ދައުލަތަށް ޑޮލަރުން ދައްކަން ޖެހޭ ޓެކްސްތަކާއި ފީތަކާއި ބިމު ކުލިން އަންނަ އަހަރު ބިލިއަން ޑޮލަރަށް ވުރެ ބޮޑު އާމްދަނީއެއް ލިބޭނެ ކަމަށް ފިނޭންސް މިނިސްޓްރީން އަންނަ އަހަރަށް ލަފާކޮށްފައިވާ ބަޖެޓުން ދައްކައިފި އެވެ.
ޑޮލަރުން ލިބޭ އާމްދަނީގެ ތެރޭގައި ހިމެނެނީ ޓޫރިޒަމް ދާއިރާއިން ނަގާ ޓޫރިޒަމް ގުޑްސް އެންޑް ސާވިސަސް ޓެކްސް (ޓީޖީއެސްޓީ) އާއި ގްރީން ޓެކްސް އާއި އެއާޕޯޓު ޑިޕީޗާ ޓެކްސް (އޭޑީޓީ) ގެ އިތުރުން ޓޫރިޒަމްގެ ބޭނުމަށް ދޫކޮށްފައިވާ ތަންތަނުން ލިބޭ ބިމު ކުއްޔާއި އެއާޕޯޓު ޑިވެލޮޕްމަންޓް ފީ (އޭޑީއެފް) އެވެ.
ބަޖެޓު ފޮތުގައިވާ ގޮތުން އަންނަ އަހަރު މި ދާއިރާތަކުން އާމްދަނީގެ ގޮތުގައި 17.7 ބިލިއަން ރުފިޔާ ލިބޭނެ އެވެ. އެއީ ރަސްމީ އެކްސްޗޭންޗު ރޭޓުގައި ހިސާބުކުރާއިރު، 1.1 ބިލިއަން ޑޮލަރެވެ. އަދި ކުރީގެ ބަޖެޓު ފޮތްތަކުން ފެންނަން ހުރި އަދަދުތަކާ އަޅާކިޔާއިރު، އެއް ބިލިއަން ޑޮލަރުގެ އާމްދަނީއެއް ލިބޭނެ ފުރަތަމަ އަހަރެވެ.
ޑޮލަރުން ލިބޭ އާމްދަނީ
- 2023 - 876 މިލިއަން ޑޮލަރު
- 2024 - 914.9 މިލިއަން ޑޮލަރު
- 2025 - 1.1 ބިލިއަން ޑޮލަރު
ޑޮލަރު އާމްދަނީގެ ގޮތުގައި ލިބޭނެ ކަމަށް އަންދާޒާކުރާ އަދަދުގެ ދެ ބައި ކުޅަ އެއް ބަޔަށް ވުރެ ބޮޑު ބަޔެއް ހިއްސާކުރަނީ ޓީޖީއެސްޓީ އެވެ. ޓީޖީއެސްޓީގެ ގޮތުގައި 9.9 ބިލިއަން ރުފިޔާ ލިބޭނެ ކަމަށް އަންދާޒާކޮށްފައިވާއިރު، ޑޮލަރުން ބަލާކަމުގައި ވަނީ ނަމަ އެއީ 642 މިލިއަން ޑޮލަރެވެ.
ކުރީ އަހަރުތަކަށް ވުރެ އަންނަ އަހަރު ޑޮލަރުން ލިބޭ އާމްދަނީ އިތުރުވާނެ ކަމަށް ލަފާކުރާ ސަބަބަކީ ޓޫރިސްޓުން އަންނަ އަދަދާއެކީ އަންނަ އިތުރުވުމާ އެކީ، އަންނަ އަހަރުގެ ތެރޭގައި ބައެއް ޓެކްސްތަކާއި ފީތަކަށް ގެންނަ ބަދަލުތަކެވެ. އޭގެ ތެރޭގައި ހިމެނެނީ:
- އަންނަ ޖޫން މަހުން ފެށިގެން ޓީޖީއެސްޓީ 16 ޕަސެންޓުން 17 ޕަސެންޓަށް ބޮޑުކުރުން
- އިކޮނޮމީ ކްލާސް ނޫން ކްލާސްތަކުން ދަތުރުކުރާ ދިވެހިން ނޫން އެންމެންގެ އަތުން ނަގާ ޑިޕާޗާ ޓެކުހާއި ޑިވެލޮޕްމަންޓް ފީ ބޮޑުކުރުން
- އަންނަ ޖެނުއަރީން ފެށިގެން ރިސޯޓުތަކާއި ބޮޑެތި ހޮޓާތަކަށް އަންނަ ކޮންމެ ޓޫރިސްޓެއްގެ އަތުން ގްރީން ޓެކްސްގެ ގޮތުގައި ނަގާ ހަ ޑޮލަރު 12 ޑޮލަރަށް ބޮޑުކުރުން، އަދި 50 ކޮޓަރިއަށް ވުރެ މަދުން ހުންނަ ތަންތަނުން ނަގާ ތިން ޑޮލަރު ހަ ޑޮލަރަށް ބޮޑުކުރުން
ޓެކްސްތަކާއި ފީތަކުގެ އިތުރުން، ޑޮލަރުން އާމްދަނީ ލިބޭ މީހުންނާއި ވިޔަފާރިތަކުން އިންކަމް ޓެކްސް ވެސް މިހާރު ދައްކަން ޖެހެނީ ޑޮލަރުންނެވެ. މިހެންކަމުން މި ދާއިރާތަކުން ވެސް ސީދާ ޑޮލަރު ދައުލަތަށް ރަނގަޅު އާމްދަނީއެއް ލިބޭނެ އެވެ. އެކަމަކު ބަޖެޓުގައި މި ދާއިރާތަކުން ލިބޭނެ ޑޮލަރު އާމްދަނީ ވަކިން ފެންނަ ގޮތަށް އަންދާޒާތައް ނުހިމަނަ އެވެ.
