މޯލްޑިވްސް ސާފިން އެސޯސިއޭޝަނުން އަންނަ އަހަރަށް ބޮޑު ފޯކަސް އެއް ހުރި ޒުވާން ސާފަރުންގެ ހުނަރު އިތުރަށް ފައްކާ ކުރުމަށް ކަމަށާއި، އެ ހުނަރު ފައްކާ ކުރުމުގައި ބޮޑު ޒިންމާ އެއް އަދާކުރާނީ ގައުމީ ސާފިން ޓީމުގެ ކޯޗު ހުސެއިން އަރީފް (އިބޫ) ކަމަށް މޯލްޑިވްސް ސާފިން އެސޯސިއޭޝަން (އެމްއެސްއޭ)ގެ ރައީސް މުހައްމަދު ސޮބާހް (ޗޭ) ވިދާޅުވެއްޖެ އެވެ.
ނިމިދިޔަ އޭޝިއަން ސާފިން ޗެމްޕިއަންޝިޕުގައި ރާއްޖޭގެ ޖޫނިއާ ސާފަރުން ވަނީ މުބާރާތުގައި ވާދަކޮށް ރަނގަޅު ނަތީޖާ އެއް ނެރެފަ އެވެ. އެ ގޮތުން ބައިނަލްއަގްވާމީ ބޮޑު މުބާރާތެއްގެ ޖޫނިއާ ކެޓަގަރީގެ ސެމީ ފައިނަލުން ފުރަތަމަ ފަހަރަށް ރާއްޖޭގެ ކަޔާން ޒަކީ ވަނީ ޖާގަ ހޯދައިފަ އެވެ. މި މުބާރާތުގެ ޖޫނިއާ ބައިގެ ކުއާޓާ ފައިނަލުގައި، ރާއްޖޭގެ ތިން ސާފަރުން ވާދަކޮށްފައިވެ އެވެ.
މި ކާމިޔާބީތަކާ އެކު، ރާއްްޖެ ވަނީ އޭޝިއާ ސާފިންގެ ޖޫނިއާ ރޭންކިންގައި ދެ ވަނަ އަށް ޖެހިލައިފަ އެވެ. އެއް ވަނައިގައި އޮތީ ޖަޕާން އެވެ.
"އަދަދު ސްޕޯޓްސް" އަށް ދިން އިންޓަވިއުއެއްގައި ސޮބާހު ވިދާޅުވީ، މިދިޔަ އަހަރު ޖޫނިއާ ސާފަރުން ތަމްރީނުވީ ސައުތު އެފްރިކާގެ ކޯޗު ކްލައިން މާޓިންގެ އިރުޝާދުގެ ދަށުން ކަމަށެވެ. އެކަމަކު، މި އަހަރު އިބޫ އަށް ކޯޗުކަން ހަވާލުކޮށް އޭނާގެ ބޮޑު ފޯކަސް އެއްގެ ގޮތުގައި ޒުވާން ޓީމު ހަވާލުކޮށްފައިވާ ކަމަށެވެ.
އިބޫ، ގައުމީ ސާފިން ޓީމާ ހަވާލުވީ މި އަހަރު ފެބްރުއަރީ މަހުގަ އެވެ.
ޒުވާން ޓީމުން މި ފަހަރުގެ އޭޝިއަން ސާފިން ޗެމްޕިއަންޝިޕްގައި އިބޫގެ އިރުޝާދުގެ މަތިން ހޯދި ކާމިޔާބީއާ އެކު އިތުރު ހަރުފަތެއް މައްޗަށް ޖައްސާލައިފައިވާ ކަމަށް ސޮބާހު ވިދާޅުވި އެވެ.
އޭނާ ވިދާޅުވީ، ކޯޗިން އަށް އިބޫ ނުކުންނަން ނިންމި ހިސާބުން, އެސޯސިއޭޝަނުން އިބޫ އަށް ދޭން ޖެހޭ އެއްބާރުލުން ދެމުން އަންނަ ކަމަށެވެ.
އެ ގޮތުން، މިއީ، އިބޫގެ "ލާނިން ޕްރޮސަސް" (ދަސްކޮށްގެން ކުރިއަށްދިއުމުގެ މަރުހަލާއެއް) އެއް ކަމަށާއި، މިހާރު ވެސް އިބޫ އަންނަނީ ކޯޗިން ކޯހެއް ފުރިހަމަ ކުރަމުން ކަމަށް ސޮބާހުގެ ވާހަކައިގައި ފާހަގަކުރެއްވި އެވެ.
އިބޫ އަކީ މި ރީޖަންގައި ހުރި އެންމެ ވަރުގަދަ ކޯޗަކަށް ވާނެ ކަމާ މެދު ޝައްކު ނުކުރާނެ ކަމަށާއި، އޭނާގެ ތަޖުރިބާއާ އެކު ޒުވާން ސާފަރުން އިތުރަށް ކުރިއަރާނެ ކަމަށް ސޮބާހު ގަބޫލުކުރެ އެވެ.
އަންނަ އަހަރަށް ސާފިން އެސޯސިއޭޝަނުން އެންމެ ބޮޑު ފޯކަސް އެއް ކުރަން ނިންމާފައިވަނީ ޒުވާން ސާފަރުން އުފެއްދުމާއި، މިހާރު ތިބި ސާފަރުންގެ ފެންވަރު މަތި ކުރުމަށެވެ. އެ ދެކަމުގައި ވެސް އެންމެ ބޮޑު ޒިންމާ އެއް ހަވާލުވާނެ ކޯޗަކީ އިބޫ އެވެ. އަދި ރާއްޖޭން ދެން، އެންމެ އަވަހަށް ހޯސްޓްކުރާނެ އިންޓަނޭޝަނަލް ބޮޑު ސާފިން މުބާރާތަކަށް ވެގެންދާނީ، ޖޫނިއާ މުބާެރާތަކަށް ކަމަށް ވެސް ސޮބާހުގެ ވާހަކައިގައި ފާހަގަކުރެއްވި އެވެ.
