މިހާރު ކުރިއަށްދާ އޭޝިއަން ސާފިން ޗެމްޕިއަންޝިޕުގެ ޖޫނިއާ ކެޓަގަރީގެ ސެމީ ފައިނަލުން ކަޔާން ޒަކީ ފުރުސަތު ހޯދައި ތާރީހީ ކާމިޔާބެއް ހާސިލްކޮށްފި އެވެ.
ކ. ތުލުސްދޫގައި ކުރިއަށްދާ އޭޝިއަން ސާފިން ޗެމްޕިއަންޝިޕްގެ ޖޫނިއާ ކެޓަގަރީ (18 އަހަރުން ދަށް) ރާއްޖޭގެ ތިން ސާފަރަކު ވާދަކުރި އެވެ. މިއީ، މިހާތަނަށް ރާއްޖޭގެ ޖޫނިއާ ސާފިން އަށް އޭޝިއާ މުބާރާތުގައި އެންމެ ކާމިޔާބު ފަހަރެވެ.
އެ ކާމިޔާބަށް އިތުރު ފުރިހަމަ ކަމެއް ގެނެސްދިނީ މިއަދު މެންދުރު ފަހު، ކުއާޓާ ފައިނަލް ހީޓުގެ ދެ ވަނަ ހޯދައި، ކަޔާން ޒަކީ ސެމީ ފައިނަލަށް ދަތުރުކުރުމެވެ. ކަޔާން ޒަކީ ހީޓު ދޭއްގެ ދެ ވަނަ ހޯދީ، 9.64 ޕޮއިންޓް ހޯދައިގެންނެވެ. އެއް ވަނަ ހޯދި، ފިލިޕީންސްގެ ޓްރޯއި އެސްޕެޖޯން ވަނީ ހަތް ރާޅުގައި އަޅައި، އެންމެ ރަނގަޅު ދެ ރާޅުގެ ސްކޯއިން، 11.10 ޕޮއިންޓް ހަމަކޮށްފަ އެވެ. ކަޔާން ޒަކީ، އަށް ހަތަރު ރާޅުގައި އަޅައިގެން، އެންމެ ރަނގަޅު ދެ ރާޅުގެ ސްކޯއިން، ހަމަކުރެވުނީ، 9.64 ޕޮއިންޓެވެ. މި ހީޓުގެ ތިން ވަނަ ހޯދި، ލަންކާގެ ކަނަޕަތީ ޖޭ އަށް ހަ ރާޅުގައި އަޅައިގެން، އެންމެ ރަނގަޅު ދެ ރާޅުން ސްކޯކުރެވުނީ، 8.06 ޕޮއިިންޓެވެ.
ރާއްޖޭގެ ޖޫނިއާ ޓީމުގެ ކެޕްޓަން، ސައްޔިދު ސަލާހުއްދީން ދިޔައީ، ކުއާޓާގެ ހީޓު ތިނެއްގައި ވާދަކޮށް، ތިން ވަނަ އެވެ. އެ ހީޓުގެ އެއް ވަނަ ހޯދި، އިންޑިއާގެ ކިޝޯރު ކުމާރަށް ވަނީ 11.50 ޕޮއިންޓް ލިބިފަ އެވެ. ދެ ވަނަ ހޯދި ޓައިޕޭގެ ޖޯންޖޯން ޗޭން ވަނީ 8.76 ޕޮއިންޓް ސްކޯކޮށްފަ އެވެ. އަދި ސައްޔިދަށް ހަމަކުރެވުނީ، 7.90 ޕޮއިންޓެެވެ. ސެމީ ފައިނަލަށް ހޮވެނީ، ކޮންމެ ހީޓެއްގެ ގަދަ ދެ އެތުލީޓުންނެވެ. އެހެންކަމުން، ސައްޔިދަށް މުބާރާތް ނިމުނީ އެވެ.
ހީޓު ހަތަރެއްގައި ވާދަކޮށް ރާއްޖޭގެ ކަޔާން އަރީފް (ކައިޕުޓީ) ދިޔައީ ތިން ވަނަ އެވެ. އެ ހީޓުގެ އެއް ވަނަ ހޯދީ 18.10 ޕޮއިންޓް ހޯދި ޖަޕާނުގެ ޓަރޯ ޓަކާއި އެވެ. ދެ ވަނަ ހޯދީ ދެކުނު ކޮރެއާގެ ސެއޯޔުން ޖުން އެވެ. އޭނާ އަށް 9.83 ޕޮއިންޓް ލިބުނެވެ. ރާއްޖޭގެ ކަޔާން އަރީފް ވަނީ އެންމެ ފަހު ވަގުތާ ހަމައަށް ވެސް ހިތްވަރުކޮށްފަ އެވެ. އޭނާގެ އެންމެ ރަނގަޅު ދެ ރާޅުގެ ގޮތުގައި ގުނީ، ތިން ވަނަ ރާޅާއި ހަ ވަނަ ރާޅެވެ. ޖުމްލަ އެކު، ލިބުނީ، 9.17 ޕޮއިންޓެވެ.
