ލަންޑަން (ނޮވެމްބަރު 2) - މެންޗެސްޓާ ޔުނައިޓެޑްގެ ކުރީގެ ފޯވާޑް، ޑްވައިޓް ޔޯކް އަށް އޭނާގެ ގައުމު ކަމަށްވާ ޓްރިންޑާޑް އެންޑް ޓޮބާގޯގެ ކޯޗުކަން ދީފި އެވެ.
ޓްރިންޑާޑް ޓީމަށް 72 މެޗު ކުޅެދީފައިވާ، ޔޯކް، 52، ވަނީ 2006 ވަނަ އަހަރު ޖަރުމަނުގައި ބޭއްވި ފީފާ ވޯލްޑް ކަޕްގައި ޓްރިންޑާޑް ޓީމުގެ ކެޕްޓަންކަން ވެސް ކޮށްފަ އެވެ. ޓްރިންޑާޑް ޓީމަށް 1989 އިން 2009 އާ ހަމައަށް ކުޅުމަށް ފަހު ރިޓަޔާކުރި ޔޯކް ވަނީ އެ ޓީމަށް 19 ގޯލު ޖަހައިދީފަ އެވެ.
ކުޅުމުން ރިޓަޔާކުރުމަށް ފަހު ކުރު މުއްދަތެއްގައި ޔޯކް ވަނީ 2009 ވަނަ އަހަރު ޓީމުގެ އެސިސްޓަންޓް ކޯޗެއްގެ ގޮތުގައި މަސައްކަތްކޮށްފަ އެވެ. މިއީ، ފުލް ޓައިމް ކޯޗެއްގެ ގޮތުގައި ޔޯކްގެ ދެ ވަނަ މަސައްކަތެވެ. މީގެ ކުރިން، އޭނާ ވަނީ އޮސްޓްރޭލިއާގެ އޭ ލީގުގައި، 2022/2023 ވަނަ ސީޒަނުގައި، މެކަތާގެ ކޯޗަކަށް ހުރެފަ އެވެ.
ޔޯކް ބުނީ ގައުމީ ޓީމުގެ ކޯޗުކަން ކުރުމަކީ ލިބުނު ފަހުރެއް ކަމަށެވެ.
"މީގެ ކުރިން 2000 ވަނަ އަހަރު ކޮންކަކަފް ގޯލްޑް ކަޕްގެ ސެމީ ފައިނަލަށް ގެންދިއުމާއި 2006 ވަނަ އަހަރު ވޯލްޑް ކަޕްގެ ޓީމުގެ ކެޕްޓަންކަން ކުރުމާއި ޓީމުގެ އެސިސްޓަންޓް ކަން ކުރުމަކީ ވެސް ފަހުރުވެރި ކަންތައް. ދެން، މި ފަހަރު ހެޑް ކޯޗަކަށް ހުންނަން މި ލިބުނު ފުރުސަތަކީ ވެސް ބޮޑު އުފަލެއް، ފަހުރެއް،" ޔޯކް ބުންޏެވެ.
މެކަތާގެ ކޯޗަކަށް ހުރިއިރު، ޔޯކް ވަނީ 19 މެޗުގެ ތެރެއިން 10 މެޗުން މޮޅުވެފަ އެވެ. އަދި އެ ޓީމާ އެކު، އޮސްޓްރޭލިއަން ކަޕް ކާމިޔާބުކުރި އެވެ.
