މީގެ 12 އަހަރު ކުރިން ކ. ކާށިދޫގައި ޑިއުޓީއަށް ނުކުމެ ހުއްޓައި ވަޅިއަކުން ހަމަލާދީ މަރާލި ޕޮލިސް އާދަމް ހަލީމް މަރާލި މައްސަލާގައި ހުކުމް ކޮށްފައިވާ މުހައްމަދު ސަމާހުގެ މައްސަލަ އަލުން ބެލުމަށް ސުޕްރީމް ކޯޓުން ކްރިމިނަލް ކޯޓަށް އަމުރުކޮށްފި އެވެ.
ޖުލައި 23، 2012 ގައި ހިނގި އެ ހާދިސާއާ ގުޅިގެން ކ. ކާށިދޫ، ސުވާސާގޭ މުހައްމަދު ސަމާހުގެ މައްޗަށް ކުށް ސާބިތުވާ ކަމަށް ކަނޑައަޅައި އޭނާ މަރާލުމަށް ކްރިމިނަލް ކޯޓުން ހުކުމް ކުރީ 2013 ވަނަ އަހަރުގެ ތެރޭގަ އެވެ. ހައި ކޯޓުން އެ ހުކުމް ދެމެހެއްޓީ ސެޕްޓެމްބަރު 30، 2020 ގަ އެވެ.
ނަމަވެސް، ސުޕްރީމް ކޯޓުން މިއަދު ކުރި ހުކުމުގެ ސަބަބުން ސަމާހުގެ މައްޗަށް ކުށް ސާބިތުވާ ކަމަށް ކަނޑައަޅައި އޭނާ މަރާލުމަށް ކްރިމިނަލް ކޯޓުން ކުރި ހުކުމާއި ހައި ކޯޓުން ދެމެހެއްޓި އެ ހުކުމް ބާތިލުވެ އޭނާ ވަނީ މިނިވަންވެފަ އެވެ.
މިއަދުގެ ޝަރީއަތު މަޖިލީހުގައި ކުރި ހުކުމުގައި ވަނީ ސަމާހުއަށް އަނިޔާކުރިކަން އެނގޭނެ ހެކިން ތިބިކަމަށާއި އެ ހެކިން ޝަރީއަތުގެ މަޖިލީހަށް ހާޒިރުކުރުމަށް އެދޭ ކަމަށް ކްރިމިނަލް ކޯޓާއި ހައި ކޯޓުގައި ސަމާހުގެ ފަރާތުން ބުނެފައިވާކަން އެނގޭ ކަމަށެވެ.
އެހެންކަމުން އެފަދަ ހެކިން ތިބި ނަމަ އެ ހެކިން ކްރިމިނަލް ކޯޓުގެ ޝަރީއަތުގެ މަޖިލީހަށް ހާޒިރުކުރުމުގެ ފުރުސަތު ސަމާހުއަށް ދިނުމަށެވެ.
އޭގެއިތުރުން ސަމާހުގެ ބަޔާނުގެ ބޭރުން އެހެން މިނިވަން މުސްތަގިއްލު ހެއްކާއި ގަރީނާ ހުށަހެޅުމަށް ޕްރޮސްކިއުޓާ ޖެނެރަލްއަށް ދިނުމަށް އެއްކޮށް މި މައްސަލަ އިތުރަށް ތަހުލީލު ކުރުމަށް ކްރިމިނަލް ކޯޓަށް އަންގާ ކަމަށެވެ.
ސުޕްރީމް ކޯޓުގައި މި މައްސަލަ ބެއްލެވީ ފަސް ފަނޑިޔާރުންގެ ބެންޗަކުންނެވެ. ފަނޑިޔާރު ހުސްނުއްސުއޫދުގެ އިތުރުން ދެން ތިއްބެވީ، ފަނޑިޔާރު ޑރ. އަޒްމިރަލްދާ ޒާހިރާއި، ފަނޑިޔާރު އައިޝާ ޝުޖޫން މުހައްމަދާއި، ފަނޑިޔާރު މަހާޒް އަލީ ޒާހިރާއި، ފަނޑިޔާރު ޑރ. މުހައްމަދު އިބްރާހީމެވެ. ރިޔާސަތު ބެލެހެއްޓެވީ ސުއޫދު އެވެ.
