އަންނަ އަހަރުގެ އޭޕްރީލުން ފެށިގެން އުމުރުން ދުވަސްވީ މީހުންނަށް ލިބޭ އަސާސީ ޕެންޝަން (ބޭސިކް ޕެންޝަން) އިނާޔަތް ދޭ ގޮތް ބަދަލުކޮށް، އެންމެ މަދުން އާމްދަނީ ލިބޭ މީހުންގެ ތެރެއިން 65 އަހަރު ވެފައިވާ މީހުންނަށް އެކަނި ލިބޭ އިނާޔަތަކަށް ހަދަން ސަރުކާރުން ނިންމައިފި އެވެ.
މިހާރު އަސާސީ ޕެންޝަން ނިޒާމު އޮންނަ ގޮތުން، 65 އަހަރުން މަތީގެ އެންމެނަށް އަސާސީ ޕެންޝަން ލިބެ އެވެ. ސަރުކާރުން ހުށަހަޅާފައި ވަނީ ފޯރުންތެރިކަން ހުންނަ މީހުން މި ނިޒާމުން އިސްތިސްނާކޮށް، އަސާސީ ޕެންޝަން ވެސް "ޓާގެޓަޑް" ޕެންޝަނަކަށް ނުވަތަ ބޭނުންޖެހިފައިވާ މީހުންނަށް އެކަނި ލިބޭ އިނާޔަތަކަށް ހެދުމަށެވެ.
ބަޖެޓު ޕޮޒިޝަން ރިޕޯޓުގައި ފިނޭންސް މިނިސްޓްރީން ބަޔާންކޮށްފައިވާ ގޮތުގައި، އަންނަ އަހަރު ޕެންޝަނަށް ހިނގާނެ ކަމަށް ލަފާކުރާ، 1.8 ބިލިއަން ރުފިޔާ މި އަހަރުގެ މި ބަޔަށް ހިނގާނެ ހަރަދަށް ވުރެ ދަށްވީ މި ސަބަބާ ހުރެ އެވެ. މި އަހަރުގެ ތެރޭގައި ޕެންޝަނަށް ދެ ބިލިއަނަށް ވުރެ ގިނަ ރުފިޔާ ހިނގާނެ ކަމަށް ލަފާކޮށްފައި ވެ އެވެ.
އުމުރުން ދުވަސްވީ މީހުންނަށް ދޭ ޕެންޝަން ޓާގެޓު ކުރި ނަމަވެސް، މިހާރު ޕެންޝަން ލިބޭ އެއްވެސް މީހަކު އެ ނިޒާމުން އިސްތިސްނާ ކުރާކަށް ސަރުކާރުގެ ވިސްނުމެއް ނެތެވެ. ފިނޭންސުން ބުނެފައި ވަނީ ޓާގެޓުކޮށް އަސާސީ ޕެންޝަން ލިބިގެން ދާނީ އަލަށް ޕެންޝަން ލިބޭ މީހުންނަށް އެކަނި ކަމަށެވެ.
ފިނޭންސުން ބުނި ގޮތުގައި، މި ބަދަލުތަކުގެ ބަަބުން ދައުލަތުގެ ޕެންޝަނުގެ އިނާޔަތަށް ކުރާ ހަރަދުތައް ވަކި މިންގަނޑެއްގައި ހިފެހެއްޓި މަސައްކަތްތެރިންގެ މެދުގައި އެއް ހަމަ ގޮތެއްގައި ކުރިއަަށް އޮތް ތަނުގައި ތަންފީޒު ކުރެވިގެންދާނެ އެވެ.
ހަމަ އެހެންމެ މި ބަދަލަކީ ހައްގުވެރިންނަށް ލިބޭ ޕެންޝަންގެ އިނާޔަތަށް އުނިކަމެއް ނުގެނެސް، ދައުލަތުގެ މާލީ ހާލަތު ރަނގަޅުކޮށް ރާއްޖޭގެ ފިސްކަލް ނިޒާމު ދެމެހެއްޓެނިވި ނިޒާމަކަށް ބަދަލުކުރުމަށް އެޅިގެންދާނެ މުހިންމު ފިޔަވަޅުތަކުގެ ތެރޭގައި ހިމެނޭ ކަމެއްގެ ގޮތުގައި ފިނޭންސުން ފާހަގަކުރި އެވެ.
