ކ. ތުލުސްދޫގައި މިހާރު ކުރިއަށްދާ އޭޝިއަން ސާފިން ޗެމްޕިއަންޝިޕުގައި ދިވެހި ޓީމުގެ އެތުލީޓުން ތިން ވަނަ ބުރުން ޖާގަ ހޯދުން އެއީ އަދި ފެށުމެއް ކަމަށާއި، މުޅި ޓީމު އޮތީ ކާމިޔާބީއަށް ވާސިލްވުމަށް ވަރަށް ފޯމުގައި ކަމަށް ރާއްޖެ ޓީމުގެ ކެޕްޓަން އަހުމަދު އާގިލް (އަންމަޑޭ) ބުނެފި އެވެ.
މުބާރާތުގެ ފުރަތަމަ ބުރުގައި އަންމަޑޭ ވާދަކުރި ހީޓުން ތިން ވަނަ އަށް ދިޔުމުން އޭނާ ޖެހުނީ މިއަދު ކުރިއަށް ދިޔަ ރެޕޯ ހީޓުގައި ވާދަކުރާށެވެ. އެކަމަކު، މިއަދު ކުރިއަށްދިޔަ ރެޕޯ ހީޓުގެ އެއް ވަނަ ހޯދައި އައްމަޑޭ ވަނީ ތިން ވަނަ ބުރަށް ދަތުރުކޮށްފަ އެވެ.
"އަދަދު ސްޕޯޓްސް" އާ ވާހަކަ ދައްކަމުން އަންމަޑޭ ބުނީ، ބޭނުންވީ ރެޕޯ ހީޓުގައި ވާދަނުކޮށް ތިން ވަނަ ބުރުގައި ވާދަކުރަން ކަމަށެވެ. އެކަމަކު، ދެން އޮތް ތިން ވަނަ ބުރުގައި މި އަށް ވުރެ ރަނގަޅު ސްކޯ އެއް ފެންނާނެ ކަމަށް އަންމަޑޭ ހުރީ އުންމީދުގަ އެވެ.
"އަސްލު ބޭނުންވި ގޮތެއް ނޫން ރެޕޯއަށް ދިޔުމަކީ އެކަމަކު ކަން ދިމާކުރި ގޮތުން ރެޕޯ އަށް ދިޔައީ, އެކަމަކު ކުރިއަށް ހުރި ރައުންޑުތަކުގައި މިއަށްވުރެ ރަނގަޅު ސްކޯތަކެއް ފެންނާނެ ކަމަށް ވަރަށް އުންމީދު އެބައޮތް. އަނެއްހެން މީހާ އެއްވެސް ވަރަކަށް ޑައުން އެއް ނުވޭ, އެއްވެސް ޕްރެޝަރެއްވެސް ނެތް. އިރާދަ ކުރެއްވިއްޔާ ކުރިއަށް ހުރި ރައުންޑުގައި ރަނގަޅު ވާނެ." ކ. ތުލުސްދޫ އަށް އުފަން، އަންމަޑޭ، ބުންޏެވެ.
މުޅި ދިވެހި ޓީމު މި ވަގުތު އޮތީ ވަރަށް ފޯމުގައި ކަމަށާއި، މި ގޮތައް ހިފަހައްޓައިފި ނަމަ ރަނގަޅު ވާނެ ކަމަށް އަންމަޑޭ ވަނީ ޔަގީންކަން ދީފަ އެވެ. އަދި އުންމީދަކީ ކުރިއަށްހުރި ހީޓުތަކުގައި ދިވެހި ޓީމުގެ ފަރާތުން ރަނގަޅު ސްކޯތަކެއް ފެނުން ކަމަށް ވެސް އަންމަޑޭ ވަނީ ބުނެފަ އެވެ.
"ކުދި ކުދި މިސްޓޭކުތައް އެބަހުރި ހުރިހާ ކުދިންގެވެސް އެކަމަކު ހީޓް ބައި ހީޓް އެކަންކަން ރަނގަޅު ކުރަމުން ދާނެ. މިވަގުތު ދިވެހި ޓީމު އޮތީ ވަރަށް ފޯމުގައި." އަންމަޑޭ ބުންޏެވެ.
މިއީ، އޭޝިއަން ސާފިން ޗެމްޕިއަންޝިޕް ތުލުސްދޫގައި ޖެހިޖެހިގެން ކުރިއަށްދާ ދެ ވަނަ ފަހަރެވެ. މި ފަހަރުގެ މުބާރާތަކީ، 2026 ވަނަ އަހަރު ޖަޕާނުގައި ބާއްވާ އޭޝިއަން ގޭމްސްގެ ކޮލިފައިން އިވެންޓެކެވެ.
