އަންނަ އަހަރަށް ލަފާކުރާ ފިނޭންސް މިނިސްޓްރީން ރައްޔިތުންގެ މަޖިލީހަށް ހުށަހަޅާ ދައުލަތުގެ ބަޖެޓުގެ ޖުމުލަ އުޅެނީ ގާތްގަނޑަކަށް 56 ބިލިއަން ރުފިޔާގައި ކަން އެނގިއްޖެ އެވެ.
ރައީސް ޑރ. މުހައްމަދު މުއިއްޒުގެ ސަރުކާރުން ތައްޔާރުކޮށް ރައްޔިތުންގެ މަޖިލީހަށް ހުށަހަޅާ ފުރަތަމަ ބަޖެޓާ ގުޅޭ ޕްރެޒެންޓޭޝަން، ރައްޔިތުންގެ މަޖިލީހުގެ މެންބަރުންނަށް އިއްޔެ ހަވީރު މުލިއާގޭގައި ވަނީ ދީފަ އެވެ. އެ ބައްދަލުވުމުގައި ބައިވެރިވެވަޑައިގެންނެވި ބައެއް މެންބަރުން ވިދާޅުވީ ރެކޯޑު އަދަދުގެ އެ ބަޖެޓުގެ ދަރަނި އުޅެނީ 16 ބިލިއަން ރުފިޔާގައި ކަމަށެވެ.
އަންނަ އަހަރު 56 ބިލިއަން ރުފިޔާ ހަރަދުވާނެ ކަމަށް ލަފާކުރާއިރު، އާމްދަނީގެ ގޮތުގައި ލިބޭނީ 40 ބިލިއަން ރުފިޔާ ކަމަށް ޑްރާފްޓު ބަޖެޓުގައި ހިމަނާފައިވާ ކަމަށް ވެސް މެންބަރުން ވިދާޅުވި އެވެ.
ފިނޭންސް މިނިސްޓްރީން އާންމުކޮށްފައިވާ ފިސްކަލް ސްޓްރެޓަޖީގައިވާ ގޮތުގައި އަންނަ އަހަރުގެ ބަޖެޓު ހުންނާނެ ކަމަށް ލަފާކުރަނީ 54.8 ބިލިއަން ރުފިޔާގަ އެވެ. އޭގެ ތެރެއިން ހަރަދު ހުންނާނެ ކަމަށް ލަފާކޮށްފައި ވަނީ 46.6 ބިލިއަން ރުފިޔާގަ އެވެ. އަދި އާމްދަނީއަށް ލިބޭނެ ކަމަށް އަންދާޒާކޮށްފައި ވަނީ 41.2 ބިލިއަން ރުފިޔާ އެވެ.
އަންނަ އަހަރު އެންމެ ބޮޑު އަމާޒެއް ހިފާފައި ވަނީ ބޯހިޔާވަހި ކަމަށެވެ. ފްލެޓު އަޅަން 1.5 ބިލިއަން ރުފިޔާ ހާއްސަކުރަން ނިންމާފައި ވާއިރު، ބޯހިޔާވަހިކަމުގެ ލޯނަށް އެއް ބިލިއަން ރުފިޔާ ކަނޑައެޅުމަށް ވިސްނާފައިވާ ކަމަށް، "އަދަދު" އާ ވާހަކަ ދެއްކި ޕީއެންސީ އަށް ނިސްބަތްވާ މަޖިލީހުގެ މެންބަރަކު ވިދާޅުވި އެވެ.
ހިނގަމުންމިދާ 2024 އަށް ފާސްކުރީ 49.8 ބިލިއަން ރުފިޔާގެ ބަޖެޓެވެ. ނަމަވެސް ހަރަދު މެނޭޖު ނުކުރެވިގެން 5.1 ބިލިއަން ރުފިޔާ އިތުރަށް ހަރަދުކުރުމަށް މިއަދު މަޖިލީހުން ވަނީ ފާސްކޮށްފަ އެވެ. ފާސްކުރި ސަޕްލިމެންޓަރީ ބަޖެޓާއެކު މިއަހަރުގެ ދައުލަތުގެ ބަޖެޓު 55 ބިލިއަން ރުފިޔާއަށް އަރައެވެ.
މާލިއްޔަތާ ބެހޭ ގާނޫނުގައި ބަޔާންކޮށްފައިވާ ގޮތުން ކުރިއަށް އޮތް އަހަރަށް ލަފާކުރާ ދައުލަތުގެ ބަޖެޓު، ހިނގަމުންދާ އަހަރުގެ އޮކްޓޯބަރު މަހުގެ ނިޔަލަށް، ފިނޭންސް މިނިސްޓަރު ރައްޔިތުންގެ މަޖިލީހަށް ހުށަހަޅަންޖެހެ އެވެ. އެހެންވެ މި ބުރާސްފަތި ދުވަހު 2025 ގެ ބަޖެޓު މަޖިލީހަށް ހުށަހަޅާނެ އެވެ.
