ބުޅާ މަސް އަޅައިގެން ކާތަކަތި ތައްޔާރުކޮށް ވިއްކާ ކަމަށް ތުހުމަތު ކުރާ ބިދޭސީއަކު ހޯދަން އިމިގްރޭޝަނުން އިއުލާންކޮށްފި އެވެ.
ބުޅާތަކުގެ ހައްގުގައި މަސައްކަތް ކުރާ ފެލީން ވެލްފެއާ އޯގަނައިޒޭޝަނުން އޭނާގެ މައްސަލަ ފެންމަތިކޮށް، ސޯޝަލް މީޑިއާގައި ކުރި ޕޯސްޓެއްގައި ބުނީ އެއީ ގަވާއިދާ ހިލާފަށް މާލޭ ވަޅޯ މަސް މާރުކޭޓުގައި މަސައްކަތް ކުރަމުންދާ ބިދޭސީއެއް ކަމަށެވެ.
އެ ޖަމިއްޔާއިން ތުހުމަތުކުރަނީ އޭނާއަކީ ބުޅާ ކަތިލައި، އޭގެ މަހުން ކާއެއްޗެހި ތައްޔާރުކޮށް، ޕާރުސަލް ވިއްކާ މީހެއް ކަމަށެވެ.
އިމިގްރޭޝަނުން ކުރި އިއުލާނުގައި، ބަންގްލަދޭޝްގެ 32 އަހަރުގެ އަރަފާތު ހޮސައިންއަށް ހާޒިރުވާން އަންގާ ފަސް ދުވަހުގެ ނޯޓިސްއެއް ދީފައިވެ އެވެ. އެކަމަކު އޭނާ ހޯދަމުންދަނީ ކޮން މައްސަލައަކާ ގުޅިގެން ކަމަށް ނުބުނެ އެވެ.
މި މީހާ އުޅޭ ތަނަކާ ގުޅޭ އެއްވެސް މައުލޫމާތެއް ލިބިފައިވާނަމަ، އިމިގްރޭޝަނުގެ ނަންބަރު 9199017 އަށް ގުޅައިގެން ނުވަތަ، risk@immigration.gov.mv އަށް މެއިލްކޮށް، އެ މައުލޫމާތެއް ހިއްސާކޮށްދިނުމަށް ވެސް އިމިގްރޭޝަނުން އެދިފައިވެ އެވެ.
ގަވާއިދާ ހިލާފަށް ވިޔަފާރިކުރާ ބިދޭސީން ހޯދުމަށް އިމިގްރޭޝަނުން މި ފަހުން ފެށި އޮޕަރޭޝަނަށް ފަހު ނުތާހިރުކޮށް އަދި ކަމުނުދާ ތަކެތި އަޅައިގެން ކާތަކެތި ތައްޔާރުކުރާ އެކި ތަންތަން ވެސް ދަނީ މާލެ ސަރަހައްދުން ހޯދަމުންނެވެ.
