ބ. އޭދަފުށީގައި މިހާރު ކުރިއަށްދާ ކްލަބް ކޮމްބިނޭޝަން (ސީސީ) އިންޓަ ރިސޯޓް ކްރިކެޓް މުބާރާތުގެ ގްރޫޕް އޭގައި ކުޅުނު ތިން މެޗުން ވެސް މޮޅުވެ، އަމިއްލަ މޯލްޑިވްސް އިން ސެމީ ފައިނަލުން ފުރުސަތު ހޯދައިފި އެވެ.
ގްރޫޕް އޭގައި ވާދަކުރާ އަމިއްލަ އިން ގްރޫޕްގެ ފަހު މެޗުގައި، އިއްޔެ ފިނޮޅު ބަލިކުރީ އަށް ވިކެޓުންނެވެ. ފުރަތަމަ ދެ މެޗުން މޮޅުވެގެން މި ދެ ޓީމަށް ވެސް ވަނީ ސެމީ ފައިނަލުން ފުރުސަތު ލިބިފަ އެވެ.
އިއްޔެގެ މެޗުގައި، އަށް އޯވަރުގެ ތެރޭގައި، ފިނޮޅަށް ހަތް ވިކެޓަށް ހެދުނީ 80 ލަނޑެވެ. އަމިއްލަ އިން މޮޅުވީ، 6.5 އޯވަރުގެ ތެރޭގައި، ދެ ވިކެޓަށް 81 ލަނޑު ހަދައިގެންނެވެ. މި މެޗުގެ މޮޅު ކުޅުންތެރިއަކީ، ފިނޮޅު ޓީމުގެ، ޔަސަންތާ އެވެ.
މި ގްރޫޕްގެ ފަހު މެޗުގައި، މިއަދު، މިލައިދޫ އާއި އަނަންތަރާ ބައްދަލުކުރާނެ އެވެ. މި ދެ ޓީމަށް ވެސް މުބާރާތުގައި ކުރިއަށްދިއުމުގެ ފުރުސަތެއް ނެތެވެ.
ގްރޫޕް ބީގެ ސެމީ ޖާގަތައް ސޮނޭވާފުށިންނާއި ދުސިތުން ވަނީ ޔަގީންކޮށްފަ އެވެ.
ގްރޫޕް ބީގައި އިއްޔެ ކުޅުނު މެޗުން، އަށް ވިކެޓުން ރޯޔަލް އައިލެންޑް ރިސޯޓް ބަލިކޮށް، ސޮނޭވާފުށިން ވަނީ ދެ ވަނަ މޮޅު ހޯދައި، ސެމީގެ އުންމީދު ބޮޑުކޮށްފަ އެވެ. ރޯޔަލް އިން މި މެޗުގައި ކުޅެން އަރައި 8 އޯވަރުގެ ތެރޭގައި ފަސް ވިކެޓަށް 97 ލަނޑު ހެދި އެވެ. ސޮނޭވާފުށި މޮޅުވީ، 6.3 އޯވަރުގެ ތެރޭގައި ދެ ވިކެޓަށް 98 ލަނޑު ހަދައިގެންނެވެ. މެޗުގެ މޮޅު ކުޅުންތެރިއަކީ، ސޮނޭވާފުށި ޓީމުގެ ސުޕުން އެވެ.
ގްރޫޕް ބީގެ ސެމީ އަށް ދާ ޓީމުތައް އެތުރޭނެ ގޮތެއް ކަށަވަރުވާނީ މިއަދު ދުސިތު އާއި އަވަނި ބައްދަލުކުރާ މެޗުގެ ނަތީޖާ އިންނެވެ.
