ހުޅުމާލޭގައި މޫދަށް އެރި އޮތް ކުއްޖަކަށް ޖިންސީ ގޯނާ ކުރި މައްސަލައެއް ބަލަމުން އަންނަ ކަމަށް ފުލުހުން މިއަދު ބުނެފި އެވެ.
މި މައްސަލައާ ގުޅޭ އިތުރު ތަފުސީލެއް ފުލުހުން ނުދެ އެވެ. ހަމައެކަނި ބުނީ މި މައްސަލަ އެ އިދާރާއަށް ހުށަހެޅީ މިދިޔަ ހުކުރު ދުވަހު ކަމަށެވެ.
ފުލުހުން މި މައްސަލައިގެ ތަފުސީލުތައް ނުދިން ނަމަވެސް، ސޯޝަލް މީޑީއާގައި މި މައްސަލައާ ގުޅޭ މައުލޫމާތު އަންނަނީ ދައުރުވަމުންނެވެ. އެ ގޮތުން ފޭސްބުކްގައި ކޮށްފައިވާ ޕޯސްޓެއްގައި މި މައްސަލައިގައި ތުހުމަތުވާ މީހާ ފުލުހުންނާ ހަވާލުކުރި ކަމަށް ވެސް ބުނެފައިވެ އެވެ.
ނަމަވެސް މި މައްސަލައާ ގުޅިގެން އެއްވެސް މީހަކު ހައްޔަރުކުރި ކަމެއް ނުވަތަ ބަންދުގައި ހުރި ކަމަކަށް ފުލުހުން ނުބުނެ އެވެ. ބެލެވޭ ގޮތުގައި މި މައްސަލައިގައި އަދި މީހަކު ހައްޔަރެއް ނުކުރެ އެވެ.
ސޯޝަލް މީޑިއާގައި ދައުރުވަމުންދާ ޕޯސްޓުގައި އެހެން ކުދިންނަށް ވެސް ޖިންސީ ގޯނާ ކުރަން އުޅުނު ކަމަށް ތުހުމަތުކޮށްފައިވެ އެވެ. އޭގައި ބުނި ގޮތުގައި އެ މީހާ ވަނީ އެކަހެރި ތަންތަނަށް ދާން ކުޑަކުދިންނަށް ދައުވަތު ދީ، ނުރުހުމަގައި ގަޔަށް އަތް ލާން މަސައްކަތް ކޮށްފަ އެވެ.
އެ ޕޯސްޓުގައިވާ ގޮތުގައި، އެ މީހާއަކީ ހުޅުމާލޭ ފޭސް އެކެއްގެ މަސް މާރުކޭޓުގައި މަސް ވިއްކަން އުޅޭ މީހެކެވެ. ނަމަވެސް ފުލުހުން މީޑިއާތަކަށް ފޮނުވި މެސެޖުގައި މިކަހަލަ އެއްވެސް މައުލޫމާތު ހިއްސާ ނުކުރާތީ މިކަން ކަށަވަރެއް ނޫނެވެ.
