ރާއްޖޭގައި މިހާރު ކުރިއަށްދާ އޭޝިއަން ސާފިން ޗެމްޕިއަންޝިޕް 2024 ގެ ފިރިހެން ކެޓަގަރީގެ ޗެމްޕިއަންކަން އިންޑޮނޭޝިއާގެ ޕަޖަރް އަރިޔާނާ ހޯދިއިރު، އަންހެން ކެޓަގަރީގެ ޗެމްޕިއަންކަން ޖަޕާނުގެ މިރާއީ އިކޭޑާ ހޯދައިފި އެވެ.
ކ. ތުލުސްދޫގައި މިއަދު ހަވީރު ކުރިއަށްދިޔަ ފިރިހެން ކެޓަގަރީގެ ޗެމްޕިއަންކަން ޕަޖަރު ހޯދީ، ފައިނަލުގައި ހަމަ އެގައުމުގެ ޖޮއި ސަޓްރިއަވަން, ޖަޕާނުގެ އިކޯ ވަޓަނާބޭ އަދި ޖަޕާނުގެ ޓާކީ ކަނަޒަވާ އާ ވާދަކޮށެވެ.
ފައިނަލް ހީޓުގައި ޕަޖަރް ޖުމްލަ ހަތް ރާޅުއެޅިއިރު، އޭގެ ތެރެއިން އެންމެ މަތިން ސްކޯކުރީ ފުރަތަމަ ރާޅާ ހަ ވަނަ ރާޅުގަ އެވެ. ފުރަތަމަ ރާޅުން، 8.50 ސްކޯކުރިއިރު, ދެ ވަނަ ރާޅުގައި ވަނީ 7.00 ސްކޯކޮށްފަ އެވެ. އެއާ އެކު އޭނާ އަށް ވަނީ ޖުމްލަ މި ހީޓުގައި 15.50 ސްކޯކޮށްފަ އެވެ.
ޕަޖަރް ހީޓު ނިންމާލުމަށްފަހު އުފާފާޅުކުރަނީ -- ފޮޓޯ: އަތޫފް އާތިފް / އަދަދު
ދެ ވަނަ އަށްދިޔަ ސަޓްރިއަވަން ފައިނަލް ހީޓުގައި ޖުމްލަ ތިން ރާޅުގައި އެޅިއިރު، އޭގެ ތެރެއިން އެންމެ މަތިން ސްކޯކުރި ދެ ރާޅުން އޭނާ ވަނީ 14.34 ސްކޯކޮށްފަ އެވެ.
ތިން ވަނަ އަށް ހީޓު ނިންމި, ޖަޕާނުގެ ވަޓަނާބޭ ވަނީ 11.80 ސްކޯކޮށްފަ އެވެ. ފައިނަލް ހީޓުގައި އޭނާ ޖުމްލަ ހަ ރާޅުގައި އެޅި އެވެ. ވަޓަނާބޭ މިދިޔަ އަހަރުގެ މުބާރާތް ނިންމާލީ ދެވަނައިގަ އެވެ.
މީގެ އިތުރުން، މިއަދު ހަވީރު ވަނީ އަންހެން ކެޓަގަރީގެ ފައިނަލް ހީޓު ވެސް ކުރިއަށް ގޮސްފަ އެވެ.
އަންހެން ހީޓު ކާމިޔާބުކޮށް ޗެމްޕިއަންކަން ހޯދި މިރާއީ އަކީ މިދިޔަ އަހަރުގެ ފައިނަލުގައި ވާދަކޮށް ދެ ވަނަ ހޯދި އެތުލީޓެވެ. މިރާއީގެ އިތުރުން މި ހީޓުގައި ދެން ވާދަކުރީ، ޖަޕާނުގެ އަންރީ މަޓްސްނޯ، ޗައިނާގެ ސިގީ ޔަންގް އަދި އިންޑޮނޭޝިއާގެ ޓައިނާ އޭންހަލް އެވެ.
މިރާއީ ހީޓު ނިންމާލުމަށްފަހު އުފާފާޅުކުރަނީ -- ފޮޓޯ: އަދަދު
މި ހީޓުގައި މިރާއީ ހަތަރު ރާޅު އެޅިއިރު, އެންމެ މަތިން ސްކޯކުރި ދެ ރާޅަކީ, ދޭއް އަދި ތިންވަނަ ރާޅެވެ. ދެވަނަ ރާޅުގައި މިރާއީ, 7.00 ސްކޯކުރިއިރު, ތިންވަނަ ރާޅުގައި 5.93 ސްކޯކުރި އެވެ. އެއާއުކު ފައިނަލް ހީޓުގައި އޭނާ ވަނީ 12.93 ސްކޯކޮށްފަ އެވެ.
ދެވަނަ އަށްދިޔަ އަންރީ އަށް ހަތަރު ރާޅުން ސްކޯކުރެވުނީ 11.83 އެވެ. އެއީ އޭނާގެ އެންމެ މަތިން ސްކޯކުރި ދެ ރާޅުގައި, 6.50 އަދި 5.33 ސްކޯކޮށްގެންނެވެ.
