ކ. ތުލުސްދޫގައި މިހާރު ކުރިއަށްދާ އޭޝިއަން ސާފިން ޗެމްޕިއަންޝިޕްގެ 18 އަހަރުން ދަށް، ޖޫނިއާ ކެޓަގަރީން ރާއްޖޭގެ ފަސް އެތުލީޓަކު ވާދަކުރި ފުރަތަމަ ބުރުގެ ހީޓުތަކުގައި ގަދަ ދޭއްގެ ތެރޭގައި ހިމެނި، ތިން ވަނަ ބުރުން ފުރުސަތު ހޯދައިފި އެވެ.
ޖޫނިއާ ބައިގެ އެއް ވަނަ ރައުންުޑުގެ ތިން ވަނަ ހީޓުގައި ރާއްޖޭގެ ދެ ސާފަރުން ވާދަކުރި އެވެ. މި ހީޓުގެ އެއް ވަނަ ހޯދީ، ރާއްޖޭގެ ޖޫނިއާ ކެޕްޓަން، ސައްޔިދު ސަލާހުއްދީން އެވެ. އޭނާ ވަނީ، އެޅި ދެ ރާޅުގައި 6.43 ޕޮއިންޓް ސްކޯކޮށްފަ އެވެ. ހީޓުގެ ދެ ވަނަ ހޯދި ރާއްޖޭގެ ޓީމު ބީ، ޓީމު ތުލުސްދޫގެ ކަޔާން އަރީފް އަށް ވަނީ 6.23 ޕޮއިންޓް ސްކޯކޮށްފަ އެވެ. އެއީ، އެޅި ހަތަރު ރާޅުގެ ތެރެއިން އެންމެ ރަނގަޅު ދެ ރާޅަށް ލިބުނު ސްކޯ އެވެ. މި ހީޓުގެ ތިން ވަނަ ހޯދި ތައިލެންޑްގެ ޓިން ޖޯންސަން އަށް ލިބުނީ، 5.43 ޕޮއިންޓެވެ. އަދި ފުލުގައި ނިންމި ލެބަނަންގެ ރަޔާން ހަކަވާޓީ އަށް ވަނީ 4.80 ޕޮއިންޓް ލިބިފަ އެވެ.
މިއަދު ކުރިއަށްދިޔަ ޖޫނިއާ ކެޓަގަރީގެ ހީޓެއްގެ ތެރެއިން.--- ފޮޓޯ: އަތޫފް އާތިފް / އަދަދު ސްޕޯޓްސް
ހީޓު ހަތަރެއްގެ އެއް ވަނަ ހޯދީ ރާއްޖެ ޓީމުގެ ކަޔާން ޒަކީ އެވެ. އޭނާ ވަނީ، ހަަތަރު ރާޅު އަޅައި، އެންމެ ރަނގަޅަށް އެޅި ދެ ރާޅުން އެއްކުރި ސްކޯ، 9.20 ޕޮއިންޓަށް ހަދައި، ހީޓުގެ އެއް ވަނަ ހޯދައިފަ އެވެ. ދެ ވަނަ ހޯދީ، 9.10 ޕޮއިންޓް ހޯދި ޓީމު ތުލުސްދޫގެ މުހައްމަދު އިނާން އެވެ. ހީޓުގެ ތިން ވަނަ އަށް ދިޔަ ތައިލެންޑްގެ ނަތުރީ ދަރިޔަވަތަނަވަޖިޓް ވަނީ ފަސް ރާޅު އަޅައި، އެންމެ ރަނގަޅު ދެ ރާޅުގެ ޕޮއިންޓުން، 8.57 ސްކޯކޮށްފަ އެވެ. އަދި ފުލަށް ދިޔަ، ސިންގަޕޫރުގެ ޖޫލިއަން މާކް ވަނީ 7.27 ޕޮއިންޓް ސްކޯކޮށްފަ އެވެ.
ހީޓު ފަހެއްގައި ވާދަކޮށް، ރާއްޖޭގެ، ޔާސީން އަހުމަދު ނާޝިދު ވަނީ ދެން ވާދަކުރި ދެ ސާފަރުން ބަލިކޮށް އެއް ވަނަ ހޯދައިފަ އެވެ. ޔާސީން ވަނީ، ހަތަރު ރާޅު އަޅައި، އެންމެ ރަނގަޅު ދެ ރާޅުގެ ސްކޯ އިން، 9.17 ޕޮއިންޓް ސްކޯކޮށްފަ އެވެ. ދެ ވަނަ އަށް ދިޔައީ ކޮރެއާގެ ޑޮހޫން ޔުން އެވެ. އޭނާ ވަނީ، ހަތް ރާޅު އަޅައި، އެންމެ ރަނގަޅު ދެ ރާޅުގެ ސްކޯއިން، 5.50 ޕޮއިންޓް ސްކޯކޮށްފަ އެވެ. އަދި ހީޓުގެ ފުލުންދިޔަ، ސިންގަޕޫރުގެ އައިދިން ނާޒިރު އަށް ވަނީ، 1.10 ޕޮއިންޓް ސްކޯކޮށްފަ އެވެ.
