ދަތުރުފަތުރުގެ ހިދުމަތް ދިނުމަށް ދީބާޖާ އިންވެސްޓްމަންޓްސްއާ އެކީ ދިވެހި ސަރުކާރުން ވެފައިވާ އެއްބަސްވުން ބާތިލުކުރި މައްސަލައިގައި، ކުރީ ސަރުކާރުގެ ސެޓްލްމަންޓް ކޮމިޓިގެ ލަފާގެ މަތިން ގެއްލުމުގެ ބަދަލުގައި ގޮތުގައި 64 މިލިއަން ރުފިޔާ ދިނީ ގޯސްކޮށް ކަމަށް އޮޑިޓު އޮފީހުން ބުނެފި އެވެ.
ދިބާޖާއަށް ބަދަލު ދިން މައްސަލައިގަ އޮޑިޓާ ޖެނެރަލް އޮފީހުން ކުރި ހާއްސަ އޮޑިޓަކަށް ފަހު ނެރުނު ރިޕޯޓުގައިވާ ގޮތުގައި، އެ ކުންފުންޏަށް ބަދަލުގެ ގޮތުގައި ދޭނެ އަދަދު ކަނޑައެޅީ އެއްބަސްވުން ދެމި އޮތް މުއްދަތުގެ ތެރޭގައި އެ ކުންފުނިން ކުރި ހަރަދުތަކާއި އެ ކުންފުނީގެ މާލީ ހިސާބުތަކަށާއި އެއްބަސްވުމުގެ ދަށުން އެ ކުންފުންޏަށް ލިބުނު އެހެން މާލީ މަންފާތަކަށް ރިއާޔަތްނުކޮށް ކަމަށެވެ.
ސެޓްލްމަންޓް އެއްބަސްވުމުގައި އޮތީ، ކެޕިޓަލް އިންވެސްޓްމަންޓުގެ ބަދަލުގެ ގޮތުގައި 14.7 މިލިއަން ރުފިޔާ އަދި އެއްބަސްވުން ދެމި އޮތް މުއްދަތުގެ ތެރޭގައި ހިދުމަތް ފޯރުކޮށްދީގެން ލިބުނު ގެއްލުމުގެ ބަދަލުގެ ގޮތުގައި 49.5 މިލިއަން ރުފިޔާ ދީބާޖާއަށް ދިނުމަށެވެ. މި އަދަދުތަކަކީ ދީބާޖާއިން ހުށަހެޅި އަދަދުތަކެވެ. އޮޑިޓުގައި މައްސަލައެއްގެ ގޮތުގައި ފާހަގަކުރީ، ހަމައެކަނި އެ ކުންފުނިން ހުށަހެޅި އަދަދުތަކުގެ މައްޗަށް ބަލާފައި ބަދަލުގެ އަދަދު ކަނޑައަޅާފައި އޮތުމެވެ.
ކެޕިޓަލް އިންވެސްޓްމަންޓުގެ ގޮތުގައި ދީބާޖައިން ހުށަހެޅި އަދަދުގެ ތެރޭގައި ހިމެނެނީ، 12 ފެރީ ބަނުމުގެ ހަދާފައިވާ ކޮންޓްރެކްޓުގެ އަގު ކަމުގައިވާ 11.9 މިލިއަން ރުފިޔާ އާއި އެ އުޅަނދުތައް ބަންނަން ރާއްޖެއަށް އެެތެރެކުރި މުދަލުގެ އަގަށްވާ 2.7 މިލިއަން ރުފިޔާ އެވެ.
ބަދަލުގެ ތެރޭގައި މި ފައިސާ އެއްކޮށް ހިމެނިއިރު، އޮޑިޓުގައި ވަނީ ފެރީ ބަނުމުގެ ކޮންޓްރެކްޓުގެ ޖުމްލަ އަގު ނަގައިނުދެވޭނެ ކަމަށެވެ. އަދި މަސައްކަތް ހަވާލުކުރި ފަރާތަށް ދީބާޖާއިން އެއްވެސް ފައިސާއެއް ދިން ކަން ކަށަވަރު ނުވާ ކަމަށް ވެސް އޮޑިޓުގައި ވެ އެވެ. ހަމަ އެހެންމެ، މުދަލުގެ ޖުމްލަ އަގު ދިންއިރު، އެ މުދާ ވިއްކައިގެން އެއްވެސް މަންފާއެއް ލިބުނުކަން ނުވަތަ ނޫންކަން ކަށަވަރުކޮށްފައި ނުވާ ކަމަށް އޮޑިޓަރުން ފާހަގަކޮށްފައި ވެ އެވެ.
ހިދުމަތް ދިނުމުގެ އަގުގެ ބަދަލުގެ ގޮތުގައި ދިން ތިން އަހަރަށް އަންދާޒާ ކުރި އަދަދަކީ ވެސް ދީބާޖާއިން ކުރި އަންދާޒާތަކުގެ މައްޗަށް ކަނޑައެޅި އަދަދެކެވެ. އޮޑިޓުގައިވާ ގޮތުގައި މި ފައިސާގެ އަދަދަކީ އެ މުއްދަތުގެ ތެރޭގައި ދަތުރުފަތުރުގެ ހިދުމަތް ދިނުމަށް ހިނގާފައިވާ އެކްޗުއަލް ހަރަދެއް ދައްކުވައިދޭ އަދަދެއް ނޫން ކަން ފާހަގަކުރެވޭ ކަމަށެވެ. އަދި ދީބާޖާއިން ހުށަހެޅި ގިނަ މާލީ ހިސާބުތަކަކީ އޮޑިޓުކޮށްފައިވާ ހިސާބުތަކެއް ނޫން ކަމަށް ވެސް އޮޑިޓުގައި ބުނެފައިވެ އެވެ.
ދީބާޖާއާ އެކީ ސޮއި ކުރި އެއްބަސްވުމުގެ ދަށުން ކްރޮސް ސަބްސިޑީގެ ގޮތުގައި ދޫކުރި ރ. ކުޑަކުރަތުގެ ލީސް ވިއްކާލައިގެން އެ ކުންފުންޏަށް 65.5 މިލިއަން ރުފިޔާ ލިބިފައިވެ އެވެ. މިއީ އެ ކުންފުންޏަށް ގެއްލުމުގެ ބަދަލުގެ ގޮތުގައި ލިބުނު ފައިސާއަށް ވުރެ ބޮޑު އަދަދެކެވެ. އޮޑިޓުގައި ބުނީ، މިއަށް ރިއާޔަތްކުރާއިރު އެ ކުންފުންޏަށް ލިބުނު މާލީ ގެއްލުންތަކަށް ވުރެ ލިބުނު މާލީ މަންފާ ބޮޑުކަން ފާހަގަކުރެވޭ ކަމަށެވެ.
ސެޓްލްމަންޓް އެއްބަސްވުމުގެ ދަށުން، ގިނަ އަދަދެއްގެ ފައިސާތަކެއް ދީބާޖާއަށް ދޭން ނިންމިއިރު، އެ ކުންފުންނަށް ލިބުނު ގެއްލުމުގެ އަށް ވުރެ ގިނައިން ދީފައިވާ ފައިސާ އަނބުރާ ހޯދުމަށާއި، އެ ކުންފުންޏަށް ދޭން ނުޖެހޭ ފައިސާތަކެއް ދިނުމުގައި ޒިންމާވާ މީހުންނަށް ފިޔަވަޅު އެޅުމަށް ޓަކައި އެ މައްސަލަ ތަހުގީގު ކުރުމަށް އޮޑިޓަރު ލަފާ ދީފައިވެ އެވެ.
