ޕެރިސް (ސެޕްޓެމްބަރު 26) - އެކާވީސް ވަނަ ގަރުނުގައި ފެނިގެންދިޔަ އެންމެ މޮޅު އަދި އެންމެ ކާމިޔާބު އެއް ޑިފެންޑަރު، ފްރާންސްގެ ރަފައެލް ވަރާން، އުމުރުން 31 އަހަރުގައި ފުޓްބޯޅައިން ރިޓަޔާކޮށްފި އެވެ.
ވަރާން އެންމެ ފަހުން ކުޅެފައިވަނީ އިޓަލީގެ ކޯމޯ އަށެވެ. ހިލޭ ޓްރާންސްފާއެއްގައި އެ ޓީމަށް ބަދަލުވުމަށް ފަހު ކުޅުނު ފުރަތަމަ މެޗުގައި ކަކުލަށް ލިބުނު އަނިޔާއެއްގެ ސަބަބުން ކުޅުމާ ދުރަށް ދާން ޖެހުމާ ގުޅިގެން، އޭނާ މިހާރު ނިންމާފައިވަނީ، ފުޓްބޯޅައިން ރިޓަޔާުކުރުމަށެވެ.
ކުރިން ރެއާލް މެޑްރިޑަށް ކުޅުނު ވަރާން، މިދިޔަ ސީޒަނުގެ ނިޔަލަށް ޔުނައިޓެޑާ އެކު ހަދާފައިވާ ކޮންޓްރެކްޓް ހަމަވުމުގެ ކުރިން ވެސް ރިޓަޔާކުރުުމުގެ ވާހަކަތައް ދެކެވުނެވެ.
ވަރާން، ނެރުނު ބަޔާނެއްގައި ބުނެފައިވަނީ މީގެ ކުރިން އަނިޔާވާ ކޮންމެ ފަހަރަކު ހިތްވަރުކޮށްފައި ތެދުވެ، އެނބުރި ކުޅުމުގެ ތެރެއަށް އައުމަށް މަސައްކަތް ކޮށްފައިވާ ކަމަށެެ. އެކަމަކު، މި ފަހަރު އެކަން އެގޮތައް ކުރެވެން ނެތް ކަމަށް ވަރާން ވަނީ ބުނެފަ އެވެ.
މީގެ ކުރިން މީޑިއާއަކަށް ދިން އިންޓަވިއުއެއްގައި ވަރާން ވަނީ އޭނާގެ އަނިޔާގެ މައްސަލަތަކާ ގުޅޭގޮތުން ވާހަކަ ދައްކައިފަ އެވެ. އެ ފަހަރު ވަރާން ބުނީ، މިހާރު އަނިޔާވުމުން އަނިޔާއިން އަރައިގަންނަން އުނދަގޫވާ ކަމަށެވެ. އަދި އަނިޔާގެ މައްސަލަ ގިނަވެ، ކުޅުން ހުއްޓާލުމާ މެދު ވިސްނަމުން އަންނަ ކަމަށް އޭނާ އޭރު ބުންޏެވެ.
ވަރާން ވަނީ އޭނާގެ ކެރިޔަރުގައި 22 ތަށި ހޯދައިފަ އެވެ. އޭގެ ތެރޭގައި، ރެއާލް މެޑްރިޑާ އެކު ހޯދި ހަތަރު ޗެމްޕިއަންސް ލީގު ތަށީގެ އިތުރުން ފްރާންސާ އެކު ކާމިޔާބުކުރި 2018 ވަނަ އަހަރުގެ ފީފާ ވޯލްޑް ކަޕް ހިމެނެ އެވެ.
