ސްރީލަންކާގެ އިރަގަމާ އާއި ކެންޑީގައި ކުޑަކުދިންނަށް ޖިންސީ ގޯނާކުރި ކަމަށް ތުހުމަތުކުރެވޭ ވަކިވަކި ދެ މައްސަލައަކާ ގުޅިގެން، ބުދިސްޓް ފާދިރީއަކާއި، އިސްލާމީ އިލްމުވެރިއެއްގެ އިތުރުން އަންހެނަކު ބަންދުކޮށްފައިވާ ކަމަށް އެ ގައުމުގެ ފުލުހުން ބުނެފި އެވެ.
ފުރަތަމަ ހާދިސާގައި، އިރަގަމާ އަށް ނިސްބަތްވާ އުމުރުން 21 އަހަރުގެ މުސްލިމް ފިރިހެނަކު ހައްޔަރުކޮށްފައިވަނީ 14 އަހަރުގެ އަންހެން ކުއްޖަކަށް ބޮޑެތި ޖިންސީ ގޯނާތަކެއް ކުރި ކަމުގެ ތުހުމަތުގަ އެވެ. އޭނާ ހައްޔަރުކުރުމަށް ފަހު، މާދަމާގެ ނިޔަލަށް ބަންދުގައި ބެހެއްޓުމަށް ކޯޓުން ވަނީ އަމުރުކޮށްފަ އެވެ.
ކެންޑީން ރިޕޯޓުކޮށްފައިވާ ދެވަނަ މައްސަލައިގައި، 15 އަހަރުގެ އަންހެން ކުއްޖަކަށް ޖިންސީ ގޯނާކުރި ކަމުގެ ތުހުމަތުގައި ބުދިސްޓް ފާދިރީއަކު ވެސް ވަނީ ބަންދުކޮށްފަ އެވެ.
އުމުރުން 25 އަހަރުގެ މި ފާދިރީއަކީ ބަހިރަވަކަންޑާ ސަރަހައްދުގެ ފައްޅިއެއްގައި އުޅޭ މީހެއް ކަމަށާއި، އޭނާއަކީ އަނިޔާ ލިބުނު ކުއްޖާގެ ތިމާގެ މީހެއް ކަމަށް ފުލުހުން ބުނެފައިވެ އެވެ.
މީގެ އިތުރުން، ކެންޑީގައި ހިނގި މި ހާދިސާއާ ގުޅިގެން، އެ ކުށަށް އެހީތެރިވެދީ ބައިވެރިވި ކަމުގެ ތުހުމަތުގައި އުމުރުން 29 އަހަރުގެ އަންހެނަކު ވެސް ވަނީ ހައްޔަރުކޮށްފަ އެވެ. ފުލުހުން ބުނި ގޮތުގައި، ތަހުގީގު ކުރިއަށްދާތީ އެ އަންހެން މީހާ ވެސް މިހާރު ހުރީ ބަންދުގަ އެވެ.
