިިދާޅުވި ގޮތުގައި ރައީސް އޮފީހަށް ހުށަހަޅާ އާރުޓީއައިތަކުގެ ތެރެއިން ގިނަ އާރުޓީއައިތަކަށް ޖަވާބު ވަނީ ދީފަ އެވެ.
“ސައްހަ ފަރާތްތަކުން މީގެ ބައެއް ފަހަރު ބަލާލާއިރު އައިޑެންޓިޓީ ވެސް ދިމާނުވޭ. އޭގެ މާނައަކީ ސައްހަ ނިޔަތުގައި ސައްހަ ގޮތަށް، ޒިންމާދާރުކަމާއެކު ކުރައްވާ ސުވާލުތަކަށް ޖަވާބު އަރުވާނަމޭ،” މުންދު ވިދާޅުވި އެވެ.
މިވަގުތު ޖަވާބު ނުދީ ހުރި އާރުޓީއައިތަކަކީ ވަގުތުން ޖަވާބު އެރުވުމަށް އުނދަގޫ އާރުޓީއައިތަކެއް ކަމަށާއި ނަމަވެސް އެ ސުވާލުތަކަށް ވެސް ޖަވާބު އެރުވުމަކީ ސަރުކާރުގެ އަމާޒު ކަމަށް މުންދު ވިދާޅުވި އެވެ.
“ހާރިޖީ ގުޅުންތަކަށް ބުރޫ އަރާ ގޮތަށް އެދިފައި ހުންނަ މައުލޫމާތާއި ބައެއް މިސާލަކަށް މާލީ އެއްބަސްވުންތަކުގައި ހުންނަ ކޮންފިޑެންޝަލިޓީ ކްލޯސްތަކާ ގުޅޭ މައުލޫމާތާއި، ގައުމީ ސަލާމަތާ ގުޅޭ މައުލޫމާތު ވެސް ހުންނާނެ ހިސާބަކަށް، ބައެއް އެއްޗެއްސަކީ ޖަވާބު ނޭރުވޭނެ އެއްޗެހި،” ސަރުކާރުން ޖަވާބުދިނުމުގައި ގެންގުޅޭ މިންގަނޑު މުންދު ހިއްސާކުރެއްވި އެވެ.
އެ ގާނޫނުގެ ދަށުން ހުށަހަޅާ ބައެއް އާރުޓީއައިތަކަކީ ސައްހަ ގޮތުގައި ހުށަހަޅާފައި ހުންނަ އާރުޓީއައި ނޫން ކަމަށް މުންދު ގަބޫލުކުރައްވަ އެވެ.
“ސައްހަ މީހަކު ހުށަހަޅާފައި އޮންނަން ވާނީ، ގާނޫނުގައި ވެސް އޮވޭ ކަންކަން، ޖަވާބުދާރީވާން ޖެހޭއިރު ޖަވާބުދާރީވާން ޖެހޭ ފަރާތް ވެެސް އެނގެން ޖެހޭ، އޭ ބޭފުޅާ ބަލައި ހޯދާއިރު އެއީ އިންސާނަކަށް ނުވާ ކަހަލަ އާރުޓީއައި ވެސް އެބަ އާދޭ،” މުންދު ވިދާޅުވިި އެވެ.
ސަރުކާރުން މި ގޮތަށް ހާމަކޮށްފައިވާއިރު އިންފޮމޭޝަން ކޮމިޝަނަރު އާހިދު އެކްސްގައި ކުރެއްވި ޕޯސްޓެއްގައި ވިދާޅުވީ އާރުޓީއައި ގާނޫނުގެ ބޭނުން ނަހަމަގޮތުގައި އެއްވެސް ފަރާތަކުން ހިފާކަމުގެ ހެއްކެއް ފެންނަން ނެތް ކަމަށެވެ.
އިންފޮމޭޝަން ކޮމިޝަނަރުގެ އޮފީހުން އާންމުކޮށްފައިވާ މިދިޔަ އަހަރުގެ ތަފާސްހިސާބުތަކުން ދައްކާ ގޮތުގައި އެ އޮފީހަށް ހުށަހެޅި 712 ޝަކުވާގެ ތެރޭގައި ގިނައީ އެއްވެސް ޖަވާބެއް ނުލިބިގެން ހުށަހަޅާފައިވާ ޝަކުވާ (487) އެވެ.
އެންމެ ގިނަ މައްސަލަތައް ރައްދުވާ އެއް އިދާރާއަކީ ރައީސް އޮފީހެވެ. އެ އޮފީހަށް ހުށަހެޅި ގިނަ ހުށަހެޅުންތަކަށް އެއްވެސް ޖަވާބެއް ނުލިބޭ ތަނުގައި، ބައެއް މައްސަލަތަކުގައި އައިކޮމް އިން އެންގުމުން ވެސް އެ މައުލޫމާތު ނުދީ ގިނަ ދުވަސްތަކެއް ކޮށްފައިވެ އެވެ.
