ރާއްޖޭން ބޭރުގައި ކުރާ ވިޔަފާރިން ގަންނަ މުދަލާއި ހިދުމަތްތަކުން ޖީއެސްޓީ ނެގޭ ގޮތަށް އަންނަ އަހަރުގެ ވަކި ހިސާބަކުން ޖީއެސްޓީ ނިޒާމު ޑެސްޓިނޭޝަން ޕްރިންސިޕަލްއަށް ބަދަލުކުރަން ސަރުކާރުން ނިންމައިފި އެވެ.
ފިނޭންސް މިނިސްޓްރީން އެކުލަވާލާފައިވާ މެދުރާސްތާގެ ދައުލަތުގެ އާމްދަނީގެ އިސްތިރާޖު (ސްޓްރެޓެޖީ) ގައި އޮތް ގޮތުގައި، ސަރުކާރުގެ ވިސްނުމަކީ ޖީއެސްޓީ ގާނޫނު ބަދަލުކޮށްގެން ޑެސްޓިނޭޝަން ޕްރިންސިޕަލް ފުރިހަމައަށް ތަންފީޒުކުރުމެވެ.
ޑެސްޓިނޭޝަން ޕްރިންސިޕަލްއަށް ބަދަލުކުރުމުން ދިވެހިން އާންމުކޮށް ވިޔަފާރިކުރާ "ޝީއެން" އާއި "އެމޭޒަން" ފަދަ ވެބްސައިޓުތަކުންނާއި "ނެޓްފްލިކްސް" އާއި "ސްޕޮޓިފައި" ފަދަ ސްޓީރިމިން ހިދުމަތްތައް ބޭނުންކުރާނަމަ ރާއްޖޭގައި މުދަލާއި ހިދުމަތްތަކުން ނަގާ އަށް ޕަސެންޓު ޖީއެސްޓީ ދައްކަން ޖެހޭނެ އެވެ.
titledesc
އޭގެ އިތުރުން ރާއްޖެ އަންނަ ޓޫރިސްޓުން ގެސްޓުހައުސްތަކާއި ހޮޓާތަކާއި ރިސޯޓުތައް ބުކް ކުރަން ބޭނުންކުރާ "ބުކިން" އާއި "އަގޯޑާ" އާއި "އެއާބީއެންބީ" ފަދަ ސައިޓުތަކުން ޓީޖީއެސްޓީ ކަނޑައެޅިފައި އޮންނަ 16 ޕަސެންޓު ރޭޓުގައި ޓެކްސް ދައްކަން ޖެހޭނެ އެވެ.
ފިނޭންސް މިނިސްޓްރީން ބުނާ ގޮތުގައި ޑެސްޓިނޭޝަން ޕްރިންސިޕަލް ފުރިހަމައަށް ތަންފީޒުކުރުމުން ޓެކްސް ބޭސް ފުޅާކުރެވޭނެ އެވެ. އެއާ އެކީ ދައުލަތުގެ އާމްދަނީއަށް ރަނގަޅު ކުރިއެރުމެއް ލިބޭނެ ކަމަށް މިނިސްޓްރީގެ އަންޒާދާތަކުގައިވެ އެވެ. އެެއީ:
- 2025 - 666.7 މިލިއަން ރުފިޔާ
- 2026 - 850 މިލިއަން ރުފިޔާ
- 2027 - 915.8 މިލިއަން ރުފިޔާ
ސަރުކާރުން ވިސްނަނީ އަންނަ އަހަރުގެ ދެވަނަ ކުއާޓަރުން ފެށިގެން ޑެސްޓިނޭޝަން ޕްރިންސިޕަލް ތަންފީޒުކުރާށެވެ.
