ހެލްސިންކީ، ފިންލެންޑް (އޮކްޓޫބަރު 14) - ޔުއެފާ ނޭޝަންސް ލީގުގައި ރޭ ކުޅުނު މެޗުގައި ފިންލެންޑް އަތުން 3-1 އިން އިންްގްލެންޑް މޮޅުވި މެޗަށް ފަހު، އެ ޓީމުގެ ކޯޗުގެ މަގާމާ ބެހޭގޮތުން، ވަގުތީ ކޯޗު ލީ ކާސްލީ ހަގީގަތް ހާމަކޮށްފި އެވެ.
ކާސްލީގެ ކޯޗުކަމުގައި އިންގްލެންޑުން ކުޅުނު ފުރަތަމަ ދެ މެޗުގައި ފިންލެންޑާއި އަޔަލެންޑް އަތުން މޮޅުވި އެވެ. އެހެންވެ، އިންގްލެންޑްގެ ކޯޗުކަން ދާއިމީ ކޮންޓްރެކްޓެއްގައި ކާސްލީ އަށް ދޭން މީޑިއާގައި ވާހަކަތަކެއް ދެކެވިފައި އޮއްވައި، އިންގްލެންޑުން ވަނީ ގްރީސް އަތުން އަމިއްލަ ދަނޑުގައި ބަލިވެފަ އެވެ. އެ ނަތީޖާގެ މާޔޫސްކަމުން އަރައިގަނެ، އިންގްލެންޑުން ރޭ ފިންލެންޑް ދަނޑުގައި މޮޅުވީ އެވެ.
އެ މެޗަށް ފަހު ކާސްލީ ބުނީ ހަގީގަތަށް ބުނާނަމަ އޭނާ އަކީ އަދި އިންގްލެންޑަށް އެންމެ އެކަށޭނެ ކޯޗެއް ނޫން ކަމަށެެވެ.
"އިންގްލެންޑަށް ބޭނުންވަނީ ވޯލްޑް ކްލާސް (ދުނިޔޭގެ ފެންވަރުގެ) ކޯޗެއް. ތަށި ހޯދައި ފެންވަރު ސާބިތުކޮށްދީފައިވާ ކޯޗެއް. އަހަރެން އަދި މި ދަނީ އެ މިސްރާބުން. އެހެންވީމަ، ޔަގީނުން ވެސް އަހަންނަކީ އެންމެ ރަނގަޅު ކޯޗޭ ނުބުނެވޭނެ،" ކާސްލީ ބުންޏެވެ.
ހިލޭޖެހުމަކުން ލަނޑު ޖެހުމަށް ފަހު ޓްރެންޓް އަލެކްސަންޑަ އާނޯލްޑް އުފާފާޅުކުރަނީ.--- ފޮޓޯ: އޭއެފްޕީ
ރަށުންބޭރުގައި ކުޅުނު އިންގްލެންޑް ޓީމަށް ރޭގެ މެޗުގައި ލީޑުނަގައިދިނީ 18 ވަނަ މިނިޓްގައި އެންޖެލް ގޯމޭސް ދިން ބޯޅައަކުން ޖެކް ގްރީލިޝް އެވެ. އެއް ގޯލުން ކުރީގައި މެޗުގެ ބޮޑުބައިގައި އޮތް އިންގްލެންޑަށް ލީޑުފުޅާކޮށްދިނީ 74 ވަނަ މިނިޓްގައި ހިލޭޖެހުމަކުން ޓްރެންޓް އަލެކްސަންޑަ އާނޯލްޑް އެވެ. އަދި ޑެކްލަަން ރައިސް ވަނީ އޭގެ 10 މިނިޓް ފަހުން އިންގްލެންޑްގެ ތިން ވަނަ ލަނޑު ޖަހައިފަ އެވެ.
ފިންލެންޑުން ހަމައެކަނި ލަނޑު ޖެހީ މެޗުގެ ފުރިހަަމަ ވަގުތު ހަމަވާން ދެ މިނިޓަށް ވެފައި ހުއްޓަ އެވެ. މި ލަނޑު ޖެހީ، އާރްޓޫ ހޮސްކޯނެން އެވެ.
ގްރީސް އިން ރޭ 2-0 އިން އަޔަލެންޑް ބަލިކުރުމާ އެކު، ނޭޝަންސް ލީގުގެ ލީގު ބީގެ ގްރޫޕް ދޭއްގެ އެއް ވަނައިގައި އޮތީ ހަތަރު މެޗުން 12 ޕޮއިންޓާ އެކު ގްރީސް އެވެ. ދެ ވަނައިގައި އޮތް އިންގްލެންޑަށް ނުވަ ޕޮއިންޓް ލިބިފައިވާއިރު، ތިން ވަނައިގައި އޮތް އަޔަލެންޑަށް ވަނީ ތިން ޕޮއިންޓް ލިބިފަ އެވެ. ފިންލެންޑް ފުލުގައި އޮތީ ޕޮއިންޓެއް ނުލިބި އެެވެ.
