ކ. ތުލުސްދޫގައި ކުރިއަށްދިޔަ އޭޝިއަން ސާފިން ޗެމްޕިއަންޝިޕް 2024 ގެ ފިރިހެން ކެޓަގަރީގެ ހަތަރު ވަނަ ރާއްޖެ އަށް ލިބިއްޖެ އެވެ.
މި ފަހަރުގެ މުބާރާތުގައި 20 ގައުމަކުން ވާދަކުރި އެވެ.
މި މުބާރާތުގެ ނިމުމުގެ ރަސްމިއްޔާތު މިއަދު ހަވީރު ކ. އަތޮޅު ތައުލީމީ މަރުކަޒުގައި ކުރިއަށްދިޔައިރު, މި ރަސްމިއްޔާތު ޝަރަފުވެރިކޮށްދެއްވީ, ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު އެވެ.
މީގެ އިތުރުން، ކުޅިވަރާ ބެހޭ ވަޒީރު އަބްދުالله ރާފިއު (ރާއްޕެ) އަދި މޯލްޑިވްސް އޮލިމްޕިކް ކޮމިޓީ (އެމްއޯސީ)ގެ ސެކްރެޓަރީ ޖެނެރަލް، ތަމޫހު އަހުމަދު ސައީދު ވަނީ ބައިވެރިވެވަޑައިގެންފަ އެވެ.
މި ފަހަރުގެ މުބާރާތް ކުރިއަށްދިޔައީ, 2026 ވަނަ އަހަރު ޖަޕާނުގައި ބާއްވާ އޭޝިއަން ގޭމްސްގެ ކޮލިފިކޭޝަނާވެސް އެކުގަ އެވެ. އެގޮތުން މި މުބާރާތުން އެންމެ ރަނގަޅު ނަތީޖާ ނެރޭ ގައުމުތަކަށް އޭޝިއަން ގޭމްސް އަށް ކޮލިފައިވުމުގެ ފުރުސަތު ލިބުނެވެ.
އެ ގޮތުން ރާއްޖޭގެ އަންހެން އާއި ފިރިހެން ޓީމުވެސް ވަނީ 2026 ވަނަ އަހަރު ޖަޕާނުގައި ކުރިއަށްދާ އޭޝިއަން ގޭމްސް އިން ފުރުސަތު ހޯދައިފަ އެވެ.
މިއަދު ކުރިއަށްދިޔަ ނިމުމުގެ ރަސްމިއްޔާތުގައި ވަނީ މި ފަހަރުގެ މުބާރާތުން ޓީމުތަކުގެ ރޭންކިން އިއުލާންކޮށްފަ އެވެ. އެ ގޮތުން ފިރިހެން ކެޓަގަރީގެ ހަތަރުވަނަ އަށް ރާއްޖެ ދިޔައިރު، އެއް ވަނަ ހޯދާފައިވަނީ އިންޑޮނޭޝިއާ އެވެ. ދެ ވަނައިގައި ޖަޕާން އޮތްއިރު، ތިން ވަނައިގައި އޮތީ ފިލިޕީންސް އެވެ.
މި ފަހަރުގެ މުބާރާތުން ރާއްޖޭގެ ފިރިހެން ޓީމަށް ވަނީ އޭޝިއާގެ ހަތަރުވަނަ ލިބިފައި -- ފޮޓޯ: އަތޫފް އާތިފް / އަދަދު
މީގެ އިތުރުން އޭޝިއަން ސާފިން ޗެމްޕިއަންޝިޕުގެ އަންހެން ބައިގެ އެއް ވަނަ ޖަޕާނުން ހޯދިއިރު، ދެ ވަނައިގައި އޮތީ އިންޑޮނޭޝިއާ އެވެ. އަދި ތިން ވަނަ އަށް ޗައިނާ ދިޔައިރު، ހަތަރު ވަނަ ލިބުނީ ފިލިޕީންސް އަށެެވެ.
އަންހެން ބައިގެ ރޭންކިންގައި ރާއްޖެ އޮތީ އަށް ވަނައިގަ އެވެ.
މި މުބާރާތުގެ ފިރިހެން އޯޕަން ޗެމްޕިއަންކަން އިންޑޮނޭޝިއާގެ ޕަޖަރް އަރިޔާނާ ހޯދިއިރު، އަންހެން ކެޓަގަރީގެ ޗެމްޕިއަންކަން ޖަޕާނުގެ މިރާއީ އިކޭޑާ ވަނީ ހޯދައިފަ އެވެ. މީގެ އިތުރުން ޖޫނިއާ ފިރިހެން ކެޓަގަރީގެ ޗެމްޕިއަންކަން ޖަޕާނުގެ ޓާރޯ ޓަކާއީ ހޯދިއިރު، އަންހެން ކެޓަގަރީގެ ޗެމްޕިއަންކަން ހަމަ އެގައުމުގެ އަރީސާ އިޝީ ވަނީ ހޯދައިފަ އެވެ.
އިންޑިވިޖުއަލް ވަނަތަކަށް ބަލާއިރު، ޖަޕާނަކީ މި ފަަހަރުގެ މުބާރާތުގެ އެންމެ ކާމިޔާބު ގައުމެވެ. އަނެއްކޮޅުން، މި ފަހަރުގެ މުބާރާތަކީ، ރާއްޖޭގައި ކުރިއަށްދިޔަ އޭޝިއަން ގޭމްސްއެއްގެ ފުރަތަމަ ކޮލިފައިން އިވެންޓް އެވެ. އެ ގޮތުން، ޖަޕާނުގައި 2026 ވަނަ އަހަރު ބާއްވާ އޭޝިއަން ގޭމްސްގެ އަންހެން އަދި ފިރިހެން ކެޓަގަރީން ރާއްޖެ ވަނީ ފުރުސަތެއް ހޯދައިފަ އެވެ. އެއީ، ދެކުނު އޭޝިއާގެ ގައުމުތަކުގެ ތެރެއިން އެންމެ ރަނގަޅު ރޭންކިން ހޯދައިގެންނެވެ.
